ಗಡಿಯಲ್ಲಿ 300 ಟ್ಯಾಂಕರ್‌ ನಿಲ್ಲಿಸಿರುವ ಪಾಕ್‌

ಹೊಸದಿಲ್ಲಿ : ಬಾಲಾಕೋಟ್‌ನಲ್ಲಿ ಭಾರತೀಯ ವಾಯುಪಡೆ ನಡೆಸಿದ ಏರ್‌ಸ್ಟ್ರೈಕ್‌ ಬಳಿಕ ಸದಾ ದಾಳಿಯ ಭಯದಲ್ಲಿರುವ ಪಾಕಿಸ್ತಾನವು ಪಂಜಾಬ್‌ ಪ್ರಾಂತ್ಯದಲ್ಲಿನ ಅಂತಾರಾಷ್ಟ್ರೀಯ ಗಡಿ ಬಳಿ 300 ಯುದ್ಧ ಟ್ಯಾಂಕರ್‌ಗಳನ್ನು ಸನ್ನದ್ಧವಾಗಿರಿಸಿದೆ ಎಂದು ಗುಪ್ತಚರ ವರದಿ ತಿಳಿಸಿದೆ. ಶಾಕರ್‌ಘರ್‌ ಸೆಕ್ಟರ್‌ನಲ್ಲಿ ಪಾಕಿಸ್ತಾನ ಸೇನೆಯ 3 ಬ್ರಿಗೇಡ್‌ಗಳು, 124 ಶಸ್ತ್ರ ಸಜ್ಜಿತ ಪಡೆ ಹಾಗೂ ಡಿವಿಷನ್‌ 8, 15ರ ಸೈನಿಕರು ಗಡಿಯಲ್ಲಿ ನಿಯೋಜಿತರಾಗಿದ್ದಾರೆ.

ಪಾಕಿಸ್ತಾನ '30 ಕೋರ್‌' ಪಡೆಗೆ ಸ್ವತಂತ್ರ ಟ್ಯಾಂಕರ್‌ ಬ್ರಿಗೇಡ್‌ಗಳು ಕಾವಲಾಗಿವೆ. ಕೆಲವು ಅರೆಸೈನಿಕ ಪಡೆಗಳು ಕೂಡ ಗಸ್ತು ತಿರುಗುತ್ತಿರುತ್ತವೆ ಎಂದು ವರದಿ ಹೇಳಿದೆ. ಕಳೆದ ಫೆಬ್ರವರಿಯಲ್ಲಿ ಕೂಡ ಶಾಕರ್‌ಘರ್‌ನಲ್ಲಿ ಶಸ್ತ್ರಗಳನ್ನು ಸಂಗ್ರಹಿಸುವ ಅಡ್ಡೆಗಳನ್ನು ಪಾಕಿಸ್ತಾನ ನಿರ್ಮಿಸಿದೆ ಎಂದು ಗುಪ್ತಚರ ವರದಿ ಎಚ್ಚರಿಸಿತ್ತು.

ಪಠಾಣ್‌ಕೋಟ್‌, ಕಠುವಾ, ಕಾಶ್ಮೀರಕ್ಕೆ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ ಶಾಕರ್‌ಘರ್‌ ಬಳಿ ಇರುವುದರಿಂದ ಸ್ಥಳೀಯವಾಗಿ ಪಾಕಿಸ್ತಾನ ಸೇನೆಯ ಎಲ್ಲ ಚಟುವಟಿಕೆಗಳು ಭಾರತಕ್ಕೆ ಪ್ರಮುಖವಾಗಿದೆ.
......................
ಜೈಷ್‌ ಉಗ್ರ ಅರೆಸ್ಟ್‌ : ಜೈಷ್‌-ಎ-ಮೊಹಮ್ಮದ್‌ ಸಂಘಟನೆ ಉಗ್ರ ಅಬ್ದುಲ್‌ ಮಜೀದ್‌ ಬಾಬಾನನ್ನು ಮಂಗಳವಾರ ಜಮ್ಮು ಮತ್ತು ಕಾಶ್ಮೀರದ ಶ್ರೀನಗರದಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಈತನ ಮಾಹಿತಿ ನೀಡಿದವರಿಗೆ ದೆಹಲಿ ಪೊಲೀಸರು 2 ಲಕ್ಷ ರೂ. ಬಹುಮಾನ ಘೋಷಿಸಲಾಗಿತ್ತು.

.......