ಮ್ಯೂಸಿಯಂ ಆಗಲಿದೆ ಚಿಣ್ಣರಿಗೆ ಮರುಜನ್ಮ ನೀಡಿದ ಗುಹೆ

ಮಾಯೆ ಸಾಯಿ: ಹಾಲಿವುಡ್‌ನ ಅಡ್ವೆಂಚರಸ್‌ ಮೂವಿಗಳಿಗೇ ಸೆಡ್ಡು ಹೊಡೆಯುವ ರೀತಿಯಲ್ಲಿ ಎರಡು ವಾರ ಕಾಲ ಸಿಲುಕಿಕೊಂಡಿದ್ದ 12 ಮಕ್ಕಳು ಮತ್ತು ಒಬ್ಬ ಕೋಚ್‌ ಥಾಯ್ಲೆಂಡ್‌ನ 'ಥಾಂ ಲುವಾಂಗ್‌' ಗುಹೆಯನ್ನು ಮ್ಯೂಸಿಯಂ ಆಗಿ ರೂಪಿಸಲು ಥಾಯ್ಲೆಂಡ್‌ ಆಡಳಿತ ಸಿದ್ಧತೆ ನಡೆಸಿದೆ.

ಕಣ್ಣಿಗೆ ಕಣ್ಣನ್ನೇ ನಂಬಲಾರದಂಥ ಕಾರ್ಗತ್ತಲು, ಪ್ರವಾಹದೋಪಾದಿಯಲ್ಲಿ ನುಗ್ಗಿಬರುವ ನೀರು, ಮುಗ್ಗರಿಸಿ ಬೀಳುವಷ್ಟರಲ್ಲಿ ಎದುರಾಗುವ ಕೊರಕಲು ಸುರಂಗ, ತಗ್ಗು-ದಿಣ್ಣೆಗಳ ದುರ್ಗಮ ಹಾದಿಯಲ್ಲಿ ಹಾವಿನಂತೆ ತೆವಳುತ್ತಾ ತಮ್ಮ ಪ್ರಾಣವನ್ನೂ ಲೆಕ್ಕಿಸದೆ 'ವೈಲ್ಡ್‌ ಬೋರ್ಸ್‌' ತಂಡದ ಸದಸ್ಯರನ್ನು ಪ್ರಾಣಾಪಾಯದಿಂದ ನುರಿತ ರಕ್ಷಣಾ ತಂಡ ಪಾರು ಮಾಡಿದೆ. ಬಾಲಕರು ಮತ್ತು ಕೋಚ್‌ ಆಸ್ಪತ್ರೆಯಲ್ಲಿ ಚೇತರಿಸಿಕೊಳ್ಳುತ್ತಿದ್ದಾರೆ. ಈ ಗುಹೆ ಈಗ ಎಲ್ಲರ ಗಮನ ಸೆಳೆದಿದೆ.

ರಕ್ಷಣಾ ಕಾರ್ಯಾಚರಣೆ ಮುಗಿದು ಎರಡು ದಿನ ಕಳೆದರೂ ತಂಡದ ಸದಸ್ಯರು ಇನ್ನೂ 'ಥಾಂ ಲುವಾಂಗ್‌' ಗುಹೆ ಬಳಿಯೇ ಬೀಡುಬಿಟ್ಟಿದ್ದಾರೆ. 18 ದಿನಗಳ ಕಾರ್ಯಾಚರಣೆಗೆ ಬಳಸಿದ ನೀರಿನ ಪಂಪ್‌ಗಳು, ಭಾರಿ ಯಂತ್ರೋಪಕರಣಗಳು ಹಾಗೂ ವಿವಿಧ ನಿರ್ಮಾಣ ಸಲಕರಣೆಗಳನ್ನು ಗುಹೆಯಿಂದ ತೆರವುಗೊಳಿಸುವ ಕಾರ್ಯದಲ್ಲಿ ತಲ್ಲೀನರಾಗಿದ್ದಾರೆ. ಭಾನುವಾರದವರೆಗೆ ಈ ಕಾರ್ಯ ನಡೆಯುವ ಸಾಧ್ಯತೆ ಇದೆ. ರಕ್ಷಣಾ ಕಾರ್ಯಾಚರಣೆ ತಂಡದ ಮುಖ್ಯಸ್ಥ ನರೋಂಗ್‌ಸಾಕ್‌ ಒಸೊಟ್ಟಾನಕೋರ್ನ್‌ ಅವರೇ ಗುಹೆಯನ್ನು ಮ್ಯೂಸಿಯಂ ಮಾಡುವ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ.