ಲೈಂಗಿಕ ಆರಾಧನೆ ಪಂಥ ಕಟ್ಟಿದ್ದ ಕೀತ್‌ ಮುಖವಾಡ ಬಯಲು

ನ್ಯೂಯಾರ್ಕ್‌ : ಲೈಂಗಿಕವಾಗಿ ಬಳಸಿಕೊಳ್ಳುವ ಮಾನವ ಕಳ್ಳಸಾಗಣೆ ಜಾಲ ರಚನೆ ಹಾಗೂ ಲೈಂಗಿಕ ಚಟುವಟಿಕೆಗಳಿಗೆ ಮಕ್ಕಳನ್ನು ಬಳಸಿಕೊಳ್ಳುತ್ತಿದ್ದ ಆರೋಪದ ಮೇಲೆ ಬಂಧಿತನಾಗಿ ಬ್ರೂಕ್ಲೀನ್‌ನ ಫೆಡರಲ್‌ ಕೋರ್ಟಿನಲ್ಲಿ ವಿಚಾರಣೆ ಎದುರಿಸುತ್ತಿರುವ ಸ್ವಘೋಷಿತ ದೇವಮಾನವ ಕೀತ್‌ ರನೀರೆ ಕುರಿತಾದ ವಿಲಕ್ಷಣ ಮಾಹಿತಿಗಳು ಬಹಿರಂಗವಾಗಿದೆ.

ನೆಕ್ಸ್‌ವೀಮ್‌ ಹೆಸರಿನ ಸ್ವಸಹಾಯ ತಂಡವೊಂದನ್ನು ಕಟ್ಟಿಕೊಂಡಿದ್ದ 58 ವರ್ಷದ ಕೀತ್‌ ಜತೆಗಿದ್ದ ಸಹಾಯಕರು ಕೋರ್ಟಿನಲ್ಲಿ ವಿಚಾರಣೆ ವೇಳೆ ಆತ ನಡೆಸುತ್ತಿದ್ದ ನಗ್ನ ಸಭೆಗಳು, ನೆಲದ ಮೇಲೆ ಮಹಿಳೆಯರನ್ನು ನಗ್ನವಾಗಿ ಹೊರಳಾಡಿಸುತ್ತ ಪ್ರವಚನ ನೀಡುತ್ತಿದ್ದ ಕೀತ್‌ನ ವಿಲಕ್ಷಣಗಳನ್ನು ಬಹಿರಂಗಪಡಿಸಿದ್ದಾರೆ.

ಸಭೆ ಗೈರಾದರೆ ನಗ್ನ ಫೋಟೊ ಸಂದೇಶ : ಲೌರೆನ್‌ ಸಾಲ್‌ಮನ್‌ ಹೆಸರಿನ ಮಾಜಿ ಸೇವಕಿ ಕೋರ್ಟ್‌ಗೆ ತಿಳಿಸಿದಂತೆ, ''ಕೀತ್‌ ಸಭೆಗಳಲ್ಲಿ ಬಟ್ಟೆ ತೊಟ್ಟು ಕೂತಿರುತ್ತಿದ್ದರು. ಆದರೆ ತನ್ನ ಸೇವಕಿಯರಿಗೆ ಮಾತ್ರ ನಗ್ನವಾಗಿ ನೆಲದ ಮೇಲೆ ಕೂರಲು ಸೂಚಿಸುತ್ತಿದ್ದರು. ಒಂದು ವೇಳೆ ಸಭೆಗೆ ಗೈರಾದ ಸಂದರ್ಭ ಬಂದರೆ, ಕೂಡಲೇ ಸೇವಕಿಯರು ತಮ್ಮ ನಗ್ನ ಫೋಟೊಗಳನ್ನು ನನಗೆ ಕಳುಹಿಸುತ್ತಿದ್ದರು'' ಎಂದಿದ್ದಾಳೆ.

ವಿಶೇಷ ಶಕ್ತಿಯನ್ನು ಕೀತ್‌ ಹೊಂದಿದ್ದಾರೆ. ಅವರ ಎದುರು ತಂತ್ರಜ್ಞಾನ ಕಾರ್ಯನಿರ್ವಹಿಸುವುದಿಲ್ಲ ಎಂದು ಕೀತ್‌ ತನ್ನ ಸೇವಕಿಯರಿಗೆ (ನೆಕ್ಸ್‌ವೀಮ್‌ನ ಶಿಕ್ಷಕಿಯರು) ನಂಬಿಸಿದ್ದ. ಸೇವಕಿಯರಿಗೆ ನಿರ್ದಿಷ್ಟ ಆಹಾರ ಸೇವನೆ ಕ್ರಮವನ್ನು ಕಟ್ಟುನಿಟ್ಟಾಗಿ ಪಾಲಿಸಲು ಕೀತ್‌ ಸೂಚಿಸುತ್ತಿದ್ದ. ಜತೆಗೆ ಹಲವು ಬಾರಿ ಅವರನ್ನು ಲೈಂಗಿಕವಾಗಿ ಬಳಸಿಕೊಳತ್ತಿದ್ದ ಎಂದು ಲೌರೆನ್‌ ಹೇಳಿದ್ದಾಳೆ.

ಲೌರೆನ್‌ ತಾಯಿ ನ್ಯಾನ್ಸಿ ನೆಕ್ಸ್‌ವೀಮ್‌ನ ಮೊದಲ ಸಾಲಿನ ಸೇವಕಿಯರಲ್ಲಿ ಒಬ್ಬರಾಗಿದ್ದರು. 21 ವರ್ಷದವಳಾಗಿದ್ದಾಗ ತಾಯಿ ಕೀತ್‌ನನ್ನು ಭೇಟಿ ಮಾಡಿಸಿದ್ದರು. ಅಂದಿನಿಂದ ಲೈಂಗಿಕ ಸಂಬಂಧ ನಡೆದುಬಂದಿತ್ತು ಎಂದು ಲೌರೆನ್‌ ಕೋರ್ಟ್‌ಗೆ ಹೇಳಿದ್ದಾಳೆ. ಪ್ರಸ್ತುತ ಲೌರೆನ್‌ಗೆ 42 ವರ್ಷ.

ಅನೇಕ ಸೇವಕಿಯರ ನಗ್ನ ಚಿತ್ರಗಳನ್ನು ತೆಗೆದು, ಆ ಮೂಲಕ ಅವರನ್ನು ಕೀತ್‌ ಬ್ಲ್ಯಾಕ್‌ಮೇಲ್‌ ಮಾಡಿ ಹಣ ದೋಚಿದ ಪ್ರಸಂಗಗಳು ಕೂಡ ಇವೆ ಎಂದು ಲೌರೆನ್‌ ಹೇಳಿದ್ದಾಳೆ. ವಿಚಾರಣೆಯಲ್ಲಿ ಕೀತ್‌ ಅಪರಾಧಿ ಎಂದು ಸಾಬೀತಾದರೆ, ಜೀವಾವಧಿ ಶಿಕ್ಷೆಗೆ ಗುರಿಯಾಗಬೇಕಾಗುತ್ತದೆ.