ಭೂಮಿಗೆ ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆ ಶಾಲಾ ಬಸ್ ಗಾತ್ರದ 2020 SW ಕ್ಷುದ್ರಗ್ರಹ!

ವಾಷಿಂಗ್ಟನ್: ಬಾಹ್ಯಾಕಾಶದ ಅಲೆಮಾರಿಗಳಾದ ಕ್ಷುದ್ರಗ್ರಹಗಳು ಭೂಮಿಯ ಸಮೀಪಕ್ಕೆ ಬರುವುದು ಹೊಸ ವಿದ್ಯಮಾನವೇನಲ್ಲ. ಅಂತರಿಕ್ಷದಲ್ಲಿ ದಿಕ್ಕು ತೋಚದೇ ಅಲೆದಾಡುವ ಈ ಬಾಹ್ಯಾಕಾಶದ ಶಿಲೆಗಳು, ತಾವು ಸಾಗುವ ಮಾರ್ಗದಲ್ಲಿ ಭೂಮಿಯನ್ನು ಸಂಧಿಸಿ ಹೋಗುವುದು ಸಾಮಾನ್ಯ.

ಆದರೆ ಕೆಲವು ಕ್ಷುದ್ರಗ್ರಹಗಳು ಭೂಮಿಗೆ ಅತ್ಯಂತ ಸಮೀಪವೂ ಬರುವುದರಿಂದ, ಭೂಮಿಗೆ ಡಿಕ್ಕಿ ಹೊಡೆಯುವ ಅಪಾಯ ತಪ್ಪಿದ್ದಲ್ಲ. ಸಾವಿರಾರು ವರ್ಷಗಳ ಹಿಂದೆ ಇಂತದ್ದೇ ಕ್ಷುದ್ರಗ್ರಹ ಭೂಮಿಗೆ ಅಪ್ಪಳಿಸಿದ ಪರಿಣಾಮವಾಗಿಯೇ ಡೈನಾಸೋರ್ ಯುಗ ಅಂತ್ಯಗೊಂಡಿದ್ದು ನಮಗೆಲ್ಲಾ ಗೊತ್ತಿರುವ ಸಂಗತಿ.

ಅದರಂತೆ ಇಂದು(ಗುರುವಾರ) ಶಾಲಾ ಬಸ್ ಗಾತ್ರದ ಕ್ಷುದ್ರಗ್ರಹವೊಂದು ಭೂಮಿಗೆ ಅತ್ಯಂತ ಸಮೀಪಕ್ಕೆ ಬಂದಿದ್ದು, ನಾಸಾ ಈ ಕುರಿತು ಅಧಿಕೃತ ಪ್ರಕಟಣೆ ಹೊರಡಿಸಿದೆ.

ಭೂಮಿಯ ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆ ಫೇಸ್ ಮಾಸ್ಕ್ ಧರಿಸಿದಂತೆ ಕಾಣುವ ಕ್ಷುದ್ರಗ್ರಹ!


ಹೊಸದಾಗಿ ಪತ್ತೆಯಾಗಿರುವ ಕ್ಷುದ್ರಗ್ರಹವು ಭೂಮಿಯಿಂದ ಕೇವಲ 13,000 ಮೈಲು(22,000 ಕಿ.ಮೀ)ಗಳಷ್ಟು ಹತ್ತಿರದಿಂದ ಹಾದು ಹೋಗಲಿದ್ದು, ಭೂಮಿಗೆ ಯಾವುದೇ ಅಪಾಯವಿಲ್ಲ ಎಂದು ನಾಸಾ ಸ್ಪಷ್ಟಪಡಿಸಿದೆ. ಇದು ಭೂಮಿಯನ್ನು ಪರಿಭ್ರಮಿಸುವ ಅನೇಕ ಸಂವಹನ ಉಪಗ್ರಹಗಳಿಗಿಂತ ಹತ್ತಿರದಲ್ಲಿ ಹಾದು ಹೋಗಲಿರುವುದು ವಿಶೇ‍ಷ.

2020 SW ಎಂಬ ಹಸರಿನ ಈ ಕ್ಷುದ್ರಗ್ರಹ 15 ರಿಂದ 30 ಅಡಿ ಸುತ್ತಳತೆ ಹೊಂದಿದ್ದು, ಮುಂದೆ 2041ರಲ್ಲಿ ಮತ್ತೆ ಭೂಮಿಯ ಸಮೀಪಕ್ಕೆ ಬರಲಿದೆ ಎಂದು ನಾಸಾ ಖಗೋಳ ವಿಜ್ಞಾನಿಗಳು ಸ್ಪಷ್ಟಪಡಿಸಿದ್ದಾರೆ.

ಗಂಟೆಗೆ 57,240 ಕಿ.ಮೀ. ವೇಗದಲ್ಲಿ ಭೂಮಿಯತ್ತ ಬರುತ್ತಿದೆ ಬೃಹತ್‌ ಹೆಬ್ಬಂಡೆಯಂತ ಕ್ಷುದ್ರಗ್ರಹ!

2020 SW ಕ್ಷುದ್ರಗ್ರಹವನ್ನು ಟೆಕ್ಸಾಸ್‌ನ ಅರಿಜೋನಾ ವಿವಿಯ ಕ್ಯಾಟಲೀನಾ ಸ್ಕೈ ಸರ್ವೇ ಸೆಂಟರ್‌ನಲ್ಲಿ ಕಳೆದ ಶುಕ್ರವಾರ ಪತ್ತೆ ಮಾಡಲಾಯಿತು.

ಆಗ್ನೇಯ ಪೆಸಿಫಿಕ್ ಮಹಾಸಾಗರದ ಪ್ರದೇಶದಲ್ಲಿ 2020 SW ಕ್ಷುದ್ರಗ್ರಹ ಇಂದು(ಗುರುವಾರ) ಸ್ಪಷ್ಟವಾಗಿ ಗೋಚರವಾಗಲಿದೆ ಎನ್ನಲಾಗಿದೆ.