ಮತ್ತೆ ನೇಪಾಳದ ಕ್ಯಾತೆ: ಭಾರತದ ಭೂ ಪ್ರದೇಶಗಳಿರುವ ನಕ್ಷೆ ಪಠ್ಯದಲ್ಲಿ ಸೇರ್ಪಡೆ!

ಕಾಠ್ಮಂಡು: ಚೀನಾದ ಬೆದರಿಕೆ ತಂತ್ರಕ್ಕೆ ಮಣಿದು ಭಾರತದ ಭೂಭಾಗಕ್ಕೆ ಸೇರಿದ ಲಿಪುಲೇಖ್‌, ಕಾಲಾಪಾನಿ ಮತ್ತು ಲಿಪಿಯಾಂಧುರ ಪ್ರದೇಶಗಳು ತನಗೆ ಸೇರಿದ್ದೆಂದು ಬಿಂಬಿಸುವ ಹೊಸ ರಾಜಕೀಯ ನಕ್ಷೆಗೆ ಸಂಸತ್ತಿನ ಅನುಮೋದನೆ ಪಡೆದಿದ್ದ ನೇಪಾಳ ಸರಕಾರವು ಈಗ ಶಾಲಾ ಪಠ್ಯಪುಸ್ತಕದಲ್ಲಿಈ ನಕ್ಷೆಯನ್ನು ಸೇರ್ಪಡೆ ಮಾಡಿದೆ.

ಶಿಕ್ಷಣ ಸಚಿವ ಗಿರಿರಾಜ್‌ ಮಣಿ ಪೊಖಾರೆಲ್‌ ಅವರು ಬರೆದ 'ನೇಫಾಳ್ಸ್‌ ಟೆರಿಟೆರಿ ಆ್ಯಂಡ್‌ ರೀಡಿಂಗ್‌ ಮಟಿರಿಯಲ್ಸ್‌ ಫಾರ್‌ ಬಾರ್ಡರ್‌ ಇಶ್ಯೂಸ್‌' ಹೆಸರಿನ ಹೊಸ ಕೃತಿಯನ್ನು ಸೇರ್ಪಡೆ ಮಾಡಿ, ವಿವಾದಿತ ರಾಜಕೀಯ ನಕ್ಷೆಯನ್ನು ಪ್ರಕಟಿಸಿದೆ. 9 ಮತ್ತು 12ನೇ ತರಗತಿಯ ಹೊಸ ಪಠ್ಯಕ್ರಮದಲ್ಲಿಈ ಪುಸ್ತಕವೂ ಒಂದಾಗಿದೆ.

ನೇಪಾಳದ ಕ್ರಮ ಉಭಯ ದೇಶಗಳ ಒಪ್ಪಂದಗಳಿಗೆ ವಿರುದ್ಧವಾಗಿದ್ದು, ಭಾರತ ಎಂದಿಗೂ ಇದನ್ನು ಸಹಿಸುವುದಿಲ್ಲಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ವಕ್ತಾರ ಅನುರಾಗ್‌ ಶ್ರೀವಾಸ್ತವ ಪ್ರತಿಕ್ರಿಯಿಸಿದ್ದಾರೆ. ಈ ಮಧ್ಯೆ ಪರಿಷ್ಕೃತ ರಾಜಕೀಯ ನಕ್ಷೆಯನ್ನು ಒಳಗೊಂಡ 1 ಹಾಗೂ 2 ರೂ. ನಾಣ್ಯಗಳನ್ನು ಮುದ್ರಿಸುವಂತೆಯೂ ನೇಪಾಳ ಸರಕಾರ ಅಲ್ಲಿನ 'ನೇಪಾಳ ರಾಷ್ಟ್ರ ಬ್ಯಾಂಕ್‌'ಗೆ ಸೂಚಿಸಿದೆ.

ನೇಪಾಳವು ಚೀನಾದ ಕುಮ್ಮಕ್ಕಿನಿಂದ ಹಳೆಯ ಗೆಳೆಯ ಭಾರತದೊಂದಿಗೆ ಕ್ಯಾತೆ ತೆಗೆಯುತ್ತಿದೆ. ಭಾರತದ ವಿರುದ್ಧ ಮಾತನಾಡಿದ್ದ ಪ್ರಧಾನಿ ಒಲಿ ಶರ್ಮಾನ ವಿರುದ್ದವೇ ಅಲ್ಲಿನ ರಾಜಕೀಯ ನಾಯಕರು ಆಕ್ರೋಶ ವ್ಯಕ್ತಪಡಿಸಿದ್ದರು. ಇದೀಗ ಮತ್ತೆ ಕ್ಯಾತೆಗೆ ಅಲ್ಲಿನ ಸರಕಾರ ಮುಂದಾಗಿದೆ.