ದುಬೈ ಏರ್ಪೋರ್ಟ್ನಲ್ಲಿ ದುಂಡಗಿನ ಬ್ಯಾಗ್ಗೆ ಅವಕಾಶವಿಲ್ಲ
ದುಬೈ ವಿಮಾನ ನಿಲ್ದಾಣದಲ್ಲಿ ಬುಧವಾರದಿಂದ ಹೊಸ ಬ್ಯಾಗೇಜ್ ನಿಯಮ ಜಾರಿಗೆ ಬರಲಿದೆ.
ದುಬೈ: ದುಬೈ ವಿಮಾನ ನಿಲ್ದಾಣದಲ್ಲಿ ಬುಧವಾರದಿಂದ ಹೊಸ ಬ್ಯಾಗೇಜ್ ನಿಯಮ ಜಾರಿಗೆ ಬರಲಿದೆ. ನೂತನ ನಿಯಮದ ಪ್ರಕಾರ ಸಮತಟ್ಟಾದ ತಳಭಾಗ ಹೊಂದಿರದ ಚೀಲಗಳಿಗೆ ಅವಕಾಶವಿಲ್ಲ.
ದುಂಡನೆಯ, ಮೂಟೆಯಾಕಾರದ, ದಾರಗಳಿಂದ ಬಿಗಿದ ಬ್ಯಾಗುಗಳನ್ನು ನಿಷೇಧಿಸಲಾಗಿದೆ. ಅಷ್ಟೇ ಅಲ್ಲ, ಮಿತಿಗಿಂತ ಹೆಚ್ಚು ತೂಕದ ಚೀಲಗಳನ್ನೂ ನಿಷೇಧಿಸಲಾಗಿದೆ. ಯಾವುದೇ ಚೀಲದ ಯಾವುದೇ ಒಂದು ಮೈ ಸಮತಟ್ಟಾಗಿರುವುದು ಕಡ್ಡಾಯ ಎಂದು ದುಬೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಉದ್ಯಮ ಸಂವಹನ ವಿಭಾಗದ ನಿರ್ದೇಶಕ ಲೋರ್ನೆ ರಿಲೆ ಹೇಳಿದ್ದಾರೆ.
'ಒಂದೊಮ್ಮೆ ನೀವು ನಿಯಮಕ್ಕೆ ಅನುಗುಣವಾಗಿಲ್ಲದ ಬ್ಯಾಗುಗಳನ್ನು ವಿಮಾನ ನಿಲ್ದಾಣಕ್ಕೆ ಕೊಂಡೊಯ್ದರೆ ಒಂದೋ ಅವುಗಳನ್ನು ಅಲ್ಲೇ ತೊರೆದು ಬರಬೇಕಾಗುತ್ತದೆ, ಇಲ್ಲವೇ ಅವುಗಳನ್ನು ಮತ್ತೆ ನಿಯಮಕ್ಕೆ ಅನುಗುಣವಾಗಿ ಪ್ಯಾಕ್ ಮಾಡಲು ಶುಲ್ಕ ತೆರಬೇಕಾಗುತ್ತದೆ,' ಎಂದು ರಿಲೆ ಸ್ಪಷ್ಟಪಡಿಸಿದ್ದಾರೆ.
ತೊಂದರೆ ತಪ್ಪಿಸಲು ಕ್ರಮ
ದುಂಡಗಿನ ಆಕಾರ ಹೊಂದಿರುವ ಬ್ಯಾಗುಗಳಲ್ಲಿ ಬ್ಯಾಗೇಜ್ ಹೊತ್ತು ಸಾಗಿಸುವ ಚಲಿಸುವ ಬೆಲ್ಟ್ಗಳಲ್ಲಿ ಉರುಳಿ ಒಂದೇ ಕಡೆ ಜಮೆಗೊಂಡು ತೀವ್ರ ಅಡಚಣೆಗೆ ಕಾರಣವಾಗುತ್ತಿತ್ತು. ಇದನ್ನು ತಪ್ಪಿಸಲು ಹೊಸ ನಿಯಮ ಜಾರಿಗೆ ತರಲಾಗಿದೆ ಎಂದು ರಿಲೆ ಹೇಳಿದ್ದಾರೆ.