ಹೊಸ ಜಗತ್ತಿನ ಅನ್ವೇಷಣೆಗೆ ನೀವು ನಾಸಾಗೆ ಸಹಾಯ ಮಾಡಿ: ಏನಿದು ಪ್ಲ್ಯಾನೆಟ್ ಪೆಟ್ರೋಲ್?

ವಾಷಿಂಗ್ಟನ್: ನಮ್ಮ ಸೌರಮಂಡಲದ ಆಚೆಗಿನ ಜಗತ್ತನ್ನು ಸಂಶೋಧಿಸುವಲ್ಲಿ ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ನಿರತವಾಗಿದೆ. ಇದಕ್ಕಾಗಿ ಬ್ರಹ್ಮಾಂಡದ ಮೂಲೆ ಮೂಲೆಯನ್ನೂ ನಾಸಾ ಹೆಕ್ಕಿ ತೆಗೆಯುತ್ತಿದೆ.

ನಾಸಾದ ಗ್ರೌಂಡ್ ಬೇಸ್ ಟೆಲಿಸ್ಕೋಪ್‌ಗಳು ಹಾಗೂ ಹಬಲ್‌ ಸೇರಿದಂತೆ ಇತರ ಬಾಹ್ಯಾಕಾಶ ದೂರದರ್ಶಕ ಯಂತ್ರಗಳು, ಅನಂತ ದಿಗಂತದ ಅಗಾಧತೆಯನ್ನು ಸೀಳುತ್ತಿವೆ.

ಹೊಸ ಹೊಸ ಸಂಶೋಧನೆಗಳು ವಿಶ್ವದ ಕುರಿತಾದ ಮಾನವನ ಜ್ಞಾನವನ್ನು ವೃದ್ಧಿಸುತ್ತಲೇ ಇದ್ದು, ಖಗೋಳಶಾಸ್ತ್ರಜ್ಞರಿಗೆ ರಸದೌತಣವನ್ನೇ ಉಣಬಡಿಸುತ್ತಿದೆ.

ಸೂರ್ಯನಿಗಿಂತ 5 ಬಿಲಿಯನ್ ಪಟ್ಟು ಪ್ರಕಾಶಮಾನವಾದ ನಾಕ್ಷತ್ರಿಕ ಸ್ಫೋಟ ಸೆರೆಹಿಡಿದ ಹಬಲ್!

ಇದೀಗ ನಾಸಾ ಬಹ್ಯಾಕಾಶದ ಬಾಗಿಲನ್ನು ಸಾಮಾನ್ಯ ನಾಗರಿಕರೂ ಹಾಗೂ ಹವ್ಯಾಸಿ ಖಗೋಳ ವಿಜ್ಞಾನಿಗಳಿಗೂ ತೆರೆದಿದ್ದು, 'ಪ್ಲ್ಯಾನೆಟ್ ಪೆಟ್ರೋಲ್' ಎಂಬ ವಿನೂತನ ಯೋಜನೆಯನ್ನು ಅನುಷ್ಠಾನಕ್ಕೆ ತಂದಿದೆ.

ಏನಿದು ಪ್ಲ್ಯಾನೆಟ್ ಪೆಟ್ರೋಲ್?:
ನಾಸಾದ ಪ್ಲ್ಯಾನೆಟ್ ಪೆಟ್ರೋಲ್ ಯೋಜನೆಯಂತೆ, ಸಾವರ್ಜನಿಕರು ಹಾಗೂ ವೃತ್ತಿಪರ ಖಗೋಳ ವಿಜ್ಞಾನಿಗಳ ಸಹಾಯದಿಂದ ಹೊಸ ಹೊಸ ಜಗತ್ತಿನ ಅನ್ವೇಷಣೆಗೆ ನಾಸಾ ಮುಂದಾಗಲಿದೆ.

2021ರಲ್ಲಿ ಬಾಹ್ಯಾಕಾಶಕ್ಕೆ ಲಗ್ಗೆ ಇಡಲಿರುವ ನಾಸಾದ ಟ್ರಾನ್ಸಿಟಿಂಗ್ ಎಕ್ಸೋಪ್ಲಾನೆಟ್ ಸರ್ವೆ ಸ್ಯಾಟಲೈಟ್ (ಟೆಸ್) ಸಂಗ್ರಹಿಸಿದ ಮಾಹಿತಿಗಳನ್ನು ಅಧ್ಯಯನಕ್ಕೆ ಗುರಿಪಡಿಸಿ ಖಗೋಳ ಅನ್ವೇಷಣೆಗಳನ್ನು ಕೈಗೊಳ್ಳುವುದು ನಾಸಾದ ಗುರಿ.

20 ಸಾವಿರ ವರ್ಷಗಳ ಹಿಂದೆ ಸ್ಫೋಟಗೊಂಡ ನಕ್ಷತ್ರದ ಬೆಳಕು ಸೆರೆಹಿಡಿದ ಹಬಲ್!

ಇದಕಕ್ಕಾಗಿ ಹವ್ಯಾಸಿ ಖಗೋಳ ವಿಜ್ಞಾನಿಗಳು ತಮ್ಮ ಪೂರಕ ಸಾಧನಗಳೊಂದಿಗೆ ಟೆಸ್ ಮಾಹಿತಿಗಳನ್ನು ಸಂಶೋಧಿಸಿ, ಬ್ರಹ್ಮಾಂಡದ ವಿಸ್ತಾರತೆಯ ಜ್ಞಾನ ವೃದ್ಧಿಸಿಕೊಳ್ಳಲು ಇದು ಸದಾವಕಾಶ ಎಂದು ನಾಸಾ ಹೇಳಿದೆ.

ಖಗೋಳಪ್ರಿಯರು ನಾಸಾದ ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡುವ ಮೂಲಕ ಹೆಚ್ಚಿನ ಮಾಹಿತಿ ಪಡೆಯಬಹುದಾಗಿದೆ.