ಕರಾಚಿ ಸ್ಟಾಕ್‌ ಎಕ್ಸ್‌ಚೆಂಜ್‌ ದಾಳಿಯ ಹಿಂದೆ ಭಾರತದ ಕೈವಾಡ: ಇಮ್ರಾನ್‌ ಖಾನ್‌ ಆರೋಪ

ಇಸ್ಲಮಾಬಾದ್‌ (ಪಾಕಿಸ್ತಾನ): ಸದಾ ಒಂದಿಲ್ಲೊಂದು ಕಾರಣಕ್ಕೆ ಭಾರತದ ಮೇಲೆ ಗೂಬೆ ಕೂರಿಸುವ ಪ್ರಯತ್ನ ಮಾಡುವ ಪಾಕಿಸ್ತಾನ ಪ್ರಧಾನಿ ಇಮ್ರಾನ್‌ ಖಾನ್‌, ಕರಾಚಿಯಲ್ಲಿನ ಸ್ಟಾಕ್‌ ಎಕ್ಸ್‌ಚೆಂಜ್‌ ಕೇಂದ್ರದ ಮೇಲೆ ಸೋಮವಾರ ನಡೆದ ದಾಳಿಯ ಹಿಂದೆ ಭಾರತದ ಕೈವಾಡ ಇದೆ ಎಂದು ಮಂಗಳವಾರ ಹೇಳಿದ್ದಾರೆ.

ಮಂಗಳವಾರ ಪಾಕ್‌ ಸಂಸತ್‌ನಲ್ಲಿ ಮಾತನಾಡಿದ ಇಮ್ರಾನ್‌ ಖಾನ್‌, ಕರಾಚಿಯ ದಾಳಿಯಲ್ಲಿ ಭಾರತದ ಕೈವಾಡ ಇರುವುದರ ಬಗ್ಗೆ ಯಾವುದೇ ಸಂದೇಹ ಉಳಿದಿಲ್ಲ. ಕಳೆದ ಎರಡು ತಿಂಗಳಿಂದ ದಾಳಿ ನಡೆಯುತ್ತದೆ ಎಂಬುದು ನನ್ನ ಸಚಿವ ಸಂಪುಟಕ್ಕೆ ಗೊತ್ತಿತ್ತು. ನನ್ನ ಮಂತ್ರಿಗಳಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದೆ. ನಮ್ಮ ಏಜೆನ್ಸಿಗಳಿಗೆಲ್ಲಾ ಹೈ ಅಲರ್ಟ್‌ ಸೂಚಿಸಿದ್ದೆ ಎಂದು ಹೇಳಿದ್ದಾರೆ.

ಸೋಮವಾರ ಬೆಳಗ್ಗೆ ಪಿಎಸ್‌ಎಕ್ಸ್‌ ಕಟ್ಟಡಕ್ಕೆ ನುಗ್ಗಿದ ಉಗ್ರರು ಗುಂಡಿನ ಮಳೆ ಸುರಿಸಿದ್ದರು. ದಾಳಿಯಲ್ಲಿ ನಾಲ್ವರು ಉಗ್ರರು, ಮೂವರು ಭದ್ರತಾ ಸಿಬ್ಬಂದಿ, ಓರ್ವ ಪೊಲೀಸ್‌ ಅಧಿಕಾರಿ ಸೇರಿ 10 ಜನ ಸಾವನ್ನಪ್ಪಿದ್ದರು. 2008ರ ಮುಂಬೈ ಮಾದರಿ ದಾಳಿಯನ್ನು ಉಗ್ರರು ಸಂಘಟಿಸಿರುವುದು ಬೆಳಕಿಗೆ ಬಂದಿತ್ತು.

ಪಾಕ್ ಸ್ಟಾಕ್ ಎಕ್ಸಚೇಂಜ್‌ನಲ್ಲಿ ಉಗ್ರರ ದಾಳಿ: ಗುಂಡಿನ ಮಳೆಗರೆದ ಭಯೋತ್ಪಾದಕರು!

ಉಗ್ರರು ಪೊಲೀಸ್ ಅಧಿಕಾರಿಗಳ ವೇಷದಲ್ಲಿ ಸ್ಟಾಕ್‌ ಎಕ್ಸ್‌ಚೆಂಜ್‌ ಪ್ರವೇಶಿಸಿದ್ದರು ಎಂದು ಹೇಳಲಾಗಿತ್ತು. ದಾಳಿಯ ಹೊಣೆಯನ್ನು ಬಲೂಚಿಸ್ತಾನ್‌ ಲಿಬರೇಶನ್‌ ಆರ್ಮಿ ಹೊತ್ತುಕೊಂಡಿತ್ತು.