ಜೆಲ್ ಹಾಕಿದ್ರೆ ರಾತ್ರೋರಾತ್ರಿ ಹಲ್ಲು ರಿಪೇರಿ: ಡೆಂಟಿಸ್ಟ್ ಸಹವಾಸವೇ ಬೇಡ!

ಬೀಜಿಂಗ್ (ಚೀನಾ): ನಿಮ್ಮ ಹಲ್ಲು ಹುಳುಕಾಗಿದೆಯೇ? ಕುಳಿ ಬಿದ್ದಿದೆಯೇ? ಬಣ್ಣ ಮಾಸಿ ಕರೆ ಕಟ್ಟಿದೆಯೇ? ಎಲ್ಲದಕ್ಕೂ ಒಂದೇ ಒಂದು ಹನಿ ಜೆಲ್ ಪರಿಹಾರ! ಹೌದು. ಅಂಥಾದ್ದೊಂದು ಅದ್ಭುತ ತಂತ್ರಜ್ಞಾನವನ್ನು ಚೀನಾ ಆವಿಷ್ಕರಿಸಿದೆ. ಚೀನಾದ ಷೆಜಿಯಾಂಗ್ ವಿಶ್ವವಿದ್ಯಾಲಯ ಅಭಿವೃದ್ಧಿಪಡಿಸಿರುವ ಈ ತಂತ್ರಜ್ಞಾನ, ದಂತವೈದ್ಯಕೀಯ ವಿಜ್ಞಾನದಲ್ಲಿ ಸಂಚಲನ ಮೂಡಿಸಲಿದೆ.

ಒಂದೇ ಒಂದು ಹನಿ ಜೆಲ್‌ ಹಾನಿಗೊಳಗಾದ ಹಲ್ಲುಗಳ ಮೇಲೆ ಬಿದ್ದರೆ 48 ಗಂಟೆಗಳಲ್ಲಿ ಎಲ್ಲ ಸಮಸ್ಯೆಗಳಿಗೂ ಪರಿಹಾರ ಸಿಗುತ್ತೆ ಅನ್ನೋದು ವಿಜ್ಞಾನ ಲೋಕದ ಅಚ್ಚರಿ ಎಂದೇ ಬಿಂಬಿತವಾಗಿದೆ. ಹಲ್ಲುಗಳ ನಡುವೆ ಆಹಾರ ಹಾಗೂ ಸಿಹಿ ಸಿಕ್ಕಿಬಿದ್ದರೆ ಸಹಜವಾಗಿಯೇ ಎನಾಮೆಲ್(ದಂತಕವಚ) ಹಾನಿಯಾಗುತ್ತದೆ. ನಿಧಾನವಾಗಿ ದಂತಕುಳಿ ಸೇರಿದಂತೆ ಇನ್ನಿತರ ಸಮಸ್ಯೆಗಳಿಗೆ ಕಾರಣವಾಗುತ್ತೆ.

ಈವರೆಗೂ ಹಲ್ಲುಗಳಲ್ಲಿ ತೂತುಗಳು ಬಿದ್ದಾಗ ಅದನ್ನು ಮುಚ್ಚಲು ಲೋಹ ಪದಾರ್ಥಗಳಿಂದ ತಯಾರಿಸಿದ ಜೆಲ್ ಬಳಸಲಾಗುತ್ತಿತ್ತು. ಆದರೆ ಈ ಜೆಲ್, ಕೆಲವು ವರ್ಷಗಳಲ್ಲಿ ಸವೆಯುತ್ತಿದ್ದವು ಅಥವಾ ಉದುರಿ ಬೀಳುತ್ತಿದ್ದವು. ಇದೀಗ ಆವಿಷ್ಕರಿಸಿರುವ ವಿನೂತನ ಜೆಲ್ ತುಂಬಾನೇ ಪರಿಣಾಮಕಾರಿಯಾಗಿದೆ.


ಕ್ಯಾಲ್ಶಿಯಂ ಹಾಗೂ ಫಾಸ್ಪೇಟ್‌ನಿಂದ ತಯಾರಿಸಲಾಗಿರುವ ವಿನೂತನ ಜೆಲ್, ನೇರವಾಗಿ ಹಲ್ಲುಗಳಿಗೆ ಸಿಂಪಡಿಸಬಹುದಾಗಿದೆ. ಈ ದ್ರಾವಣ ತಾನೇ ತಾನಾಗಿ ಹಲ್ಲುಗಳ ತೊಂದರೆಗಳನ್ನು ನಿವಾರಿಸುತ್ತೆ. ನೈಸರ್ಗಿಕ ದಂತಕವಚಗಳಲ್ಲಿ ಇರುವಂಥಾ ರಾಸಾಯನಿಕ ಸಂಯೋಜನೆಯೇ ಈ ಜೆಲ್‌ಗಳಲ್ಲೂ ಇವೆ.

ಹಲ್ಲುಗಳ ಮೇಲೆ ಸಿಂಪಡಿಸುವ ಜೆಲ್‌ನಿಂದ ತಾನೇ ತಾನಾಗಿ ಹೊಸ ದಂತಕವಚ ಸೃಷ್ಟಿಯಾಗುತ್ತೆ. ಈ ಎನಾಮೆಲ್ ಕೇವಲ 3 ಮೈಕ್ರೋ ಮೀಟರ್‌ನಷ್ಟು ದಪ್ಪ ಇರುತ್ತೆ. ಸಾಮಾನ್ಯ ದಂತಕವಚಗಳಿಗಿಂತಾ 400 ಪಟ್ಟು ತೆಳ್ಳಗಿರುತ್ತೆ. ಹೀಗಾಗಿ, ಮೇಲಿಂದ ಮೇಲೆ ಜೆಲ್ ಸಿಂಪಡಿಸಿ ಬಲಿಷ್ಟ ದಂತಕವಚವನ್ನು ನಿರ್ಮಿಸಬಹುದು ಅನ್ನುತ್ತಾರೆ ತಜ್ಞರು.

ಇದೀಗ ಮೊದಲ ಹಂತದ ಪರೀಕ್ಷೆಗಳು ಮುಗಿದಿದ್ದು, ಪರೀಕ್ಷೆಗೊಳಗಾದವರ ಹಲ್ಲುಗಳನ್ನು ಪರೀಕ್ಷಿಸುತ್ತಿದ್ದಾರೆ. ಹಲ್ಲುಗಳ ಎಲ್ಲಾ ರೀತಿಯ ಸಮಸ್ಯೆಗಳಿಗೂ ಈ ಜೆಲ್ ಮುಕ್ತಿ ಕೊಡುವ ಸಾಧ್ಯತೆ ಇದೆ. ಜೊತೆಯಲ್ಲೇ ಜೆಲ್ ಸಿಂಪಡಣೆಯಾದ ಕೆಲವೇ ಹೊತ್ತಿನಲ್ಲಿ ಜನರು ಎಂದಿನಂತೆ ಆಹಾರ ಸೇವನೆಯನ್ನೂ ಮಾಡಬಹುದಾಗಿದೆ. ಅದೇನೇ ಇರಲಿ, ದಂತ ಚಿಕಿತ್ಸೆ ವೇಳೆ ಎದುರಿಸಬೇಕಾದ ಭಯಾನಕ ನೋವು ನಿಂತರೆ ಅಷ್ಟೇ ಸಾಕು!
ವೈದ್ಯೆಯಾದರೂ ರೈಲ್ವೆ ಇಲಾಖೆಯಲ್ಲಿ ಜವಾನೆಯಾಗಿ ದುಡಿಯುತ್ತಿರುವ ಯುವತಿಯ ಕಥೆ!