ಶರೀಫ್‌ ತಾಯಿಯ ಆರೋಗ್ಯ ವಿಚಾರಿಸಿದ ಮೋದಿ

ಅಸ್ತಾನ: ಶಾಂಘೈ ಕೋ ಆಪರೇಷನ್‌ ಆರ್ಗನೈಸೇಷನ್‌ನಲ್ಲಿ ಭಾಗವಹಿಸಲಿರುವ ನಾಯಕರಿಗೆ ಅಸ್ತಾನ ಒಪೆರಾದಲ್ಲಿ ಆಯೋಜಿಸಿದ್ದ ಔತಣಕೂಟದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ಪಾಕ್‌ ಪಿಎಂ ನವಾಜ್‌ ಶರೀಫ್‌ ಭೇಟಿಯಾದ ವೇಳೆ ಔಪಚಾರಿಕವಾಗಿ ಶುಭಾಶಯ ವಿನಿಮಯ ಮಾಡಿಕೊಂಡರು.

ಉಭಯ ರಾಷ್ಟ್ರಗಳ ಮಧ್ಯೆ ಉದ್ವಿಗ್ನ ಸ್ಥಿತಿ ಇರುವ ಈ ಸಂದರ್ಭದಲ್ಲಿ ಇಬ್ಬರು ನಾಯಕರ ಭೇಟಿಯಲ್ಲಿ ಮಹತ್ವದ ಇಲ್ಲವೇ ರಾಜಕೀಯ ಮಾತುಕತೆ ನಡೆಯಲಿಲ್ಲ. ಆದರೆ ಪ್ರಧಾನಿ ಮೋದಿ ಅವರು ಶರೀಫ್‌ ಅವರ ತಾಯಿಯ ಆರೋಗ್ಯದ ಕುರಿತು ವಿಚಾರಿಸಿದರು. ಶರೀಫ್‌ ಅವರು ಸರ್ಜರಿಗೆ ಒಳಗಾದ ಬಳಿಕ ಮೋದಿ ಜತೆಗಿನ ಮೊದಲ ಭೇಟಿ ಇದಾಗಿದ್ದು, ಮೋದಿ ಶರೀಫ್‌ ಅವರ ಆರೋಗ್ಯದ ಬಗ್ಗೆಯೂ ಕೇಳಿದರು.

ಈ ಭೇಟಿ ವೇಳೆ ಭಾರತದ ಕಡೆಯಿಂದ ಇಲ್ಲವೇ ಪಾಕ್‌ ಕಡೆಯಿಂದ ಯಾವುದೇ ಮಾತುಕತೆ ನಡೆದಿಲ್ಲ.ಭಾರತವು ಪಾಕ್‌ಗೆ ಯಾವುದೇ ಮನವಿ ಮಾಡುವುದಿಲ್ಲ ಎಂಬ ನಿಲುವಿನಲ್ಲಿ ಬದಲಾವಣೆ ಮಾಡಿಕೊಳ್ಳದು ಎಂದು ವಿದೇಶ ವ್ಯವಹಾರಗಳ ವಕ್ತಾರ ಗೋಪಾಲ್‌ ಬಾಗ್ಲೆ ಹೇಳಿದ್ದಾರೆ.

ಗಡಿ ನಿಯಂತ್ರಣ ರೇಖೆಯಲ್ಲಿ ಭಾರತೀಯ ಯೋಧರ ಶಿರಚ್ಛೇಧ ಮತ್ತು ಕುಲಭೂಷಣ್‌ ಜಾಧವ್‌ಗೆ ಪಾಕ್‌ ಕೋರ್ಟ್‌ ಗಲ್ಲು ಪ್ರಕಟಿಸಿರುವ ವಿಚಾರಗಳಿಗೆ ಸಂಬಂಧಿಸಿದಂತೆ ಎರಡೂ ದೇಶಗಳ ಮಧ್ಯೆ ಸಂಬಂಧ ಹದಗೆಟ್ಟಿದೆ.

ಅಸ್ತಾನದಲ್ಲಿ ಶನಿವಾರ ನಡೆಯಲಿರುವ ಶಾಂಘೈ ಕೋ ಆಪರೇಷನ್‌ ಆರ್ಗನೈಸೇಷನ್‌ನಲ್ಲಿ ಪ್ರಧಾನಿ ಮೋದಿ ಭಾಗವಹಿಸುತ್ತಿದ್ದು, ಪಾಕ್‌ ಪ್ರತಿನಿಧಿಗಳು ಕೂಡ ಪಾಲ್ಗೊಳ್ಳುತ್ತಿದ್ದಾರೆ.