ಪ್ರನಾಳ ವಿಕಸನಕ್ಕಾಗಿ ಮೂವರಿಗೆ ರಸಾಯನಶಾಸ್ತ್ರ ನೊಬೆಲ್‌

ಸ್ಟಾಕ್‌ಹೋಮ್‌: ಡಾರ್ವಿನ್‌ನ ವಿಕಸನ ಸಿದ್ಧಾಂತವನ್ನು ಪ್ರನಾಳ ಶಿಶು ಅಭಿವೃದ್ಧಿಯಲ್ಲಿ (ಟೆಸ್ಟ್‌ ಟ್ಯೂಬ್‌) ಅನ್ವಯಿಸಿ ಮನುಕುಲ ಎದುರಿಸುತ್ತಿರುವ ಅನೇಕ ಅನುವಂಶೀಯ ವೈದ್ಯಕೀಯ ಸಮಸ್ಯೆಗಳ ಪರಿಹಾರಕ್ಕೆ ನೆರವಾದ ಸಂಶೋಧನೆಗಾಗಿ ಮೂವರು ವಿಜ್ಞಾನಿಗಳಿಗೆ 2018ನೇ ಸಾಲಿನ ರಸಾಯನಶಾಸ್ತ್ರ ನೊಬೆಲ್‌ ಪ್ರಶಸ್ತಿ ನೀಡಲಾಗಿದೆ.

ಅಮೆರಿಕದ ಫ್ರಾನ್ಸೆಸ್‌ ಅರ್ನಾಲ್ಡ್‌, ಜಾರ್ಜ್‌ ಸ್ಮಿತ್‌ ಹಾಗೂ ಬ್ರಿಟನ್‌ ಸಂಶೋಧಕ ಗ್ರೆಗೋರಿ ವಿಂಟರ್‌ ಅವರಿಗೆ ಜಂಟಿಯಾಗಿ ಪ್ರಶಸ್ತಿ ನೀಡಲಾಗಿದ್ದು, ಮೂವರ ನಡುವೆ ಸುಮಾರು 7.4 ಕೋಟಿ ರೂ. ಬಹುಮಾನ ಮೊತ್ತ ಹಂಚಿಕೆಯಾಗಿದೆ. ಫ್ರಾನ್ಸೆಸ್‌ ಅರ್ನಾಲ್ಡ್‌ ಅವರು ರಸಾಯನಶಾಸ್ತ್ರದಲ್ಲಿ ನೊಬೆಲ್‌ ಪಡೆದ ಐದನೇ ಮಹಿಳೆ ಎಂಬ ಹಿರಿಮೆಗೆ ಪಾತ್ರರಾದರು. ವಿಕಸನ ಸಿದ್ಧಾಂತ ಬಳಸಿಕೊಂಡು ಜೈವಿಕ ಕ್ಷೇತ್ರದಲ್ಲಿ ಅನುವಂಶೀಯ ಬದಲಾವಣೆ ಹಾಗೂ ಗುರುತಿಸುವಿಕೆ ಮೂಲಕ ಅಗತ್ಯ ಪ್ರೋಟೀನ್‌ ಅಭಿವೃದ್ಧಿಪಡಿಸುವುದು ಹೇಗೆ ಎಂಬುದನ್ನೂ ಈ ಮೂವರು ವಿಜ್ಞಾನಿಗಳು ತೋರಿಸಿಕೊಟ್ಟಿದ್ದಾರೆ.