ಕ್ಷಿಪಣಿ ಪ್ರಯೋಗ: ತನ್ನೂರನ್ನೇ ಸುಟ್ಟುಕೊಂಡ ಉ.ಕೊರಿಯಾ

ಲಂಡನ್: ಕಳೆದ ಹಲವು ದಿನಗಳಿಂದ ಯಾರ ಭಯವೂ ಇಲ್ಲದೇ ಕ್ಷಿಪಣಿ ಪರೀಕ್ಷಾ ಹಾರಾಟ ನಡೆಸಿ ಭೀತಿ ಮೂಡಿಸಿದ್ದ ಉತ್ತರ ಕೊರಿಯಾ ಇದೀಗ ಮತ್ತೊಂದು ಕ್ಷಿಪಣಿ ಉಡಾವಣೆ ನಡೆಸಿದೆ. ಆದರೆ ಭಸ್ಮಾಸುರನ ಮಾದರಿಯಲ್ಲಿ ತನ್ನ ಊರನ್ನೇ ಉ.ಕೊರಿಯಾ ಸುಟ್ಟು ಹಾಕಿದೆ. ಉತ್ತರ ಕೊರಿಯಾ ನಗರವೊಂದರ ಮೇಲೆ ಕ್ಷಿಪಣಿ ಬಿದ್ದು ಕೆಲಕಾಲ ಆತಂಕದ ವಾತಾವರಣ ನಿರ್ಮಾಣವಾಗಿತ್ತು.

ಅಮೆರಿಕ ಅಧಿಕಾರಿಗಳು ಪ್ರಕಾರ, ಉ.ಕೊರಿಯಾ ಹ್ವಸೋಂಗ್-12 ಕ್ಷಿಪಣಿಯನ್ನು ಉಡಾವಣೆ ಮಾಡಿದ್ದು, ತಾಂತ್ರಿಕಕ ದೋಷ ಕಾಣಿಸಿಕೊಂಡ ಪರಿಣಾಮ ಇದು ರಾಜಧಾನಿ ಪ್ಯೊಂಗ್ಯಾಂಗ್‌ನಿಂದ ಸುಮಾರು 90 ಮೈಲಿ ದೂರದಲ್ಲಿರುವ ಟಾಕ್ಚಾನ್ ನಗರಕ್ಕೆ ಅಪ್ಪಳಿಸಿದೆ ಎಂದು ಮಾಹಿತಿ ನೀಡಿದ್ದಾರೆ.

ಸುಮಾರು ಎರಡು ಲಕ್ಷ ಜನಸಂಖ್ಯೆ ಹೊಂದಿರುವ ಈ ಪ್ರದೇಶದಲ್ಲಿ ಮಿಸೈಲ್ ಅಪ್ಪಳಿಸಿದ ಪರಿಣಾಮ ಕೆಲ ಕಟ್ಟಡಗಳಿಗೆ ಹಾನಿಯಾಗಿದೆ. ಉಡಾವಣೆಗೊಂಡ ನಂತರ 24 ಮೈಲು ದೂರ ವಾಯುವ್ಯ ದಿಕ್ಕಿಗೆ ಕ್ರಮಿಸಿದ ಮಿಸೈಲ್ 43 ಮೈಲು ಎತ್ತರವೂ ಸಾಗಿರಲಿಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಘಟನೆಯಿಂದ ಸಾವುನೋವುಗಳ ಕುರಿತು ಇನ್ನೂ ಯಾವುದೇ ವರದಿಯಾಗಿಲ್ಲ, ಆದರೆ ಕಳೆದ ಹಳವು ದಿನಗಳಿಂದ ಜಪಾನ್‌ ಸುತ್ತ ಪ್ರದೇಶದ ಮೇಲೆ ಯಾವುದೇ ಮುನ್ನೆಚ್ಚರಿಕೆ ನೀಡದೆ ಉ.ಕೋರಿಯಾ ಕ್ಷಿಪಣಿ ಪ್ರಯೋಗ ಮಾಡಿದೆ.