ಅಮೆರಿಕ ಸಂಸತ್‌ ಪ್ರವೇಶಿಸಲು ಎನ್ನಾರೈ ಅರುಣಾ ಮಿಲ್ಲರ್‌ ಸಿದ್ಧತೆ

ವಾಷಿಂಗ್ಟನ್‌: ಭಾರತೀಯ ಮೂಲದ ಅಮೆರಿಕದ ಸಿವಿಲ್‌ ಎಂಜಿನಿಯರ್‌ ಅರುಣಾ ಮಿಲ್ಲರ್‌ ಅವರು ಅಮೆರಿಕ ಸಂಸತ್ತಿಗೆ ಆಯ್ಕೆಯಾಗುವ ನಿರೀಕ್ಷೆಗಳಿದ್ದು ಇದಕ್ಕೆ ಭರ್ಜರಿ ಪೂರ್ವ ತಯಾರಿ ನಡೆದಿದೆ.
53 ವರ್ಷದ ಹೈದರಾಬಾದ್‌ ಮೂಲದ ಅರುಣಾ ಅವರು ಅಮೆರಿಕ ಸಂಸತ್ತಿನ ಜನಪ್ರತಿನಿಧಿಗಳ ಸಭೆಗೆ ವಾಷಿಂಗ್ಟನ್‌ ಡಿಸಿ ಹೊರವಲಯದ ಮೇರಿಲ್ಯಾಂಡ್‌ನಿಂದ ಸ್ಪರ್ಧಿಸುತ್ತಿದ್ದು, ಒಂದೊಮ್ಮೆ ಅವರು ಈ ಚುನಾವಣೆಯಲ್ಲಿ ಗೆದ್ದರೆ ಅಮೆರಿಕ ಸಂಸತ್ತು ಪ್ರವೇಶಿಸುವ ಎರಡನೇ ಭಾರತೀಯ ಮಹಿಳೆ ಎನಿಸಿಕೊಳ್ಳಲಿದ್ದಾರೆ.

ಅರುಣಾ ಮಿಲ್ಲರ್‌ ಅವರು 7 ವರ್ಷದವರಾಗಿದ್ದ ವೇಳೆ 1972ರಲ್ಲಿ ಅವರ ಕುಟುಂಬ ಅಮೆರಿಕಕ್ಕೆ ವಲಸೆ ಬಂದಿತ್ತು. ಮೊದಲಿನಿಂದಲೂ ಸಮಾಜ ಸೇವೆಯಲ್ಲಿ ಆಸಕ್ತಿ ಬೆಳೆಸಿಕೊಂಡಿದ್ದ ಅವರು 2010ರಲ್ಲಿ ಮೇರಿಲ್ಯಾಂಡ್‌ ಹೌಸ್‌ ಆಫ್‌ ಡೆಲಿಗೇಟ್ಸ್‌ ಗೆ ಆಯ್ಕೆಯಾಗಿದ್ದರು. ಡೆಮಾಕ್ರಾಟಿಕ್‌ ಪಕ್ಷದ ಅಭ್ಯರ್ಥಿಯಾಗಿ ಮೇರಿಲ್ಯಾಂಡ್‌ ಕ್ಷೇತ್ರದಿಂದ ಸ್ಪರ್ಧಿಸಲು ತಯಾರಿ ನಡೆಸಿದ್ದು, ಜೂನ್‌ 26ರಂದು ನಡೆಯುವ ಪ್ರಾಥಮಿಕ ಚುನಾವಣೆಯಲ್ಲಿ ತಮ್ಮ ಪಕ್ಷದೊಳಗಿನ ನಾಲ್ವರು ಸ್ಪರ್ಧಿಗಳನ್ನು ಎದುರಿಸಬೇಕಿದೆ. ಡೆವಿಡ್‌ ಥ್ರೋನ್‌, ರೋಜರ್‌ ಮ್ಯಾನೋ, ಆ್ಯಂಡ್ರೂವ್‌ ಡಕ್‌, ನದಿಯಾ ಹಶಿಮಿ ಅವರು ಅರುಣಾ ಮಿಲ್ಲರ್‌ ಅವರಿಗಿರುವ ಪ್ರಬಲ ಎದುರಾಳಿಗಳು. ''ವೈವಿಧ್ಯತೆ ನಮ್ಮ ಸಮಸ್ಯೆಯಲ್ಲ, ಅದುವೇ ನಮ್ಮ ಶಕ್ತಿ ಹಾಗೂ ಭರವಸೆ,'' ಎನ್ನುವ ಅರುಣಾ ಅವರು ಪ್ರಾಥಮಿಕ ಚುನಾವಣೆಯಲ್ಲಿ ಗೆಲ್ಲುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.