ಪಾಕ್‌ ತೈಲ ಟ್ಯಾಂಕರ್‌ ಸ್ಪೋಟ: 149 ಮಂದಿ ಸಜೀವ ದಹನ

ಲಾಹೋರ್‌: ತೈಲ ಟ್ಯಾಂಕರ್‌ನಲ್ಲಿ ಉಂಟಾದ ಸೋರಿಕೆಯಿಂದ ಟ್ಯಾಂಕರ್‌ ಸ್ಪೋಟಗೊಂಡು 149ಕ್ಕೂ ಅಧಿಕ ಮಂದಿ ಮೃತಪಟ್ಟ ಘಟನೆ ಪಾಕಿಸ್ತಾನದ ಬಹವಾಲ್ಪುರ್‌ನಲ್ಲಿ ನಡೆದಿದೆ.

ಕರಾಚಿಯಿಂದ ಲಾಹೋರ್‌ಗೆ ತೆರಳುತ್ತಿದ್ದ ತೈಲ ಟ್ಯಾಂಕರ್‌ ಬಹವಾಲ್‌ಪುರ ಜಿಲ್ಲೆಯ ಅಹ್ಮದ್‌ಪುರ ಶರ್ಖಿಯಾ ಪ್ರದೇಶದಲ್ಲಿ ದುರಂತಕ್ಕೀಡಾಯಿತು. ಟ್ಯಾಂಕರ್‌ನ ಟೈರ್‌ ಸ್ಫೋಟಗೊಂಡು ಚಾಲಕನ ನಿಯಂತ್ರಣ ತಪ್ಪಿ ಉರುಳಿ ಬಿತ್ತು. ಆಗ ಟ್ಯಾಂಕರ್ ಒಡೆದು ತೈಲ ಸೋರಿಕೆ ಉಂಟಾಯಿತು. ಅದೇ ವೇಳೆಗೆ ಯಾರೋ ಸಿಗರೇಟ್‌ ಉರಿಸಿದಾಗ ಅಗ್ನಿದುರಂತ ಸಂಭವಿಸಿತು ಎಂದು ಅಧಿಕೃತ ಮೂಲಗಳು ಹೇಳಿವೆ.

ಸೋರಿದ ತೈಲಕ್ಕೆ ಬೆಂಕಿ ಹತ್ತಿಕೊಂಡು ಸುತ್ತಮುತ್ತಿನ ಮನೆಗಳು ಭಸ್ಮವಾದವು. ಘಟನೆಯಲ್ಲಿ 149 ಮಂದಿ ಸುಟ್ಟು ಕರಕಲಾದರು. ಇತರ 100ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ ಎಂದು ಮೂಲಗಳು ಹೇಳಿವೆ.

ಘಟನೆಯಲ್ಲಿ 12ಕ್ಕೂ ಅಧಿಕ ವಾಹನಗಳು ಬೆಂಕಿಗಾಹುತಿಯಾಗಿದ್ದು, ಸ್ಥಳಕ್ಕೆ ಅಗ್ನಿಶಾಮಕ ದಳ ಆಗಮಿಸಿದ್ದು ರಕ್ಷಣಾ ಕಾರ್ಯಕೈಗೊಂಡಿದೆ ಎಂದು ವರದಿಯಾಗಿದೆ.