ಪಾಕ್‌ ಉಗ್ರರಿಂದ ಭಾರತದ ಮೇಲೆ ದಾಳಿ?

ವಾಷಿಂಗ್ಟನ್‌: ಭಾರತ ಹಾಗೂ ಅಫಘಾನಿಸ್ತಾನದ ಮೇಲೆ ಪಾಕಿಸ್ತಾನ ಮೂಲದ ಉಗ್ರರು ದಾಳಿ ನಡೆಸುವ ಸಾಧ್ಯತೆಯಿದೆ ಎಂದು ಅಮೆರಿಕ ಗುಪ್ತಚರ ಇಲಾಖೆ ಹೇಳಿದೆ.

'ಪಾಕ್‌ ಸರಕಾರ ತನ್ನ ದೇಶದಲ್ಲಿರುವ ಉಗ್ರರನ್ನು ಮಣಿಸಲು ವಿಫಲವಾಗಿದ್ದು, ಇದನ್ನೇ ಬಂಡವಾಳವಾಗಿಸಿಕೊಂಡ ಅಲ್ಲಿನ ಉಗ್ರರು ಮುಂದಿನ ದಿನಗಳಲ್ಲಿ ಅಫಘಾನಿಸ್ತಾನ ಹಾಗೂ ಭಾರತದ ಮೇಲೆ ದಾಳಿ ನಡೆಸಲು ಸಂಚು ರೂಪಿಸಿದ್ದಾರೆ' ಎಂದು ಅಮೆರಿಕದ ಗುಪ್ತಚರ ಇಲಾಖೆಯ ಮುಖ್ಯಸ್ಥ ಡೇನಿಯಲ್‌ ಕೋಟ್ಸ್‌ ಹೇಳಿದ್ದಾರೆ.

ತನ್ನ ಅಣು ಶಕ್ತಿ ವೃದ್ಧಿಸಿ ಕೊಳ್ಳಲು ಪಾಕ್‌ ಇನ್ನಿಲ್ಲದ ಕಸರತ್ತು ನಡೆಸುತ್ತಿರುವ ನಡುವೆಯೂ ತನ್ನಲ್ಲಿರುವ ಶಕ್ತಿಯನ್ನು ಸಮರ್ಥವಾಗಿ ಬಳಸಿಕೊಳ್ಳಲು ವಿಫಲವಾಗಿದೆ ಎಂದು ಕೋಟ್ಸ್ ಹೇಳಿದ್ದಾರೆ.

ಅಫಘಾನಿಸ್ತಾನದ ಹಳ್ಳಿ ಪ್ರದೇಶಗಳಲ್ಲಿ ತಾಲಿಬಾನ್‌ ಉಗ್ರರು ಪಾರುಪತ್ಯ ಸಾಧಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಇದೇ ಅಲ್ಲಿನ ಸರಕಾರಕ್ಕೆ ಮುಳ್ಳಾಗಿ ಪರಿಣಮಿಸಬಹುದು. ತಾಲಿಬಾನ್‌ನ ದಾಳಿ ಸೇರಿದಂತೆ ಹಲವಾರು ವಿಚಾರಗಳಿಂದಾಗಿ ಆಫ್ಘನ್‌ ಮಿಲಿಟರಿ ಪಡೆ ತನ್ನ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತಿದೆ ಎಂದು ಕೋಟ್ಸ್‌ ಅಭಿಪ್ರಾಯ ಪಟ್ಟಿದ್ದಾರೆ.