ಕಾಶ್ಮೀರ ದ್ವಿಪಕ್ಷೀಯ ವಿಚಾರ, ಚೀನಾ ಸಹಾಯ ಪಡೆಯುತ್ತಿರುವ ಪಾಕ್‌ ನ ಕಿವಿ ಹಿಂಡಿದ ವಿಶ್ವಸಂಸ್ಥೆ

ವಿಶ್ವಸಂಸ್ಥೆ: ವಿಶ್ವಸಂಸ್ಥೆ ಭದ್ರತಾ ಮಂಡಳಿ (ಯುಎನ್‌ಸ್‌ಸಿ) ಕಾಯಂ ಸದಸ್ಯ ರಾಷ್ಟ್ರವಾಗಿರುವ ಚೀನಾದ ನೆರವಿನೊಂದಿಗೆ ಪದೇಪದೆ ಕಾಶ್ಮೀರ ವಿಚಾರವನ್ನು ಪ್ರಮುಖ ಸಭೆಗಳಲ್ಲಿ ಚರ್ಚಿಸಲು ಯತ್ನಿಸುವ ಪಾಕಿಸ್ತಾನಕ್ಕೆ ಮತ್ತೆ ಮುಖಭಂಗವಾಗಿದೆ.

ಬುಧವಾರ ನಡೆದ ಯುಎನ್‌ಎಸ್‌ಸಿ ಸಭೆಯಲ್ಲಿ ಪಾಕಿಸ್ತಾನದ ಪರವಾಗಿ ಕಾಶ್ಮೀರದ ವಿಚಾರದ ಚರ್ಚೆಗೆ ಚೀನಾ ಒತ್ತು ನೀಡಲು ಯತ್ನಿಸಿತು. ಕಾಶ್ಮೀರದಲ್ಲಿನ ಮಾನವ ಹಕ್ಕುಗಳ ಉಲ್ಲಂಘನೆ ಪ್ರಕರಣಗಳ ಚರ್ಚೆಯಾಗಬೇಕು ಎಂದು ಆಗ್ರಹಿಸಿತು. ಇದಕ್ಕೆ ಸಭೆಯಲ್ಲಿಇತರ ಯಾವುದೇ ಸದಸ್ಯ ರಾಷ್ಟ್ರಗಳು ಬೆಂಬಲ ವ್ಯಕ್ತಪಡಿಸಲಿಲ್ಲ. ಜತೆಗೆ ಕಾಶ್ಮೀರ ಕುರಿತು ಮತ್ತೊಮ್ಮೆ ನಿಲುವು ಸ್ಪಷ್ಟಪಡಿಸಿದ ಸದಸ್ಯ ರಾಷ್ಟ್ರಗಳು, ''ಅದು ಭಾರತ-ಪಾಕಿಸ್ತಾನದ ದ್ವಿಪಕ್ಷೀಯ ವಿಚಾರ. ಅದರಲ್ಲಿ ನಮ್ಮ ಹಸ್ತಕ್ಷೇಪ ಸಲ್ಲದು,'' ಎಂದು ಚೀನಾಕ್ಕೆ ತಿಳಿಸಿದವು.

''ವಿಶ್ವಸಂಸ್ಥೆ ಸದಸ್ಯ ರಾಷ್ಟ್ರವೊಂದು ಮತ್ತೆ ಮಾಡಿದ ಯತ್ನವನ್ನು ನೋಡಿದೆವು. ಆದರೆ ಇತರ ಎಲ್ಲಸದಸ್ಯರ ದೃಷ್ಟಿಯಿಂದ ಯತ್ನ ತಿರಸ್ಕೃತಗೊಂಡಿದ್ದನ್ನು ಕೂಡ ನೋಡಿದೆವು,'' ಎಂದು ವಿಶ್ವಸಂಸ್ಥೆಯಲ್ಲಿನ ಭಾರತದ ಪ್ರತಿನಿಧಿ ಸೈಯದ್‌ ಅಕ್ಬರುದ್ದೀನ್‌ ಪರೋಕ್ಷವಾಗಿ ಪಾಕ್‌ಗೆ ಕುಟುಕಿದ್ದಾರೆ. 370ನೇ ವಿಧಿ ರದ್ದತಿ ಬಳಿಕ ವಿಶ್ವಸಂಸ್ಥೆಯಲ್ಲಿಕಾಶ್ಮೀರ ವಿಚಾರ ಪ್ರಸ್ತಾಪಕ್ಕೆ ಚೀನಾ ಒತ್ತಡ ಹೇರಿದ ಮೂರನೇ ಸಂದರ್ಭ ಇದಾಗಿದೆ. ಫ್ರಾನ್ಸ್‌, ಅಮೆರಿಕ, ಬ್ರಿಟನ್‌ ಮತ್ತು ರಷ್ಯಾ ಪ್ರತಿ ಬಾರಿ ಚೀನಾದ ಯತ್ನವನ್ನು ವಿಫಲಗೊಳಿಸಿವೆ.