ಪಾಕ್ ಪ್ರಧಾನಿ, ಅಧ್ಯಕ್ಷರಿಗೆ ಫಸ್ಟ್ ಕ್ಲಾಸ್‌ ವಿಮಾನ ಟಿಕೆಟ್ ಬ್ಯಾನ್

ಇಸ್ಲಾಮಾಬಾದ್: ಸರಕಾರಿ ಖಜಾನೆಯಲ್ಲಿ ಹಣ ಉಳಿಸಲು ಪಾಕಿಸ್ತಾನದ ನೂತನ ಪ್ರಧಾನಿ ಇಮ್ರಾನ್ ಖಾನ್ ಹಲವು ಕ್ರಮಗಳನ್ನು ಕೈಗೊಂಡಿದ್ದಾರೆ. ಈ ನಿಟ್ಟಿನಲ್ಲಿ ಪಾಕ್ ಪ್ರಧಾನಿ, ಅಧ್ಯಕ್ಷರನ್ನು ಒಳಗೊಂಡಂತೆ ಎಲ್ಲ ಸರಕಾರಿ ಅಧಿಕಾರಿಗಳಿಗೂ ವಿಮಾನದಲ್ಲಿ ಫಸ್ಟ್ ಕ್ಲಾಸ್‌ ಟಿಕೆಟ್‌ಗಳನ್ನು ಬ್ಯಾನ್ ಮಾಡಿದ್ದಾರೆ. ಜತೆಗೆ, ಜನರ ತೆರಿಗೆ ಹಣವನ್ನು ತಮ್ಮ ವಿವೇಚನೆಗೆ ತಕ್ಕಂತೆ ಬಳಸುವುದನ್ನು ನಿಷೇಧಿಸಲಾಗಿದೆ.

ಪ್ರಧಾನಿ ಇಮ್ರಾನ್ ಖಾನ್ ನೇತೃತ್ವದಲ್ಲಿ ನಡೆದ ಸಂಪುಟ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಮಾಹಿತಿ ಸಚಿವ ಫವಾದ್ ಚೌಧರಿ ಹೇಳಿದ್ದಾರೆ. ಪ್ರಧಾನಿ, ಅಧ್ಯಕ್ಷ, ಮುಖ್ಯ ನ್ಯಾಯಮೂರ್ತಿ, ಸೆನೇಟ್ ಮುಖ್ಯಸ್ಥ, ರಾಷ್ಟ್ರೀಯ ಅಸೆಂಬ್ಲಿಯ ಸ್ಪೀಕರ್ ಹಾಗೂ ಮುಖ್ಯಮಂತ್ರಿಗಳು ಕೇವಲ ಕ್ಲಬ್ ಅಥವಾ ಬಿಸಿನೆಸ್ ಕ್ಲಾಸ್‌ನಲ್ಲಿ ಪ್ರಯಾಣ ಮಾಡಬೇಕು ಎಂದು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಇನ್ನು, ಪಾಕ್ ಸೇನಾ ಮುಖ್ಯಸ್ಥರಿಗೆ ಫಸ್ಟ್ ಕ್ಲಾಸ್‌ನಲ್ಲಿ ಪ್ರಯಾಣಿಸಲು ಅವಕಾಶವೇ ಇಲ್ಲ. ಮೊದಲಿನಿಂದಲೂ ಅವರು ಬಿಸಿನೆಸ್ ಕ್ಲಾಸ್‌ ಅನ್ನೇ ಬಳಸುತ್ತಿದ್ದಾರೆ ಎಂದೂ ಮಾಹಿತಿ ನೀಡಿದ್ದಾರೆ. ಅಲ್ಲದೆ, ಪ್ರಧಾನಿ, ಅಧ್ಯಕ್ಷ ಹಾಗೂ ಇತರ ಅಧಿಕಾರಿಗಳಿಗೆ ಜನರ ತೆರಿಗೆ ಹಣವನ್ನು ಬೇಕಾಬಿಟ್ಟಿ ಬಳಸುವ ಸಂಸ್ಕೃತಿಗೆ ಕ್ಯಾಬಿನೆಟ್‌ ಸಭೆಯಲ್ಲಿ ವಿದಾಯ ಹೇಳಲಾಗಿದೆ ಎಂದು ತಿಳಿಸಿದ್ದಾರೆ.

ಇನ್ನು, ಮಾಜಿ ಪ್ರಧಾನಿ ನವಾಜ್ ಷರೀಫ್ ಒಂದು ವರ್ಷಕ್ಕೆ 5100 ಕೋಟಿ ರೂ. ಸರಕಾರಿ ನಿಧಿಯನ್ನು ಬಳಸುತ್ತಿದ್ದರು ಎಂದು ಸಚಿವ ಚೌಧರಿ ಹೇಳಿಕೊಂಡಿದ್ದಾರೆ. ಇನ್ನು, ದೇಶೀಯ ಅಥವಾ ವಿದೇಶಕ್ಕೆ ಭೇಟಿ ನೀಡಲು ವಿಶೇಷ ವಿಮಾನಗಳನ್ನು ಬಳಸುವುದಕ್ಕೂ ನಿರ್ಬಂಧ ಹೇರಲಾಗಿದೆ. ಇದರ ಬದಲು ಬಿಸಿನೆಸ್ ಕ್ಲಾಸ್‌ನಲ್ಲೇ ಪ್ರಯಾಣ ಮಾಡಬೇಕು ಎಂದೂ ನಿರ್ಧಾರ ಮಾಡಲಾಗಿದೆ.

ಇನ್ನೊಂದೆಡೆ, ಜುಲೈ 25ರಂದು ಸಾರ್ವತ್ರಿಕ ಚುನಾವಣೆಯ ಬಳಿಕ ಇಮ್ರಾನ್ ಖಾನ್‌ ಪ್ರಧಾನಿಯ ಅಧಿಕೃತ ನಿವಾಸವನ್ನು ಬಳಸದೆ, ಈ ಹಿಂದೆ ಪ್ರಧಾನಿಯ ಮಿಲಿಟರಿ ಕಾರ್ಯದರ್ಶಿ ಬಳಸುತ್ತಿದ್ದ ನಿವಾಸದ ಚಿಕ್ಕ ಭಾಗವನ್ನು ಮಶಾತ್ರ ಅವರು ಆಯ್ಕೆ ಮಾಡಿಕೊಂಡಿದ್ದರು. ಜತೆಗೆ, ಕೇವಲ ಎರಡು ವಾಹನಗಳನ್ನು ಬಳಸಲು ಹಾಗೂ ಇಬ್ಬರು ಸೇವಕರನ್ನು ಮಾತ್ರ ಇಟ್ಟುಕೊಳ್ಳುವ ನಿರ್ಧಾರವನ್ನು ತೆಗೆದುಕೊಂಡಿದ್ದರು. ವಿಸ್ತಾರವಾದ ಅಧಿಕೃತ ಪ್ರೋಟೋಕಾಲ್‌ ಬಳಸಲು ಸಹ ಇಮ್ರಾನ್ ಖಾನ್ ನಿರಾಕರಿಸಿದ್ದಾರೆ.

ಅಲ್ಲದೆ, ವಾರಕ್ಕೆ 6 ದಿನ ಕೆಲಸದ ಅವಧಿಯನ್ನು ಮಾಡುವ ಬಗ್ಗೆ ಚರ್ಚೆ ನಡೆದರೂ ಸಹ ಅದಕ್ಕೆ ಕೆಲವು ಸಚಿವರು ವಿರೋಧ ವ್ಯಕ್ತಪಡಿಸಿದ ಕಾರಣ ವಾರದಲ್ಲಿ 5 ದಿನ ಮಾತ್ರ ಕೆಲಸ ಮಾಡುವ ಪದ್ಧತಿಯನ್ನು ಮುಂದುವರಿಸಲು ನಿರ್ಧರಿಸಿದ್ದಾರೆ. 2011ರಲ್ಲಿ ವಾರಕ್ಕೆ 5 ದಿನ ಕೆಲಸ ಮಾಡಲು ಪಾಕ್ ಸರಕಾರ ನಿರ್ಧರಿಸಿತ್ತು. ಜತೆಗೆ, ಪಂಜಾಬ್ ಹಾಗೂ ಖೈಬರ್ ಪಾಖ್‌ತುಂಖ್ವಾ ಪ್ರದೇಶದಲ್ಲಿ ಹಿಂದಿನ ಸರಕಾರ ಕೈಗೊಂಡಿದ್ದ ಮೆಗಾ ಸಾರಿಗೆ ಯೋಜನೆಯ ಬಗ್ಗೆ ಆಡಿಟ್ ಮಾಡಲು ಸಹ ಇಮ್ರಾನ್ ಖಾನ್ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ನಿರ್ಧರಿಸಲಾಗಿದೆ.