ಪಾಕಿಸ್ತಾನದ ಪಂಜಾಬ್‌ ಪ್ರಾಂತ್ಯದಲ್ಲಿ ಭೀಕರ ದುರಂತ: ಬಸ್‌ಗೆ ರೈಲು ಡಿಕ್ಕಿ, 19 ಸಿಖ್‌ ಯಾತ್ರಿಕರ ಸಾವು

ಲಾಹೋರ್‌ (ಪಾಕಿಸ್ತಾನ): ಸಿಖ್‌ ಯಾತ್ರಿಕರಿದ್ದ ಬಸ್‌ಗೆ ಪ್ಯಾಸೆಂಜರ್‌ ರೈಲೊಂದು ಡಿಕ್ಕಿ ಹೊಡೆದು 19 ಜನ ಮೃತಪಟ್ಟ ಘಟನೆ ಪಾಕಿಸ್ತಾನದ ಪಂಜಾಬ್‌ನಲ್ಲಿ ನಡೆದಿದೆ. ಅವಘಡದಲ್ಲಿ 8 ಜನ ಗಂಭೀರ ಗಾಯಗೊಂಡಿದ್ದು, ಗಾಯಾಳುಗಳನ್ನು ಹತ್ತಿರದ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಪಾಕಿಸ್ತಾನದ ಪಂಜಾಬ್‌ ಪ್ರಾಂತ್ಯದ ಶೇಖ್‌ಪುರ ಜಿಲ್ಲೆಯಲ್ಲಿ ಮಾನವರಹಿತ ರೈಲ್ವೆ ಕ್ರಾಸಿಂಗ್‌ನಲ್ಲಿ ಶುಕ್ರವಾರ ಮಧ್ಯಾಹ್ನ ಅವಘಡ ಸಂಭವಿಸಿದೆ. ಸಿಖ್‌ ಯಾತ್ರಿಕರನ್ನು ವಾಯುವ್ಯದಲ್ಲಿರುವ ಪೇಶಾವರ್‌ ನಗರದವರೆಂದು ಅಧಿಕಾರಿಗಳು ಗುರುತಿಸಿದ್ದಾರೆ.


ಶೇಖ್‌ಪುರದಲ್ಲಿನ ನಂಕನ್‌ ಸಾಹೇಬ್‌ ಯಾತ್ರಾ ಸ್ಥಳಕ್ಕೆ ತೆರಳಿ ವಾಪಸ್‌ ಮರಳುತ್ತಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕರಾಚಿ ಬೌಂಡ್‌ ಶಾ ಹುಸೇನ್‌ ಎಕ್ಸ್‌ಪ್ರೆಸ್‌ ರೈಲು ಬಸ್‌ಗೆ ಡಿಕ್ಕಿ ಹೊಡೆದಿದೆ. ಬಸ್‌ನಲ್ಲಿ‌ 27 ಜನ ಇದ್ದರು ಎಂದು ಪೊಲೀಸರು ಹೇಳಿದ್ದಾರೆ. ಅದರಲ್ಲಿ 19 ಜನ ಮೃತಪಟ್ಟಿದ್ದು, 8 ಜನ ಗಾಯಗೊಂಡಿದ್ದಾರೆ.