ಕರ್ತಾರ್‌ಪುರ ಕಾಮಗಾರಿ ಮುಗಿಸಿದ ಪಾಕ್‌

ಇಸ್ಲಾಮಾಬಾದ್‌: ಭಾರತದ ಗುರುದಾಸ್‌ಪುರ ಜಿಲ್ಲೆಯ ಡೇರಾ ಬಾಬಾ ನಾನಕ್‌ ಕ್ಷೇತ್ರದಿಂದ ಕರ್ತಾರ್‌ಪುರ ದರ್ಬಾರ್‌ ಸಾಹಿಬ್‌ ಗುರುದ್ವಾರಕ್ಕೆ ಸಂಪರ್ಕ ಕಲ್ಪಿಸುವ ಕರ್ತಾರ್‌ಪುರ ಕಾರಿಡಾರ್‌ ನಿರ್ಮಾಣ ಯೋಜನೆಯ ತನ್ನ ಪಾಲಿನ ಶೇ.90ರಷ್ಟು ಕಾಮಗಾರಿಯನ್ನು ಪೂರ್ಣಗೊಳಿಸಿರುವುದಾಗಿ ಪಾಕಿಸ್ತಾನ ಸರಕಾರ ಹೇಳಿಕೊಂಡಿದೆ.

ಗಡಿ ಬಳಿ ರಸ್ತೆ, ಸೇತುವೆ, ಕಟ್ಟಡಗಳ ನಿರ್ಮಾಣವನ್ನು ಬಹುತೇಕ ಪೂರ್ಣಗೊಳಿಸಲಾಗಿದೆ. ನವೆಂಬರ್‌ನಲ್ಲಿ ನಡೆಯುವ ಗುರು ನಾನಕ್‌ ಅವರ 550ನೇ ಜನ್ಮದಿನಾಚರಣೆ ವೇಳೆಗೆ ಕಾರಿಡಾರ್‌ ಯೋಜನೆ ಪೂರ್ಣಗೊಂಡು ಉದ್ಘಾಟನೆಗೊಳ್ಳಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಭಾರತದಿಂದ ಮೊದಲ ತಂಡದ ಯಾತ್ರಿಕರು ನವೆಂಬರ್‌ 9ಕ್ಕೆ ಆಗಮಿಸುವ ನಿರೀಕ್ಷೆ ಇದೆ.

ಸಿಖ್‌ ಯಾತ್ರಿಕರಿಗೆ ವೀಸಾ ರಹಿತವಾಗಿ ಗುರು ನಾನಕರ ಎರಡು ಪುಣ್ಯಕ್ಷೇತ್ರಗಳ ದರ್ಶನ ಕಲ್ಪಿಸುವ ಉದ್ದೇಶದಿಂದ ಭಾರತ-ಪಾಕ್‌ ಜಂಟಿಯಾಗಿ ಕಾರಿಡಾರ್‌ ಯೋಜನೆಯಲ್ಲಿ ತೊಡಗಿಕೊಂಡಿವೆ. ಅಟ್ಟಾರಿ ಗಡಿಯಿಂದ ಕರ್ತಾರ್‌ಪುರದಲ್ಲಿರುವ ಗುರುದ್ವಾರದವರೆಗೆ ಮೂಲಭೂತ ಸೌಕರ್ಯವನ್ನು ಪಾಕ್‌ ಸರಕಾರ ನಿರ್ಮಿಸುತ್ತಿದೆ. ಭಾರತ ಸರಕಾರ ತನ್ನ ಗಡಿಯಿಂದ ಗುರುದಾಸ್‌ಪುರವರೆಗೆ ಸೌಕರ್ಯ ಕಲ್ಪಿಸುತ್ತಿದೆ. ಪಾಕ್‌-ಭಾರತ ಗಡಿಯಿಂದ ನಾಲ್ಕು ಕಿ.ಮೀ. ದೂರದಲ್ಲಿ ಸಿಖ್‌ ಧರ್ಮಗುರು ಗುರು ನಾನಕರ ಐಕ್ಯಸ್ಥಳ ಎನ್ನಲಾದ ದರ್ಬಾರ್‌ ಸಾಹಿಬ್‌ ಗುರುದ್ವಾರ ಇದೆ.