ಪಾಕ್‌ ವಿದೇಶಾಂಗ ಸಚಿವಾಲಯ, ಸೇನೆಯ ವೆಬ್‌ಸೈಟ್‌ ಹ್ಯಾಕ್‌

ಹೊಸದಿಲ್ಲಿ: ಪಾಕಿಸ್ತಾನ ವಿದೇಶಾಂಗ ವ್ಯವಹಾರ ಸಚಿವಾಲಯ ಮತ್ತು ಸೇನೆಯ ಅಧಿಕೃತ ವೆಬ್‌ಸೈಟ್‌ ಶನಿವಾರ ರಾತ್ರಿ ಹ್ಯಾಕ್‌ ಆಗಿದೆ. ಪುಲ್ವಾಮಾ ದಾಳಿಯ ಎರಡು ದಿನಗಳ ನಂತರ ಈ ಕೃತ್ಯ ನಡೆದಿರುವುದರಿಂದ ಇದಕ್ಕೆ ಪಾಕಿಸ್ತಾನ ಭಾರತದತ್ತ ಬೊಟ್ಟು ಮಾಡುತ್ತಿದೆ.

''ಆಸ್ಪ್ರೇಲಿಯಾ, ಸೌದಿ ಅರೇಬಿಯಾ, ಬ್ರಿಟನ್‌ ಮತ್ತು ನೆದರ್‌ಲ್ಯಾಂಡ್‌ ರಾಷ್ಟ್ರಗಳ ಬಳಕೆದಾರರು ಪಾಕ್‌ ವಿದೇಶಾಂಗ ವ್ಯವಹಾರ ಸಚಿವಾಲಯ ಮತ್ತು ಸೇನೆಯ ವೆಬ್‌ಸೈಟ್‌ ಬಳಸಲು ಸಾಧ್ಯವಾಗುತ್ತಿಲ್ಲ. ಈ ಸಮಸ್ಯೆಯನ್ನು ಸರಿಪಡಿಸಲು ಐಟಿ ತಂಡ ಶ್ರಮಿಸುತ್ತಿದೆ,'' ಎಂದು ಪಾಕ್‌ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಮೊಹಮ್ಮದ್‌ ಫೈಸಲ್‌ ತಿಳಿಸಿದ್ದಾರೆ.

''ಭಾರತ ಮೂಲದ ಹ್ಯಾಕರ್‌ಗಳು ಈ ಸೈಬರ್‌ ದಾಳಿ ನಡೆಸಿದ್ದಾರೆ ಎಂದು ಪಾಕಿಸ್ತಾನ ಭಾವಿಸಿದೆ,'' ಎಂದು ಡಾನ್‌ ಪತ್ರಿಕೆ ವರದಿ ಮಾಡಿದೆ.

2017ರ ಜೂನ್‌ನಲ್ಲಿ ಭಾರತದ ಹ್ಯಾಕರ್‌ಗಳ ಒಂದು ತಂಡ ಪಾಕಿಸ್ತಾನ ಪೀಪಲ್ಸ್‌ ಪಾರ್ಟಿ(ಪಿಪಿಪಿ)ಯ ಅಧಿಕೃತ ವೆಬ್‌ಸೈಟ್‌ ಅನ್ನು ಹ್ಯಾಕ್‌ ಮಾಡಿತ್ತು. ಅದೇ ವರ್ಷ ಕರಾಚಿ ಪೊಲೀಸ್‌ ವೆಬ್‌ಸೈಟ್‌ ಅನ್ನು ಭಾರತದ ಮೂಲದವರು ಹ್ಯಾಕ್‌ ಮಾಡಿದ್ದರು ಎಂದು ಪತ್ರಿಕೆಯಲ್ಲಿ ಆರೋಪಿಸಲಾಗಿದೆ.