ಪಾಕ್‌ ವೆಬ್‌ಸೈಟ್‌ ಹ್ಯಾಕ್‌: ಮೊಳಗಿದ ಜನ ಗಣ ಮನ

ಇಸ್ಲಾಮಾಬಾದ್‌: ಪಾಕಿಸ್ತಾನಕ್ಕೆ ಅಪರಿಚಿತ ಹ್ಯಾಕರ್‌ಗಳಿಂದ ಭಾರೀ ಮುಖಭಂಗವಾಗಿದ್ದು, ಸರಕಾರದ ಅಧಿಕೃತ ವೆಬ್‌ಸೈಟ್‌ನ್ನು ಹ್ಯಾಕ್‌ ಮಾಡಿ ಭಾರತದ ರಾಷ್ಟ್ರಗೀತೆಯನ್ನು ಪೋಸ್ಟ್‌ ಮಾಡಿದ್ದಾರೆ.

ಹ್ಯಾಕರ್‌ಗಳು ಪಾಕಿಸ್ತಾನದ ವೆಬ್ ಸೈಟ್ ನಲ್ಲಿ ಭಾರತದ ರಾಷ್ಟ್ರಗೀತೆ ಮತ್ತು ಸ್ವಾತಂತ್ರ್ಯೋತ್ಸವದ ಶುಭಾಶಯಗಳನ್ನು ಪೋಸ್ಟ್ ಮಾಡಿದ್ದಾರೆ.

www.pakistan.gov.pk ಎಂಬ ಪಾಕ್‌ ಸರಕಾರದ ಅಧಿಕೃತ ವೆಬ್‌ಸೈಟ್‌ನ್ನು ಹ್ಯಾಕ್‌ ಮಾಡಿರುವ ಅಪರಿಚಿತ ಹ್ಯಾಕರ್‌ಗಳ ಗುಂಪು, ಭಾರತದ ರಾಷ್ಟ್ರಗೀತೆ ಪ್ರಸಾರ ಮಾಡಿ ಆಗಸ್ಟ್ 15ರ ಶುಭಾಶಯವನ್ನು ಪ್ರಕಟಿಸಿದ್ದರು. Ne0-h4ck3r ಎಂಬ ಹೆಸರಿನ ಗುಂಪು ಹ್ಯಾಕ್‌ ಮಾಡಿದ್ದು ಅಶೋಕ ಚಕ್ರವಿರುವ ಚಿತ್ರದಡಿ ' ಮನಸ್ಸಿನಲ್ಲಿ ಸ್ವಾತಂತ್ರ್ಯ, ಮಾತುಗಳಲ್ಲಿ ನಂಬಿಕೆ, ಪರಿಶುದ್ಧತೆಯ ಆತ್ಮ, ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಈ ಎಲ್ಲಾ ಮಹಾನ್‌ ಮಹಾನ್ ವ್ಯಕ್ತಿಗಳಿಗೆ ಸಲ್ಯೂಟ್' ಎಂಬ ಸಂದೇಶವನ್ನೂ ಪೋಸ್ಟ್‌ನಲ್ಲಿ ಹಾಕಿದ್ದಾರೆ.

ಇಷ್ಟೆಲ್ಲಾ ಬೆಳವಣಿಗೆ ನಡೆಯುತ್ತಿದ್ದರೂ ಪಾಕ್‌ನ ಅಧಿಕಾರಿಗಳು ಮಾತ್ರ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ. ಅದೇನೆ ಇರಲಿ ಈ ದಾಳಿಯಿಂದ ಪಾಕಿಸ್ತಾನದಲ್ಲಿ ಸೈಬರ್ ಭದ್ರತೆ ಇಲ್ಲ ಎನ್ನುವುದು ಸಾಭೀತಾಗಿದೆ.