ಪರ್ವೇಜ್ ಮುಷರಫ್‌‌ ಪಾಕ್ ನೆಲದ ನಂಟೇ ಮುಟ್ಟುಗೋಲು

ಇಸ್ಲಾಮಾಬಾದ್‌: ಪಾಕಿಸ್ತಾನದ ಮಾಜಿ ಅಧ್ಯಕ್ಷ ಪರ್ವೇಜ್‌ ಮುಷರಫ್‌ ಅವರ ರಾಷ್ಟ್ರೀಯ ಗುರುತಿನ ಚೀಟಿ (ಎನ್‌ಐಸಿ) ಮತ್ತು ಪಾಸ್‌ಪೋಟ್‌ ಅನ್ನು ಅಲ್ಲಿನ ಸರಕಾರ ಮುಟ್ಟುಗೋಲು ಹಾಕಿದೆ.

ದೇಶದ್ರೋಹದ ಗಂಭೀರ ಪ್ರಕರಣದಲ್ಲಿ ವಿಚಾರಣೆಗೆ ಹಾಜರಾಗದೇ ತಪ್ಪಿಸಿಕೊಳ್ಳುತ್ತ ಬಂದಿರುವ ಮುಷರಫ್‌ ವಿರುದ್ಧ ಪಾಕ್‌ ವಿಶೇಷ ನ್ಯಾಯಾಲಯವು ಈ ಕಠಿಣ ಕ್ರಮಕ್ಕೆ ಆದೇಶ ನೀಡಿತ್ತು. ಮಾಜಿ ಅಧ್ಯಕ್ಷ ಮುಷರಫ್‌ಗೆ ನೀಡಲಾಗಿದ್ದ ಹಲವು ಸವಲತ್ತುಗಳು ಕೂಡ ರದ್ದುಗೊಂಡಿವೆ.

ಕೋರ್ಟ್‌ ಆದೇಶ ಮನ್ನಿಸಿ ಸರಕಾರ ಕೈಗೊಂಡಿರುವ ಕ್ರಮಗಳಿಂದ ಮುಷರಫ್‌ ತೀವ್ರ ಇಕ್ಕಟ್ಟಿಗೆ ಸಿಲುಕಿದ್ದಾರೆ. ಅವರ ವಿದೇಶಿ ಪ್ರವಾಸಕ್ಕೆ ಕತ್ತರಿ ಬಿದ್ದಿದೆ. ಜತೆಗೆ ಬ್ಯಾಂಕ್‌ ವ್ಯವಹಾರಕ್ಕೂ ತಡೆ ವಿಧಿಸಲಾಗಿದೆ.

‘ದೇಶ-ವಿದೇಶಗಳಲ್ಲಿ ಅವರು ನಡೆಸಬಹುದಾದ ಆಸ್ತಿ ಖರೀದಿ ಅಥವಾ ಮಾರಾಟದಂತಹ ವಹಿವಾಟಿಗೂ ನಿರ್ಬಂಧ ವಿಧಿಸಲಾಗಿದೆ,’ ಎಂದು ಎಕ್ಸ್‌ಪ್ರೆಸ್‌ ಟ್ರಿಬ್ಯೂನ್‌ ಪತ್ರಿಕೆ ವರದಿ ಮಾಡಿದೆ.

2007ರಲ್ಲಿ ತುರ್ತು ಪರಿಸ್ಥಿತಿ ಘೋಷಿಸುವ ಮೂಲಕ ದೇಶದ್ರೋಹದ ಗಂಭೀರ ಆರೋಪಕ್ಕೆ ಗುರಿಯಾಗಿರುವ ‘ಘೋಷಿತ ಅಪರಾಧಿ’ ಮುಷರಫ್‌, ಈಗ ಅಡಿಗಡಿಗೂ ಕಾನೂನು ತೊಡಕುಗಳನ್ನು ಎದುರಿಸಬೇಕಾಗಿದೆ. ವಿಚಾರಣೆ ಮುಗಿಯುವವರೆಗೆ ಅವರ ಎಲ್ಲ ಸ್ವತ್ತುಗಳನ್ನು ಮುಟ್ಟುಗೋಲು ಹಾಕುವಂತೆ ಕೋರ್ಟ್‌, ಅಲ್ಲಿನ ಸರಕಾರಕ್ಕೆ ನಿರ್ದೇಶನ ನೀಡಿದೆ.

ಸದ್ಯ ದುಬೈನಲ್ಲಿ ಆಶ್ರಯ ಪಡೆದಿರುವ ಮುಷರಫ್‌ ವಿರುದ್ಧ ಪಾಕಿಸ್ತಾನದಲ್ಲಿ ಅನೇಕ ಕ್ರಿಮಿನಲ್‌ ಪ್ರಕರಣಗಳು ದಾಖಲಾಗಿವೆ. ಗಂಭೀರ ದೇಶದ್ರೋಹ ಪ್ರಕರಣದಲ್ಲಿ ಅವರ ವಿರುದ್ಧ ಗಲ್ಲುಶಿಕ್ಷೆ ವಿಧಿಸುವ ಸಾಧ್ಯತೆ ಕೂಡ ಇದೆ ಎಂದು ಮೂಲಗಳು ತಿಳಿಸಿವೆ.