ಅಕ್ರಮ ಹಣಕಾಸು ವರ್ಗಾವಣೆ ಪ್ರಕರಣದಲ್ಲಿ ಪಾಕ್‌ ವಿರೋಧ ಪಕ್ಷದ ನಾಯಕನ ಬಂಧನ

ಲಾಹೋರ್‌: ಪಾಕಿಸ್ತಾನ ವಿರೋಧ ಪಕ್ಷದ ನಾಯಕ ಹಾಗೂ ಪಿಎಂಎಲ್‌-ಎನ್‌ ಅಧ್ಯಕ್ಷ ಶಹಬಾಜ್‌ ಷರೀಫ್‌ರನ್ನು ‘ಎನ್‌ಎಬಿ’ ಪೊಲೀಸರು ಸೋಮವಾರ ಬಂಧಿಸಿದ್ದಾರೆ.

700 ಕೋಟಿ ರೂಪಾಯಿ ಅಕ್ರಮ ಹಣಕಾಸು ವರ್ಗಾವಣೆ ಪ್ರಕರಣದಲ್ಲಿ ಅವರ ನಿರೀಕ್ಷಣಾ ಜಾಮೀನು ಅರ್ಜಿಯನ್ನು ಲಾಹೋರ್‌ ಹೈಕೋರ್ಟ್‌ ತಿರಸ್ಕರಿಸಿದ ಬೆನ್ನಿಗೆ ಅವರನ್ನು ನ್ಯಾಷನಲ್‌ ಅಕೌಂಟೇಬಿಲಿಟಿ ಬ್ಯೂರೋ (ಎನ್‌ಎಬಿ) ಪೊಲೀಸರು ಬಂಧಿಸಿದ್ದಾರೆ. ಶಹಬಾಜ್‌ ಷರೀಫ್‌ ಮಾಜಿ ಪ್ರಧಾನಿ ನವಾಜ್‌ ಷರೀಫ್‌ ಸಹೋದರರಾಗಿದ್ದು, ಈ ಹಿಂದೆ 2008 ರಿಂದ 2018ರವರೆಗೆ ಪಾಕಿಸ್ತಾನದ ಅತೀ ದೊಡ್ಡ ಪ್ರಾಂತ್ಯ ಪಂಜಾಬ್‌ನ ಮುಖ್ಯಮಂತ್ರಿಯಾಗಿದ್ದರು.

ಕಳೆದ ವಾರವಷ್ಟೆ ಪಾಕಿಸ್ತಾನದ ವಿರೋಧ ಪಕ್ಷಗಳು ಒಗ್ಗಟ್ಟಾಗಿ ಇಮ್ರಾನ್‌ ಖಾನ್‌ ಸರಕಾರವನ್ನು ಕಿತ್ತೊಗೆಯಲು ದೇಶಾದ್ಯಂತ ಹೋರಾಟ ಆರಂಭಿಸಲು ನಿರ್ಧರಿಸಿದ್ದವು. ಇದಾದ ಬೆನ್ನಿಗೆ ಶಹಬಾಜ್‌ ಷರೀಫ್‌ ಬಂಧನವಾಗಿದೆ.

ನ್ಯಾಯಾಲಯಕ್ಕೆ ಬಂದಿದ್ದ 69 ವರ್ಷದ ಷರೀಫ್‌ರನ್ನು ಅಲ್ಲೇ ಬಂಧಿಸಲಾಗಿದ್ದು, ಲಾಹೋರ್‌ ಬಂಧನ ಕೇಂದ್ರಕ್ಕೆ ಕರೆದೊಯ್ಯಲಾಗಿದೆ. ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿ ವಶಕ್ಕೆ ಪಡೆಯುವುದಾಗಿ ಎನ್‌ಎಬಿ ಹೇಳಿದೆ.

ಕಳೆದ ವಾರವಷ್ಟೆ ಇಮ್ರಾನ್‌ ಖಾನ್‌ ಸರಕಾರ ಶಹಬಾಜ್‌ ಷರೀಪ್‌ ವಿರುದ್ಧ ಅಕ್ರಮ ಹಣಕಾಸು ವರ್ಗಾವಣೆ ಪ್ರಕರಣ ದಾಖಲಿಸಿತ್ತು. ಇದಾದ ಬಳಿಕ ಎನ್‌ಎಬಿ ತನಿಖೆ ಆರಂಭಿಸಿತ್ತು ಈ ವೇಳೆ ಶೆಹಬಾಜ್‌ ಷರೀಫ್‌ ಕುಟುಂಬಕ್ಕೆ ಸೇರಿದ 177 ಸಂಶಯಾಸ್ಪದ ಹಣಕಾಸು ವರ್ಗಾವಣೆ ಪ್ರಕರಣಗಳು ಪತ್ತೆಯಾಗಿದ್ದವು.

ಪಕ್ಷದ ಟಿಕೆಟ್‌ ಮತ್ತು ತಮ್ಮ ಆಪ್ತರಿಗೆ ನೀಡಿದ ಸರಕಾರಿ ಯೋಜನೆಗಳಲ್ಲಿ ಕಿಕ್‌ಬ್ಯಾಕ್‌ ಪಡೆಯಲಾಗಿದೆ ಎಂಬ ಆರೋಪ ಅವರ ಮೇಲಿದೆ.