ಲಂಡನ್‌ನಿಂದ ನವಾಜ್ ಷರೀಫ್‌‌ ಗಡೀಪಾರಿಗೆ ಪಾಕಿಸ್ತಾನದಿಂದ 3ನೇ ಬಾರಿ ಮನವಿ

ಇಸ್ಲಾಮಾಬಾದ್‌: ಭ್ರಷ್ಟಾಚಾರ ಪ್ರಕರಣದಲ್ಲಿ ಜೈಲು ಶಿಕ್ಷೆಗೆ ಗುರಿಯಾಗಿರುವ ಪಾಕ್‌ ಮಾಜಿ ಪ್ರಧಾನಿ ನವಾಜ್‌ ಷರೀಫ್‌ ಅವರನ್ನು ಲಂಡನ್‌ನಿಂದ ಗಡೀಪಾರು ಮಾಡಬೇಕೆಂದು ಇಮ್ರಾನ್‌ ಖಾನ್‌ ನೇತೃತ್ವದ ಸರಕಾರ ಬ್ರಿಟನ್‌ ಸರಕಾರಕ್ಕೆ ಮನವಿ ಮಾಡಿದೆ. ಹೀಗೆ ಮನವಿ ಮಾಡುತ್ತಿರುವುದು ಇದು ಮೂರನೇ ಸಲ.

ಇಮ್ರಾನ್‌ ಖಾನ್‌ ಸರಕಾರದ ಮನವಿ ಪತ್ರವನ್ನು ಬ್ರಿಟನ್‌ನಲ್ಲಿನ ಪಾಕ್‌ ರಾಯಭಾರಿ ಖುದ್ದಾಗಿ ಬ್ರಿಟನ್‌ ವಿದೇಶಾಂಗ ಆಯುಕ್ತರಿಗೆ ನೀಡಿದ್ದಾರೆ. ‘‘ಕಳೆದ ನವೆಂಬರ್‌ನಿಂದಲೂ ವೈದ್ಯಕೀಯ ಚಿಕಿತ್ಸೆ ಅಡಿಯಲ್ಲಿ ನವಾಜ್‌ ಅವರಿಗೆ ಲಂಡನ್‌ನಲ್ಲಿ ವಾಸಕ್ಕೆ ಅವಕಾಶ ಮಾಡಿಕೊಡಲಾಗಿದೆ. ಈ ವೀಸಾವನ್ನು ಕೂಡಲೇ ರದ್ದುಗೊಳಿಸಬೇಕು. ನಾಲ್ಕು ವರ್ಷಕ್ಕಿಂತ ಹೆಚ್ಚಿನ ಜೈಲು ಶಿಕ್ಷೆಗೆ ಗುರಿಯಾಗಿರುವ ಅಪರಾಧಿಯನ್ನು ಅವರ ಮೂಲ ದೇಶಕ್ಕೆ ಗಡೀಪಾರು ಮಾಡಬೇಕು ಎಂಬುದಾಗಿ 1974ರ ಬ್ರಿಟನ್‌ನ ವಲಸೆ ಕಾನೂನು ಕೂಡ ಹೇಳುತ್ತದೆ," ಎಂದು ಪಾಕ್‌ ಸರಕಾರ ತನ್ನ ಮನವಿ ಪತ್ರದಲ್ಲಿ ಉಲ್ಲೇಖಿಸಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ಅವರ ಆಂತರಿಕ ವಿಚಾರಗಳ ಸಲಹೆಗಾರ ಶೆಹಜಾದ್‌ ಅಕ್ಬರ್‌ ಅವರು, "ಕಳೆದ ತಿಂಗಳು ಇಸ್ಲಾಮಾಬಾದ್‌ ಹೈಕೋರ್ಟ್‌ ಷರೀಫ್‌ ಅವರ ಜಾಮೀನು ಅರ್ಜಿಯನ್ನು ತಿರಸ್ಕರಿಸಿತ್ತು. ಅದರ ಬಳಿಕ ಇದುವರೆಗೂ ಒಟ್ಟು ಮೂರು ಬಾರಿ ನವಾಜ್‌ ಅವರ ಗಡಿಪಾರಿಗೆ ಲಂಡನ್‌ ಸರಕಾರಕ್ಕೆ ಮನವಿ ಸಲ್ಲಿಸಲಾಗಿದೆ," ಎಂದಿದ್ದಾರೆ.

ಪಿಎಂ ಇಮ್ರಾನ್‌ ಸರಕಾರದ ವಿರುದ್ಧ ಪ್ರತಿಭಟನೆ ಬೆನ್ನಲ್ಲೆ ಮಾಜಿ ಪ್ರಧಾನಿ ನವಾಜ್‌ ಶರೀಫ್‌ ಅಳಿಯ ಅರೆಸ್ಟ್‌!
ಅಲ್‌ ಅಜಿಜಿಯಾ ಭ್ರಷ್ಟಾಚಾರ ಪ್ರಕರಣ ಸಂಬಂಧ ಇಸ್ಲಾಮಾಬಾದ್‌ ಹೈಕೋರ್ಟ್‌ ಕಳೆದ ಸೆ. 15ರಂದು ನವಾಜ್‌ ವಿರುದ್ಧ ಜಾಮೀನು ರಹಿತ ಬಂಧನ ವಾರೆಂಟ್‌ ಹೊರಡಿಸಿದೆ.