ಎಫ್‌ಎಟಿಎಫ್‌ ಬೂದುಪಟ್ಟಿಯಲ್ಲೇ ಮುಂದುವರಿದ ಪಾಕಿಸ್ತಾನ..! ಕೂದಲೆಳೆ ಅಂತರದಿಂದ ಕಪ್ಪುಪಟ್ಟಿಯಿಂದ ಪಾರು

ಹೊಸದಿಲ್ಲಿ: ಪಾಕಿಸ್ತಾನವು 2021ರ ಫೆಬ್ರವರಿವರೆಗೂ ಹಣಕಾಸು ಕಾರ್ಯಪಡೆಯ(ಎಫ್‌ಎಟಿಎಫ್‌) ಬೂದುಪಟ್ಟಿಯಲ್ಲೇ ಮುಂದುವರಿಯಲಿದೆ. ಫೆಬ್ರವರಿಯಲ್ಲಿನಡೆಯುವ ಪರಿಶೀಲನಾ ಸಭೆವರೆಗೂ ಯಥಾಸ್ಥಿತಿ ಕಾಯ್ದುಕೊಳ್ಳಲು ಕಾರ್ಯಪಡೆ ನಿರ್ಧರಿಸಿದೆ.

ಈ ಮೂಲಕ ಪಾಕಿಸ್ತಾನವು ಉಗ್ರರ ನಿಗ್ರಹ ಮತ್ತು ಅವರಿಗೆ ಅಕ್ರಮ ಹಣದ ಹರಿವು ನಿಯಂತ್ರಣದಲ್ಲಿ ವಿಫಲವಾದ ಹಿನ್ನೆಲೆಯಲ್ಲಿ ಕಪ್ಪುಪಟ್ಟಿಗೆ ಒಳಗಾಗಿ ಆರ್ಥಿಕ ನಿರ್ಬಂಧ ಎದುರಿಸುವ ಶಿಕ್ಷೆಯಿಂದ ಕೂದಲೆಳೆ ಅಂತರದಲ್ಲಿ ಪಾರಾಗಿದೆ. ಇದರಿಂದ ಪ್ರಧಾನಿ ಇಮ್ರಾನ್‌ ಖಾನ್‌ ನೇತೃತ್ವದ ಸರಕಾರ ನಿಟ್ಟುಸಿರು ಬಿಟ್ಟಿದೆ.

ಶುಕ್ರವಾರ ನಡೆದ ಎಫ್‌ಎಟಿಎಫ್‌ ಸಭೆಯಲ್ಲಿತಾನು ಈ ಹಿಂದೆ ಪಾಕ್‌ಗೆ ನೀಡಿದ್ದ 27 ಅಂಶಗಳ ಭಯೋತ್ಪಾದನೆ ನಿಗ್ರಹ ಕಾರ್ಯಸೂಚಿ ಪಾಲನೆ ಬಗ್ಗೆ ಪರಿಶೀಲನೆ ನಡೆಯಿತು. ಈ ವೇಳೆ ತನ್ನ ಕಾರ್ಯಸೂಚಿಯನ್ನು ಜಾರಿಗೆ ತರುವಲ್ಲಿ ಪಾಕ್‌ ವಿಫಲವಾಗಿರುವ ಬಗ್ಗೆ ಎಫ್‌ಎಟಿಎಫ್‌ ಪ್ರಮುಖರು ಅಸಮಾಧಾನ ವ್ಯಕ್ತಪಡಿಸಿದರು.

ಈ ಬಾರಿಯೂ 'ಎಫ್‌ಎಟಿಎಫ್‌' ಗ್ರೇ ಪಟ್ಟಿಯಲ್ಲೇ ಉಳಿಯಲಿದೆ ಪಾಕಿಸ್ತಾನ?

ಆದರೆ, ಪಾಕ್‌ ಪರ ವಾದಿಸಿದ ಟರ್ಕಿ ಮಾತ್ರ, ''ನಾವು ಪಾಕಿಸ್ತಾನ ಕೈಗೊಂಡಿರುವ ಉತ್ತಮ ಕ್ರಮಗಳನ್ನು ಕೂಡ ಗಮನಹರಿಸಬೇಕಿದೆ. 27 ಅಂಶಗಳ ಪೈಕಿ ಬಾಕಿಯಿರುವ ಆರು ಅಂಶಗಳ ಪಾಲನೆಗಾಗಿ ಕಾಯುತ್ತಾ ಕೂರುವ ಬದಲು ಎಫ್‌ಎಟಿಎಫ್‌ ತನ್ನ ತಂಡವೊಂದನ್ನು ಪಾಕಿಸ್ತಾನಕ್ಕೆ ಕಳುಹಿಸಿ ಅಲ್ಲಿನ ವಸ್ತುಸ್ಥಿತಿಯ ಅಧ್ಯಯನ ನಡೆಸಬೇಕು. ಬಳಿಕ ತಂಡ ನೀಡುವ ವರದಿ ಆಧರಿಸಿ ಪಾಕ್‌ ಮೇಲೆ ಮತ್ತಷ್ಟು ನಿರ್ಬಂಧ ಹೇರುವ ಬಗ್ಗೆ ಅಥವಾ ನಿರ್ಬಂಧ ಸಡಿಲಿಕೆ ಬಗ್ಗೆ ನಿರ್ಧರಿಸಬೇಕು,'' ಎಂದಿತು. ಆದರೆ, ಉಳಿದ 37 ಸದಸ್ಯ ರಾಷ್ಟ್ರಗಳು ಟರ್ಕಿಗೆ ಬೆಂಬಲ ನೀಡಲಿಲ್ಲ.

ಪಾಕ್ ಸೇನೆ, 'ಲಷ್ಕರ್' ವಿರುದ್ಧ ಪಿಒಕೆ ನಿರಾಶ್ರಿತರ ಆಕ್ರೋಶ: ಕರಾಳ ದಿನ ಆಚರಣೆ..