ಅಮೆರಿಕದಿಂದ ಹಣ ಪಡೆದು ಉಗ್ರರಿಗೆ ತರಬೇತಿ ನೀಡಿದ್ದು ನಿಜವೆಂದ ಇಮ್ರಾನ್‌

ಇಸ್ಲಾಮಾಬಾದ್‌: ಅಮೆರಿಕದ ಗುಪ್ತಚರ ಸಂಸ್ಥೆ 'ಸೆಂಟ್ರಲ್‌ ಇಂಟಲಿಜೆನ್ಸ್‌ ಏಜೆನ್ಸಿ' (ಸಿಐಎ) ನೀಡಿದ ಆರ್ಥಿಕ ನೆರವಿನಿಂದ ಪಾಕಿಸ್ತಾನ ಜಿಹಾದ್‌ ನಡೆಸಲು ಮುಜಾಹಿದ್ದೀನ್‌ ಮಂದಿಗೆ ತರಬೇತಿ ನೀಡುತ್ತಿತ್ತು ಎಂದು ಸಂದರ್ಶನವೊಂದರಲ್ಲಿಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ಒಪ್ಪಿಕೊಂಡಿದ್ದಾರೆ. ರಷ್ಯಾದ ಸುದ್ದಿವಾಹಿನಿಗೆ ನೀಡಿರುವ ಸಂರ್ದಶನದಲ್ಲಿಖಾನ್‌, ''1980ರ ದಶಕದಲ್ಲಿಅಫಘಾನಿಸ್ತಾನವನ್ನು ಸೋವಿಯತ್‌ ಆಕ್ರಮಿಸಿಕೊಂಡಿತ್ತು. ಅವರ ವಿರುದ್ಧ ಹೋರಾಡಲು ಅಮೆರಿಕ ನಮಗೆ ಹಣ ನೀಡಿ, ಮುಜಾಹಿದ್ದೀನ್‌ ಉಗ್ರರಿಗೆ ಜಿಹಾದ್‌ ಹೆಸರಲ್ಲಿತರಬೇತಿ ಕೊಡಿಸುತ್ತಿತ್ತು. ಅದರಿಂದಲೇ ದಶಕಗಳ ನಂತರ ಅಮೆರಿಕ ಈಗ ಅಫಘಾನಿಸ್ತಾನ ಪ್ರವೇಶಿಸಿದೆ,'' ಎಂದು ಬಹಿರಂಗಪಡಿಸಿದ್ದಾರೆ. ''ಅಫಘಾನಿಸ್ತಾನದಲ್ಲಿನಾವು ತರಬೇತಿ ನೀಡಿದ ಮುಜಾಹಿದ್ದೀನ್‌ ಗುಂಪುಗಳು ಸೋವಿಯತ್‌ ವಿರುದ್ಧ ಹೋರಾಡುತ್ತಿದ್ದಾಗ ಅದನ್ನು ಜಿಹಾದ್‌ ಎಂದು ಕರೆಯಲಾಗುತ್ತಿತ್ತು. ಆಗಲೂ ಅಫಘಾನಿಸ್ತಾನದಲ್ಲಿಹಕ್ಕಾನಿ, ತಾಲಿಬಾನ್‌ಗಳಿದ್ದವು. ಸದ್ಯ ಅಮೆರಿಕ ಸೇನೆ ಅಫಘಾನಿಸ್ತಾನ ಪ್ರವೇಶಿಸಿದ್ದರಿಂದ ಗುಂಪುಗಳಿಗೆ ಉಗ್ರರ ಪಟ್ಟ ಕಟ್ಟಿ ಭಯೋತ್ಪಾದನೆ ಎಂದು ಜಗತ್ತಿನ ಎದುರು ಬಿಂಬಿಸಲಾಗುತ್ತಿದೆ,'' ಎಂದು ಖಾನ್‌ ಉಗ್ರ ಸಂಘಟನೆಗಳ ಪರವಾಗಿ ನಿಂತಿದ್ದಾರೆ.

''ನನ್ನ ಅಭಿಪ್ರಾಯದಂತೆ ಅಮೆರಿಕಕ್ಕೆ ಸಹಾಯ ಮಾಡದೆಯೇ ಪಾಕ್‌ ತಟಸ್ಥವಾಗಿ ಇರಬೇಕಿತ್ತು. ಈಗ ನಮ್ಮಿಂದಲೇ ತರಬೇತಿ ಪಡೆದ ಮುಜಾಹಿದ್ದೀನ್‌ ಗುಂಪುಗಳು ನಮ್ಮ ವಿರುದ್ಧ ತಿರುಗಿಬಿದ್ದಿವೆ, ಪಾಕಿಸ್ತಾನಿಯರನ್ನೇ ಕೊಲ್ಲುತ್ತಿವೆ. 70 ಸಾವಿರ ಪಾಕಿಸ್ತಾನಿಯರು ಅಫಘಾನಿಸ್ತಾನದಲ್ಲಿಅಮೆರಿಕದ ಸಮರಕ್ಕೆ ಬೆಂಬಲ ನೀಡುವ ಮೂಲಕ ಮೃತಪಟ್ಟಿದ್ದಾರೆ. ಈಗ ಅಮೆರಿಕ ನಮ್ಮನೇ ದೂಷಿಸುತ್ತಿದೆ,'' ಎಂದು ಖಾನ್‌ ಅಮೆರಿಕದ ವಿರುದ್ಧ ಪರೋಕ್ಷವಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಟ್ವೀಟ್‌ ಎಡವಟ್ಟು: ಕಾಶ್ಮೀರದಲ್ಲಿವಿಶೇಷ ಸ್ಥಾನಮಾನ ರದ್ದತಿ ವಿಚಾರವನ್ನು ಜಾಗತಿಕ ವೇದಿಕೆಗೆ ಒಯ್ಯುವಲ್ಲಿವಿಫಲವಾಗಿರುವುದನ್ನು ಮುಚ್ಚಿಹಾಕಿಕೊಳ್ಳಲು ಯತ್ನಿಸಿರುವ ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌, ''ತಮಗೆ ಕಾಶ್ಮೀರ ವಿಚಾರವಾಗಿ ವಿಶ್ವದ 58 ರಾಷ್ಟ್ರಗಳ ಬೆಂಬಲವಿದೆ,'' ಎಂದು ಸರಣಿ ಟ್ವೀಟ್‌ಗಳ ಮೂಲಕ ಹೇಳಿಕೊಂಡಿದ್ದಾರೆ. ಇದಕ್ಕೆ ಖಡಕ್‌ ಪ್ರತಿಕ್ರಿಯೆ ನೀಡಿರುವ ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ವಕ್ತಾರ ರವೀಶ್‌ ಕುಮಾರ್‌, '' ವಿಶ್ವಸಂಸ್ಥೆ ಮಂಡಳಿಯಲ್ಲಿಇರುವುದು 47 ಸದಸ್ಯರು, ಅದು ಕೂಡ ಭಾರತ ಮತ್ತು ಪಾಕ್‌ ಸೇರಿಯೇ. ಹಾಗಿದ್ದು 58 ದೇಶಗಳ ಬೆಂಬಲವಿದೆ ಎನ್ನುವ ಮೂಲಕ ಅಂತಾರಾಷ್ಟ್ರೀಯ ಸಮುದಾಯವನ್ನು ಮೀರಿ, ವಿಶ್ವಂಸ್ಥೆಗೆ ಸಡ್ಡು ಹೊಡೆದು ಪಾಕ್‌ ಮುಂದಕ್ಕೆ ಹೋಗಿದೆ ಎಂದೆನಿಸುತ್ತಿದೆ. ಪಾಕ್‌ ತಮ್ಮ ಬೆಂಬಲಿಗರ ಪಟ್ಟಿಯೊಂದನ್ನು ನೀಡಿದರೆ ಉತ್ತಮ,'' ಎಂದು ಟಾಂಗ್‌ ಕೊಟ್ಟಿದ್ದಾರೆ.