ಕೆಳಗೆ ಬಿದ್ದರೂ ಮೀಸೆ ಮಣ್ಣಾಗಿಲ್ಲ: ಪಾಕ್‌ ಮಾಧ್ಯಮ ನಕಲಿ ಅವತಾರ

ಇಸ್ಲಾಮಾಬಾದ್‌: ಭಾರತೀಯ ವಾಯುಪಡೆ ನಡೆಸಿದ ದಾಳಿ ನಂತರವೂ ಪಾಕ್‌ ಸೇನೆ ಮತ್ತು ಅಲ್ಲಿನ ಮಾಧ್ಯಮಗಳು ಕೆಳಗೆ ಬಿದ್ದರೂ ಮೀಸೆ ಮಣ್ಣಾಗಿಲ್ಲ ಎಂಬಂತೆ ವರ್ತಿಸುತ್ತಿವೆ.

ಉಗ್ರ ಶಿಬಿರಗಳ ಮೇಲೆ ವಾಯು ದಾಳಿ ನಡೆಸಿ ಪಾಕಿಸ್ತಾನದ ನಿಜ ಬಣ್ಣವನ್ನು ಜಗತ್ತಿನ ಮುಂದೆ ಭಾರತ ಬಯಲು ಮಾಡಿದೆ. ಉಗ್ರ ಪೋಷಕ ಪಾಕಿಸ್ತಾನವು, ಅಂತಾರಾಷ್ಟ್ರೀಯ ಸಮುದಾಯ ಮತ್ತು ದೇಶದ ಜನರ ಎದುರು ಮಾನ ಮುಚ್ಚಿಕೊಳ್ಳಲು ಇನ್ನಿಲ್ಲದ ಪ್ರಯತ್ನ ನಡೆಸಿದೆ.

ಇದರ ಭಾಗವಾಗಿ 2016ರಲ್ಲಿ ಜೋಧ್‌ಪುರದ ವಸತಿ ಪ್ರದೇಶದಲ್ಲಿ ಭಾರತೀಯ ವಾಯುಪಡೆಯ ಮಿಗ್‌-27 ಯುದ್ಧವಿಮಾನ ಪತನ ಹಾಗೂ 2018ರ ಮಾರ್ಚ್‌ನಲ್ಲಿ ಒಡಿಶಾ-ಜಾರ್ಖಂಡ್‌ ಗಡಿಯ ಸುವರ್ಣರೇಖ ನದಿಯ ಸಮೀಪ ಭಾರತೀಯ ವಾಯುಪಡೆಯ ಹಾಕ್‌ ಯುದ್ಧವಿಮಾನ ಪತನದ ಫೋಟೋ ತೋರಿಸಿ, ಇದನ್ನು ಪಾಕ್‌ ಸೇನೆ ಬುಧವಾರ ಬೆಳಿಗ್ಗೆ ಹೊಡೆದುರುಳಿಸಿದ್ದಾಗಿ ಪಾಕ್‌ ಮಾಧ್ಯಮಗಳಲ್ಲಿ ಸುಳ್ಳು ಸುದ್ದಿ ಬಿತ್ತರಿಸಲಾಗಿದೆ.

ಭಾರತೀಯ ಸೇನೆಯ ವಿರುದ್ಧ ಸೆಟೆದು ನಿಲ್ಲುವ ಸಾಮರ್ಥ್ಯ‌ವಿಲ್ಲದೇ ಈ ರೀತಿ ಹಳೆಯ ಫೋಟೋಗಳ ಮೂಲಕ ಸುಳ್ಳು ಸುದ್ದಿ ಹರಿಬಿಟ್ಟು ಒಣ ಜಂಭ ಕೊಚ್ಚಿಕೊಳ್ಳಲು ಪಾಕ್‌ ಮಾಧ್ಯಮಗಳು ಮುಂದಾಗಿವೆ.