ಉದ್ಯಾನಕ್ಕೆ ಬಂದವರನ್ನು ಅಶ್ಲೀಲ ಮಾತುಗಳಿಂದ ನಿಂದಿಸುವ ಗಿಳಿಗಳು!

ಲಂಡನ್‌: ಎರಡು ಗಿಳಿಗಳ ನೀತಿ ಕತೆಯನ್ನು ನೀವು ಕೇಳಿರಬಹುದು. ಎರಡು ಗಿಳಿ ಮರಿಗಳಲ್ಲಿಒಂದನ್ನು ಬೇಟೆಗಾರನೂ, ಇನ್ನೊಂದನ್ನು ಸಂತನೂ ಕೊಂಡೊಯ್ದು ಸಾಕುತ್ತಾರೆ. ಇದರಲ್ಲಿ ಬೇಟೆಗಾರನ ಬಳಿ ಇದ್ದ ಗಿಳಿ ಬೆಳೆದು ದೊಡ್ಡದಾದ ಮೇಲೆ ಯಾರಾದರೂ ಅತಿಥಿಗಳು ಮನೆಗೆ ಬಂದರೆ 'ಹೊಡಿಯಿರಿ, ಕಡಿಯಿರಿ' ಎಂದು ಕಿರುಚಾಡಿದರೆ, ಸಂತ ಸಾಕಿದ್ದ ಗಿಳಿ 'ಬನ್ನಿ ಕುಳಿತುಕೊಳ್ಳಿ, ಹಣ್ಣು ತಿನ್ನಿ, ನೀರು ಕುಡಿಯಿರಿ' ಎಂದು ಸತ್ಕಾರದ ಮಾತುಗಳನ್ನಾಡುತ್ತಿತ್ತು. ಅಂದರೆ, ಸಂಸ್ಕಾರದಿಂದ ಬದುಕು ಬದಲಾಗುತ್ತದೆ ಎಂಬುದು ಈ ಕತೆಯ ತಾತ್ಪರ್ಯ.

ಆದರೆ ಬ್ರಿಟನ್‌ನ ಲಿಂಕನ್‌ಶೈರ್‌ ವನ್ಯಜೀವಿ ಉದ್ಯಾನದಲ್ಲಿ ಒಟ್ಟಿಗೇ ಇದ್ದ ಐದು ಗಿಳಿಗಳು ಕೆಟ್ಟ ಮಾತುಗಳನ್ನು ಕಲಿತುಕೊಂಡಿವೆ. ಮಾತ್ರವಲ್ಲ, ಉದ್ಯಾನಕ್ಕೆ ಬಂದವರನ್ನೆಲ್ಲಾ ಅಶ್ಲೀಲ ಮಾತುಗಳಿಂದ ಬಯ್ಯುತ್ತಿವೆ.

''ಒಂದೇ ವಾರದಲ್ಲಿ ಬೇರೆಬೇರೆ ದಿನ ಈ ಗಿಳಿಗಳನ್ನು ತರಲಾಗಿದೆ. ಎಲ್ಲವನ್ನೂ ಒಂದೇ ಕೋಣೆಯಲ್ಲಿ ಇರಿಸಲಾಗಿತ್ತು. ಈಗಾಗಲೇ ಕೆಲವು ಕೆಟ್ಟ ಶಬ್ದಗಳನ್ನು ಕಲಿತಿದ್ದ ಗಿಳಿಗಳು ಇಲ್ಲಿಪರಸ್ಪರ ಸಂಭಾಷಣೆ ವೇಳೆ ಮತ್ತಷ್ಟು ಕೆಟ್ಟ ಶಬ್ದಗಳನ್ನು ಕಲಿತುಕೊಂಡಿವೆ,'' ಎಂದು ಉದ್ಯಾನದ ಸಿಇಒ ಸ್ಟೀವ್‌ ನಿಕೋಲ್ಸ್‌ ಹೇಳಿದ್ದಾರೆ.

ಈಗ ಈ ಗಿಳಿಗಳನ್ನು ಪ್ರತ್ಯೇಕವಾಗಿ ಬೇರೆಬೇರೆ ವಿಭಾಗಗಳಲ್ಲಿ ಇರಿಸಲಾಗಿದೆ. ಇದರಿಂದ ಮುಂದೆ ಗಿಳಿಗಳು ತಾವು ಕಲಿತ ಕೆಟ್ಟ ಪದಗಳನ್ನು ಮರೆಯಲು ಸಾಧ್ಯವಾಗಬಹುದು ಎನ್ನುವುದು ಅಧಿಕಾರಿಗಳ ನಿರೀಕ್ಷೆ. ಗಿಳಿಗಳು ಹೀಗೆ 'ಅಸಭ್ಯ' ವರ್ತನೆ ತೋರುವುದು ಇದೇ ಮೊದಲಲ್ಲ. 2018ರಲ್ಲಿ ಜೆಸ್ಸಿಯಾ ಎಂಬ ಸಾಕುಗಿಳಿ ತನ್ನ 'ಅಶ್ಲೀಲ' ಪದ ಬಳಕೆಯ ಕಾರಣದಿಂದಲೇ ಸುದ್ದಿಯಾಗಿತ್ತು.

ಲಂಡನ್‌ನ ತನ್ನ ಮನೆಯಿಂದ ಹಾರಿದ ಈ ಗಿಳಿ ಪಕ್ಕದ ಕಟ್ಟಡವೊಂದರ ಛಾವಣಿಯಲ್ಲಿ ಮೂರು ದಿನ ಕುಳಿತಿತ್ತು. ಮಾಲಿಕರಿಗೆ ಅದನ್ನು ಹಿಡಿಯಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ ಅವರು ಅಗ್ನಿಶಾಮಕ ದಳದ ಸಹಾಯ ಪಡೆದಿದ್ದರು. ಗಿಳಿಯ ರಕ್ಷಣೆಗೆ ಅಗ್ನಿಶಾಮಕ ದಳದ ಸಿಬ್ಬಂದಿಯೊಬ್ಬರು ತೆರಳಿದ್ದ ಸಂದರ್ಭದಲ್ಲಿ ಗಿಳಿ ಇವರನ್ನು ಅತ್ಯಂತ ಕೆಟ್ಟ ಶಬ್ದಗಳಿಂದ ದಬಾಯಿಸಿತ್ತು!