ಪ್ರಧಾನಿ ಷರೀಫ್‌ ವಜಾ ಕೋರಿ ಸಲ್ಲಿಸಿದ ಅರ್ಜಿ ಸ್ವೀಕರಿಸಿದ ಪಾಕ್‌ ಕೋರ್ಟ್‌

ಲಾಹೋರ್‌: ಅಕ್ರಮವಾಗಿ ಹಣ ವರ್ಗಾವಣೆ ಹಾಗೂ ಉದ್ದೇಶಪೂರ್ವಕವಾಗಿ ಸಂಪತ್ತಿನ ಮಾಹಿತಿ ಮುಚ್ಚಿಟ್ಟ ಹಿನ್ನೆಲೆಯಲ್ಲಿ ಅವರನ್ನು ಪ್ರಧಾನಿ ಸ್ಥಾನದಿಂದ ಅನರ್ಹಗೊಳಿಸಬೇಕು ಎಂದು ಕೋರಿ ಸಲ್ಲಿಸಿದ್ದ ಅರ್ಜಿ ವಿಚಾರಣೆಯನ್ನು ಲಾಹೋರ್‌ ಹೈಕೋರ್ಟ್‌ ಸೋಮವಾರ ಕೈಗೆತ್ತಿಕೊಂಡಿದೆ.

ಪನಾಮ ಪೇಪರ್ಸ್ನಿಂದ ಪ್ರಧಾನಿ ನವಾಜ್‌ ಷರೀಫ್‌ ಹಾಗೂ ಅವರ ಪುತ್ರ ಹುಸೇನ್‌ ಷರೀಫ್‌ ಸಾಗರೋತ್ತರ ವ್ಯವಹಾರ ಹೊಂದಿರುವ ಬಗ್ಗೆ ಮಾಹಿತಿ ಸೋರಿಕೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ಗೋಹರ್‌ ನವಾಜ್‌ ಸಿಂಧು ಎಂಬುವರು ನವಾಜ್‌ ಷರೀಫ್‌ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಕೋರಿ ಲಾಹೋರ್‌ ಹೈಕೋರ್ಟ್‌ ಗೆ ಅರ್ಜಿ ಸಲ್ಲಿಸಿದ್ದರು.

ಇದೇ ವೇಳೆ, ಸಿಂಧು ಅರ್ಜಿಗೆ ಆಕ್ಷೇಪ ವ್ಯಕ್ತಪಡಿಸಿದ ಸರಕಾರಿ ಪರ ವಕೀಲರ ವಾದವನ್ನು ನ್ಯಾಯಮೂರ್ತಿಗಳು ತಳ್ಳಿ ಹಾಕಿದರು. ಅಲ್ಲದೇ, ಪ್ರಧಾನಿ ಹೊಂದಿರುವ ಎರಡು ಕಡಲಾಚೆಯ ವ್ಯವಹಾರಗಳ ಮೇಲಿನ ಸಾಕ್ಷ್ಯ ಒದಗಿಸಲು ಅರ್ಜಿದಾರರಿಗೆ ಸೂಚಿಸಿ, ವಿಚಾರಣೆಯನ್ನು ಏಪ್ರಿಲ್‌ 14ಕ್ಕೆ ಮುಂದೂಡಿತು.

ಪನಾಮ ಪೇಪರ್ಸ್‌ನಿಂದ ಪ್ರಧಾನಿ ಅವರ ವ್ಯವಹಾರಗಳು ಬಯಲಾಗಿದ್ದು, ನೈತಿಕತೆ ಕಳೆದುಕೊಂಡಿದ್ದಾರೆ ಎಂದು ಅರ್ಜಿದಾರರು ವಾದಿಸಿದರು. ಅಲ್ಲದೇ ಈ ಬಗ್ಗೆ ರಾಷ್ಟ್ರೀಯ ಹಕ್ಕು ಬಾಧ್ಯತೆ ಬ್ಯೂರೋದಿಂದ ತನಿಖೆಗೆ ಒಳಪಡಿಸುವಂತೆಯೂ ನಿರ್ದೇಶನ ನೀಡವಂತೆ ಅರ್ಜಿದಾರರು ನ್ಯಾಯಾಲಯಕ್ಕೆ ಮನವಿ ಸಲ್ಲಿಸಿದರು.