ಒಬಾಮ ನಿಂದಿಸಿ ವಿಷಾದಿಸಿದ ಫಿಲಿಪ್ಪೀನ್ಸ್ ಅಧ್ಯಕ್ಷ, ಮಾತುಕತೆ ರದ್ದು

ದಾವೋ, ಫಿಲಿಪ್ಪೀನ್ಸ್: ಲಾವೊಸ್‌ನಲ್ಲಿ ಭೇಟಿ ಮಾಡುವ ಸಂದರ್ಭದಲ್ಲಿ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮರಿಂದ ನಾವೇನೂ ಪಾಠ ಕಲಿಯಬೇಕಾಗಿಲ್ಲ, ಅವರೊಬ್ಬ "son of a w@#$%" ಎಂದು ಫಿಲಿಪ್ಪೀನ್ಸ್ ಅಧ್ಯಕ್ಷ ರೋಡ್ರಿಗೋ ಡ್ಯುಟೆರ್ಟೆ ಅವರು ಹೇಳಿರುವುದರಿಂದ ಅವಮಾನಿತರಾಗಿರುವ ಅಮೆರಿಕ ಅಧ್ಯಕ್ಷರು, ಮಾತುಕತೆಯನ್ನೇ ರದ್ದುಗೊಳಿಸಿದ್ದಾರೆ.

ಫಿಲಿಪ್ಪೀನ್ಸ್‌ನಲ್ಲಿ ಎರಡು ತಿಂಗಳಲ್ಲಿ ಸುಮಾರು 2400ಕ್ಕೂ ಹೆಚ್ಚು ಜೀವಗಳನ್ನು ಬಲಿತೆಗೆದುಕೊಂಡ ಮಾದಕ ದ್ರವ್ಯ ಅಪರಾಧದ ವಿರುದ್ಧ ಯುದ್ಧ ಸಾರಿರುವುದಕ್ಕಾಗಿ ಅಮೆರಿಕ ಅಧ್ಯಕ್ಷರು ಈ ಬಗ್ಗೆ ಪ್ರಶ್ನಿಸಲಿದ್ದಾರೆಂಬ ಸಂದೇಶಗಳು ಲಭ್ಯವಾದ ಹಿನ್ನೆಲೆಯಲ್ಲಿ ಡುಟೆರ್ಟೆ ಅವರು ಆಕ್ರೋಶದಿಂದ ಕೂಗಾಡಿದ್ದರು.

"ಗೌರವ ಕೊಟ್ಟು ಮಾತನಾಡಿ. ಬರೇ ಪ್ರಶ್ನೆಗಳನ್ನು ಕೇಳುವುದಲ್ಲ, ಅಥವಾ ಹೇಳಿಕೆ ನೀಡುವುದಲ್ಲ. "son of a w@#$%". ನಾನು ನಿಮಗೆ ಅದೇ ರೀತಿ ಶಪಿಸುತ್ತೇನೆ" ಎಂದು ಸೋಮವಾರ ಸುದ್ದಿಗೋಷ್ಠಿಯೊಂದರಲ್ಲಿ ಡುಟೆರ್ಟೆ ಹೇಳಿದ್ದರು.

ಮಾತುಕತೆ ರದ್ದುಗೊಳಿಸಿದ ಒಬಾಮ
ಲಾವೋ ರಾಜಧಾನಿ ವೈಂಷಿಯೇನ್‌ನಲ್ಲಿ ಆಸಿಯಾನ್ ಸಮಾವೇಶಕ್ಕೆ ಆಗಮಿಸಿರುವ ಒಬಾಮ ಜತೆ ಮಂಗಳವಾರ ಡುಟೆರ್ಟೆ ಅವರ ದ್ವಿಪಕ್ಷೀಯ ಮಾತುಕತೆ ಏರ್ಪಾಟಾಗಿತ್ತು. ಆದರೆ, ಈಗ ಒಬಾಮ ಅವರು ಈ ಮಾತುಕತೆಯನ್ನು ರದ್ದುಗೊಳಿಸಿದ್ದಾರೆ.

ಡುಟೆರ್ಟೆ ವಿಷಾದ
ಇದೀಗ ಒಬಾಮ ಅವರನ್ನು ನಿಂದಿಸಿದ್ದಕ್ಕಾಗಿ ಡುಟೆರ್ಟೆ ಅವರು ವಿಷಾದ ವ್ಯಕ್ತಪಡಿಸಿದ್ದಾರೆ. ಫಿಲಿಪ್ಪೀನ್ಸ್ ಅಧ್ಯಕ್ಷರ ವಕ್ತಾರರು ಬಿಡುಗಡೆಗೊಳಿಸಿದ ಹೇಳಿಕೆಯಲ್ಲಿ, "ವರದಿಗಾರರೊಬ್ಬರ ತೀಕ್ಷ್ಣ ಪ್ರಶ್ನೆಗಳಿಗೆ ಉತ್ತರಿಸುವ ಸಂದರ್ಭದಲ್ಲಿ, ಮನೋದ್ವೇಗ ಹಾಗೂ ದೇಶದ ಬಗೆಗಿನ ಕಾಳಜಿಯಿಂದಾಗಿ ಈ ರೀತಿ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದು, ಅದು ಅಮೆರಿಕ ಅಧ್ಯಕ್ಷರ ಮೇಲೆ ವೈಯಕ್ತಿಕ ನಿಂದನೆಯಾಗಿ ಬದಲಾಗಿರುವುದಕ್ಕೆ ನಾವು ವಿಷಾದಿಸುತ್ತೇವೆ" ಎಂದು ತಿಳಿಸಲಾಗಿದೆ.