ರನ್‌ವೇ ಬಿಟ್ಟು ಸಮುದ್ರದತ್ತ ಜಾರಿದ ವಿಮಾನ
ವಿಮಾನವೊಂದು ರನ್‌ವೇ ಬಿಟ್ಟು ಕೆಲವು ಅಡಿಗಳಷ್ಟು ತಗ್ಗು ಪ್ರದೇಶಕ್ಕೆ ಜಾರಿ ಸ್ವಲ್ಪದರಲ್ಲೇ ಸಮುದ್ರಕ್ಕೆ ಬೀಳುವುದರಿಂದ ಪಾರಾದ ಘಟನೆ ಉತ್ತರ ಟರ್ಕಿಯ ಟ್ರಬ್ಜೋನ್‌ನಲ್ಲಿ ನಡೆದಿದೆ.
ಅಂಕಾರ: ವಿಮಾನವೊಂದು ರನ್‌ವೇ ಬಿಟ್ಟು ಕೆಲವು ಅಡಿಗಳಷ್ಟು ತಗ್ಗು ಪ್ರದೇಶಕ್ಕೆ ಜಾರಿ ಸ್ವಲ್ಪದರಲ್ಲೇ ಸಮುದ್ರಕ್ಕೆ ಬೀಳುವುದರಿಂದ ಪಾರಾದ ಘಟನೆ ಉತ್ತರ ಟರ್ಕಿಯ ಟ್ರಬ್ಜೋನ್‌ನಲ್ಲಿ ನಡೆದಿದೆ.
ಪೆಗಾಸಸ್‌ ಏರ್‌ಲೈನ್ಸ್‌ ಸಂಸ್ಥೆಯ ಬೋಯಿಂಗ್‌ 737-800 ವಿಮಾನದಲ್ಲಿ 162 ಪ್ರಯಾಣಿಕರು, ಇಬ್ಬರು ಪೈಲಟ್‌ ಹಾಗೂ ನಾಲ್ವರು ಸಿಬ್ಬಂದಿ ಇದ್ದರು. ಅಂಕಾರದಿಂದ ಟ್ರಬ್ಜೋನ್‌ಗೆ ಬರುತ್ತಿದ್ದ ವಿಮಾನ ರನ್‌ವೇಯಲ್ಲಿ ಇಳಿಯುತ್ತಿದ್ದಂತೆಯೇ ನಿಯಂತ್ರಣ ತಪ್ಪಿ ಸ್ವಲ್ಪ ದೂರಕ್ಕೆ ಹೋಗಿ ಇನ್ನೇನು ಸಮುದ್ರಕ್ಕೆ ಬೀಳಬೇಕನ್ನೆಷ್ಟುವರಲ್ಲಿ ತಗ್ಗು ಪ್ರದೇಶದ ಮಣ್ಣಿಗೆ ಉಜ್ಜಿಗೊಂಡು ನಿಂತಿತು. ಪ್ರಯಾಣಿಕರ ಆಕ್ರಂದನ ಮುಗಿಲು ಮುಟ್ಟಿತ್ತು. ಸಣ್ಣಪುಟ್ಟ ಗಾಯಗಳ ಹೊರತಾಗಿ ಎಲ್ಲ ಪ್ರಯಾಣಿಕರು ಜೀವಾಪಾಯದಿಂದ ಪಾರಾಗಿದ್ದು, ಅವರೆಲ್ಲರನ್ನೂ ಸುರಕ್ಷಿತವಾಗಿ ಹೊರ ಕರೆತರಲಾಗಿದೆ ಎಂದು ಟ್ರಬ್ಜೋನ್‌ ಗವರ್ನರ್‌ ಕಚೇರಿ ತಿಳಿಸಿದೆ.
ಸಮುದ್ರದ ಸಮೀಪವೇ ಸ್ವಲ್ಪ ಮೇಲ್ಪಟ್ಟದ ಪ್ರದೇಶದಲ್ಲಿ ಏರ್‌ಪೋರ್ಟ್‌ ಇದೆ. ವಿಮಾನ ರನ್‌ವೇಯಿಂದ ಸಮುದ್ರತ್ತ ಜಾರಿದ ಚಿತ್ರವನ್ನು ಸ್ಥಳೀಯ ಮಾಧ್ಯಮಗಳು ಪ್ರಕಟಿಸಿವೆ. ವಿಮಾನದ ಚಕ್ರಗಳು ಮಣ್ಣಿನಲ್ಲಿ ಹೂತಿವೆ. ಇಲ್ಲದಿದ್ದಲ್ಲಿ ಸಮುದ್ರಕ್ಕೆ ಬೀಳುವ ಅಪಾಯವಿತ್ತು. ಈ ಘಟನೆಗೆ ನಿಖರ ಕಾರಣ ತಿಳಿದುಬಂದಿಲ್ಲ. ತನಿಖೆ ನಡೆಯುತ್ತಿದೆ ಎಂದು ಸ್ಥಳೀಯ ಸರಕಾರ ಹೇಳಿದೆ.