ಜಿ 7 ಶೃಂಗದಲ್ಲಿ ಪಾಲ್ಗೊಳ್ಳಲು ಆಗಸ್ಟ್‌ನಲ್ಲಿ ಫ್ರಾನ್ಸ್‌ಗೆ ಮೋದಿ

ಪ್ಯಾರಿಸ್‌: ವಿಶೇಷ ಆಹ್ವಾನದ ಮೇರೆಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಜಿ 7 ಶೃಂಗಸಭೆಯಲ್ಲಿ ಪಾಲ್ಗೊಳ್ಳಲು ಇದೇ ಆಗಸ್ಟ್‌ನಲ್ಲಿ ಫ್ರಾನ್ಸ್‌ಗೆ ಭೇಟಿ ನೀಡಲಿದ್ದಾರೆ.
ಬ್ರಿಟನ್‌, ಕೆನಡಾ, ಫ್ರಾನ್ಸ್‌, ಜರ್ಮನಿ, ಇಟಲಿ, ಜಪಾನ್‌ ಹಾಗೂ ಅಮೆರಿಕ ಜಿ 7 ಒಕ್ಕೂಟದ ಸದಸ್ಯ ರಾಷ್ಟ್ರಗಳಾಗಿವೆ. ಭಾರತ ಸದಸ್ಯ ರಾಷ್ಟ್ರವಲ್ಲ. ಆದಾಗ್ಯೂ ಫ್ರಾನ್ಸ್‌ ನೀಡಿದ ವಿಶೇಷ ಆಹ್ವಾನವನ್ನು ಒಪ್ಪಿಕೊಂಡು ಮೋದಿ ಪಾಲ್ಗೊಳ್ಳುತ್ತಿದ್ದಾರೆ. ಫ್ರಾನ್ಸ್‌ ಅಧ್ಯಕ್ಷ ಇಮ್ಯಾನುಲ್‌ ಮ್ಯಾಕ್ರೋನ್‌ ಹಾಗೂ ಮೋದಿ ಮಧ್ಯೆ ಒಳ್ಳೆಯ ಸ್ನೇಹ ಸಂಬಂಧವಿದ್ದು, ಬಿಯರಿಟ್ಜ್‌ನಲ್ಲಿ ನಡೆಯಲಿರುವ ಜಿ 7ಶೃಂಗಸಭೆಯ ನೇಪಥ್ಯದಲ್ಲಿ ಉಭಯ ನಾಯಕರ ನಡುವೆ ದ್ವಿಪಕ್ಷೀಯ ಮಾತುಕತೆ ನಡೆಯುವ ಸಾಧ್ಯತೆಗಳಿವೆ.
ಮೋದಿ ಭೇಟಿಯು ಭಾರತ-ಫ್ರಾನ್ಸ್‌ ನಡುವಿನ ವಾಣಿಜ್ಯ ಹಾಗೂ ರಚನಾತ್ಮಕ ಬಾಂಧವ್ಯವನ್ನು ಇನ್ನಷ್ಟು ಹೊಸ ಎತ್ತರಕ್ಕೆ ಕೊಂಡೊಯ್ಯಲಿದೆ. ಅವರನ್ನು ಬರಮಾಡಿಕೊಳ್ಳಲು ಮ್ಯಾಕ್ರೊನ್‌ ಉತ್ಸುಕರಾಗಿದ್ದಾರೆ ಎಂದು ಫ್ರಾನ್ಸ್‌ ವಿದೇಶಾಂಗ ಸಚಿವ ಜೀನ್‌ ಬ್ಯಾಪ್ಟಿಸ್ಟೆ ಲೆಮೊನೆ ಹೇಳಿದ್ದಾರೆ.