ಪಾಕ್‌ನಲ್ಲಿ ಹಿಂದು ದೇವಾಲಯ ಧ್ವಂಸ: ಸಿಂಧ್‌ ಪ್ರಾಂತ್ಯದ ನಾಲ್ವರ ಬಂಧನ

ಕರಾಚಿ: ಪಾಕಿಸ್ತಾನದ ಸಿಂಧ್‌ ಪ್ರಾಂತ್ಯದಲ್ಲಿನ ದೇವಾಲಯವೊಂದನ್ನು ಧ್ವಂಸಗೊಳಿಸಿದ ಆರೋಪದ ಮೇಲೆ ನಾಲ್ವರು ಬಾಲಕರನ್ನು ಪಾಕಿಸ್ತಾನ ಪೊಲೀಸರು ಬಂಧಿಸಿದ್ದಾರೆ. ಅವರ ವಿರುದ್ಧ ಧರ್ಮನಿಂದನೆ ಆರೋಪಗಳನ್ನು ಹೊರಿಸಿ ಶಿಕ್ಷೆಗೆ ಗುರಿಪಡಿಸಬೇಕು ಎಂದು ಸಚಿವ ಹರಿರಾಮ್‌ ಕಿಶೋರಿ ಲಾಲ್‌ ಆಗ್ರಹಿಸಿದ್ದಾರೆ.

ಈಗಾಗಲೇ ಪೊಲೀಸ್‌ ವಿಚಾರಣೆ ವೇಳೆ ಆರೋಪಿಗಳು ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದು. ದೇವಾಲಯದ ಹುಂಡಿಯಲ್ಲಿನ ಹಣ ಕದಿಯುವುದಕ್ಕಾಗಿ ಕೃತ್ಯ ಎಸಗಿದ್ದಾಗಿ ತಿಳಿಸಿದ್ದಾರೆ ಎಂದು ಸ್ಥಳೀಯ ಡಾನ್‌ ಪತ್ರಿಕೆ ವರದಿ ಮಾಡಿದೆ. ''ಭಾನುವಾರ ರಾತ್ರಿ ಸಿಂಧ್‌ ಪ್ರಾಂತ್ಯದ ಛಾಚ್ರೊ ಪಟ್ಟಣದ ಮಾತಾ ದೇವಳ ಭಿಟ್ಟಾನಿ ಮಂದಿರದ ಗೋಡೆ ಒಡೆದು, ಅಲ್ಲಿನ ಮೂರ್ತಿಗಳನ್ನು ಧ್ವಂಸಗೊಳಿಸಲಾಗಿತ್ತು. ಈ ಸಂಬಂಧ ಎಫ್‌ಐಆರ್‌ ದಾಖಲಿಸಿಕೊಂಡಿದ್ದೆವು. ಬಂಧಿತ ಬಾಲಕರು ಇದೇ ಪಟ್ಟಣದವರು. ಹಣ ಪಡೆಯುವ ಜತೆಗೆ ಕೋಮುಗಲಭೆ ಸೃಷ್ಟಿಗೂ ಬಾಲಕರಿಗೆ ಕುಮ್ಮಕ್ಕು ನೀಡಲಾಗಿತ್ತು. ಆ ಕುರಿತು ತನಿಖೆ ನಡೆಯುತ್ತಿದೆ,'' ಎಂದು ತನಿಖಾಧಿಕಾರಿ ಅಬ್ದುಲ್ಲಾ ಅಹ್ಮದಿಯಾರ್‌ ತಿಳಿಸಿದ್ದಾರೆ.

ಸಿಂಧ್‌ ಪ್ರಾಂತ್ಯದ ಅಲ್ಪಸಂಖ್ಯಾತರ ವ್ಯವಹಾರಗಳ ಸಚಿವರಾಗಿರುವ ಹಿಂದೂ ಸಮುದಾಯದ ಹರಿ ರಾಮ್‌ ಕಿಶೋರಿ ಲಾಲ್‌ ಅವರು, ''ಪಾಕಿಸ್ತಾನ ಸರಕಾರ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಬೇಕು. ಇಂಥ ಕೃತ್ಯಗಳನ್ನು ಸಹಿಸಲಾಗಲ್ಲ,'' ಎಂದಿದ್ದಾರೆ. ಅಧಿಕೃತ ಮಾಹಿತಿ ಪ್ರಕಾರ 75 ಲಕ್ಷಕ್ಕೂ ಅಧಿಕ ಹಿಂದೂಗಳು ದೇಶದಲ್ಲಿ ವಾಸಿಸುತ್ತಿದ್ದು, ಆ ಪೈಕಿ ಅತಿಹೆಚ್ಚು ಮಂದಿ ಸಿಂಧ್‌ ಪ್ರಾಂತ್ಯದಲ್ಲಿದ್ದಾರೆ.