ಪಾಕ್‌ನಲ್ಲಿ ಪೋಲಿಯೊ ಕಾರ‍್ಯಕರ್ತನ ಹತ್ಯೆ

ಪೇಶಾವರ: ಪಾಕಿಸ್ತಾನದಲ್ಲಿ ಪಲ್ಸ್‌ ಪೋಲಿಯೊ ಲಸಿಕೆ ಅಭಿಯಾನ ವಿರೋಧಿಸಿ ಇಬ್ಬರ ಮಧ್ಯೆ ನಡೆದ ಮಾತಿನ ಚಕಮಕಿ ಕೊನೆಗೆ ಪೋಲಿಯೊ ಕಾರ‍್ಯಕರ್ತನ ಹತ್ಯೆಯಲ್ಲಿ ಅಂತ್ಯಗೊಂಡಿದೆ. ಅಫಘಾನಿಸ್ತಾನದ ಗಡಿಗೆ ಹೊಂದಿಕೊಂಡಿರುವ ಪಾಕಿಸ್ತಾನದ ಘಾಜಿ ಬೇಗ್‌ ಪ್ರದೇಶದ ಮೊಮಾಂದ್‌ ಜಿಲ್ಲೆಯ ಹಳ್ಳಿಯೊಂದರಲ್ಲಿ ಸೋಮವಾರ ಈ ಘಟನೆ ನಡೆದಿದೆ.

ಈ ಹಿಂದೆ ಆರೋಗ್ಯ ಇಲಾಖೆ ಕೈಗೊಂಡಿದ್ದ ಅಭಿಯಾನದಲ್ಲಿ ಜುಬೇರ್‌ ಅಲಿ ಎಂಬಾತ ನಾನಾ ರೀತಿಯ ಅಪನಂಬಿಕೆಯಿಂದ ತನ್ನ ಮಕ್ಕಳಿಗೆ ಪೋಲಿಯೊ ಲಸಿಕೆ ಹಾಕಿಸಿರಲಿಲ್ಲ. ಈ ಬಾರಿಯೂ ಮಕ್ಕಳಿಗೆ ಪೋಲಿಯೊ ಲಸಿಕೆ ಹಾಕಿಸಲು ನಿರಾಕರಿಸಿದಾಗ ಪೋಲಿಯೊ ಕಾರ‍್ಯಕರ್ತ ವಾಜಿದ್‌ ಅಲಿ, ಜುಬೇರ್‌ನ ಮನವೊಲಿಸುವ ಪ್ರಯತ್ನ ಮಾಡಿದರು. ಅದಕ್ಕೆ ಜುಬೇರ್‌ ಮಣಿಯದಿದ್ದಾಗ, ''ನಿಮ್ಮನ್ನು ಜೈಲಿಗಟ್ಟಬೇಕಾಗುತ್ತದೆ,'' ಎಂದು ಏರು ಧ್ವನಿಯಲ್ಲಿ ಬೆದರಿಸಿದರು. ಇದರಿಂದ ಕುಪಿತಗೊಂಡ ಜುಬೇರ್‌ ಮನೆಗೆ ಹೋಗಿ ಸ್ವಲ್ಪ ಹೊತ್ತಿನಲ್ಲಿಯೇ ಬೂತ್‌ಗೆ ಬಂದು ಅಲ್ಲಿದ್ದ ವಾಜಿದ್‌ ಅಲಿ ಮೇಲೆ ಗುಂಡಿನ ದಾಳಿ ನಡೆಸಿ ಹತ್ಯೆ ಮಾಡಿದ್ದಾನೆಂದು ಪೊಲೀಸರು ಹೇಳಿದ್ದಾರೆ. 2012ರಿಂದ ಪಾಕ್‌ನಲ್ಲಿ ಹೀಗೆ ಹತ್ಯೆಯಾದ ಪೊಲೀಯೊ ಕಾರ‍್ಯಕರ್ತರ ಸಂಖ್ಯೆ ಈಗ 68ರ ಗಡಿ ದಾಟಿದೆ.

ವಿಶ್ವದ ಬಹುತೇಕ ಎಲ್ಲ ರಾಷ್ಟ್ರಗಳಲ್ಲಿ ಪೋಲಿಯೊ ನಿರ್ಮೂಲನೆಗೊಂಡಿದ್ದು ಪಾಕಿಸ್ತಾನ, ಅಫಘಾನಿಸ್ತಾನ ಮತ್ತು ನೈಜೀರಿಯಾದಲ್ಲಿ ಇನ್ನೂ ಈ ಪಿಡುಗು ಇದೆ. ಅದರ ನಿರ್ಮೂಲನೆಗೆ ಸ್ಥಳೀಯ ಸರಕಾರಗಳು ಪ್ರಯತ್ನಿಸುತ್ತಿವೆ.