ಇರಾನ್‌ ವಿರುದ್ಧ ಅರಬ್‌ ಸಂಘಟನೆಗೆ ಅಮೆರಿಕ ಯತ್ನ

ಜೆಡ್ಡಾ: ಇರಾನ್‌-ಅಮೆರಿಕ ನಡುವೆ ಸಮರ ಸನ್ನಿವೇಶ ಸೃಷ್ಟಿಯಾಗಿರುವ ಸಂದರ್ಭದಲ್ಲಿಯೇ ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಮೈಕ್‌ ಪೊಂಪಿಯೊ ಸೋಮವಾರ ಸೌದಿ ದೊರೆ ಮತ್ತು ರಾಜಕುಮಾರ ಅವರನ್ನು ಭೇಟಿಯಾಗಿ 'ಮೈತ್ರಿ' ಸಹಕಾರ ಕುರಿತು ಸಮಾಲೋಚನೆ ನಡೆಸಿದ್ದಾರೆ.
ಅಮೆರಿಕದ ಮಾನವರಹಿತ ಡ್ರೋನ್‌ ಅನ್ನು ಇರಾನ್‌ ಹೊಡೆದುರುಳಿಸಿದ ಬಳಿಕ ಉಭಯ ದೇಶಗಳ ನಡುವಿನ ಬಿಕ್ಕಟ್ಟು ಇನ್ನಷ್ಟು ಉಲ್ಬಣಿಸಿದೆ. ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿದ ಅಮೆರಿಕವು ಅರಬ್‌ ರಾಷ್ಟ್ರಗಳ ಸಹಕಾರ ಪಡೆದು ಇರಾನ್‌ ಅನ್ನು ಮೂಲೆಗುಂಪಾಗಿಸುವ ಹಠಕ್ಕೆ ಬಿದ್ದಿದೆ. ಯುದ್ಧದ ಬದಲಿಗೆ ಅರಬ್‌ ರಾಷ್ಟ್ರಗಳನ್ನು ಒಗ್ಗೂಡಿಸಿ ಇರಾನ್‌ ಅನ್ನು ಹತ್ತಿಕ್ಕುವ ಜಾಣ ಹಾದಿಯನ್ನು ಈಗ ಅಮೆರಿಕ ತುಳಿದಿದೆ. ಇದರ ಭಾಗವಾಗಿ ಸೋಮವಾರ ಜೆಡ್ಡಾದಲ್ಲಿ ಪೊಂಪಿಯೊ ಅವರು ಸೌದಿ ದೊರೆ ಸಲ್ಮಾನ್‌ ಮತ್ತು ರಾಜಕುಮಾರ್‌ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಜತೆ ಪ್ರತ್ಯೇಕ ಚರ್ಚೆ ನಡೆಸಿದರು.
ಹಿರಿಯ ಅಧಿಕಾರಿಗಳ ಜತೆ ಆಗಮಿಸಿದ ಪೊಂಪಿಯೊ ಅವರನ್ನು ಆತ್ಮೀಯವಾಗಿ ಬರಮಾಡಿಕೊಂಡ ಸಲ್ಮಾನ್‌, ''ನೀವು ನಮ್ಮ ಪರಮಾಪ್ತ ಗೆಳೆಯರು,'' ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು. ಜೆಡ್ಡಾದಿಂದ ನಂತರ ಅರಬ್‌ಗೆ ತೆರಳಿ ಅಲ್ಲಿನ ಮುಖಂಡರ ಜತೆ ಇರಾನ್‌ ವಿರೋಧಿ ಅಜೆಂಡಾ ಕುರಿತು ಚರ್ಚಿಸಿದರು. ''ಜಾಗತಿಕ ಭಯೋತ್ಪಾದನೆ ಬಲಗೊಳ್ಳಲು ಇರಾನ್‌ ಕೊಡುಗೆ ಇದೆ. ಉಗ್ರರನ್ನು ಪೋಷಿಸುತ್ತಿರುವ ದೊಡ್ಡ ದೇಶ ಅದು. ಈ ಹಿನ್ನೆಲೆಯಲ್ಲಿ ಅರಬ್‌ ರಾಷ್ಟ್ರಗಳಷ್ಟೇ ಅಲ್ಲದೆ, ಏಷ್ಯಾದ ರಾಷ್ಟ್ರಗಳು ಕೂಡ ಇರಾನ್‌ ವಿರುದ್ಧದ ಕ್ರಮಕ್ಕೆ ಕೈಜೋಡಿಸಬೇಕಿದೆ,'' ಎಂದು ಪೊಂಪಿಯೊ ಪ್ರತಿಪಾದಿಸಿದರು. ಆದರೆ, ಅಮೆರಿಕ ಮಾಡುತ್ತಿರುವುದು ಆರ್ಥಿಕ ಭಯೋತ್ಪಾದನೆ ಎಂದು ಇರಾನ್‌ ಅಧ್ಯಕ್ಷ ಹಸನ್‌ ರೌಹಾನಿ ಟೀಕಿಸಿದ್ದಾರೆ.
ಇಸ್ತಾನ್‌ಬುಲ್‌ನಲ್ಲಿ ಕಳೆದ ವರ್ಷ ನಡೆದ ಪತ್ರಕರ್ತ ಜಮಾಲ್‌ ಖಷೋಗಿ ಹತ್ಯೆಯಲ್ಲಿ ಸೌದಿ ಪಾತ್ರವಿರುವುದು ಖಚಿತವಾದ ಬಳಿಕ ಆ ದೇಶದ ಜತೆ ಬಾಂಧವ್ಯ ಕಡಿದುಕೊಳ್ಳುವಂತೆ ಅಮೆರಿಕದಲ್ಗಲಿ ಆಂತರಿಕ ಒತ್ತಡ ಹೆಚ್ಚುತ್ತಿದೆ. ಆದರೂ ಇರಾನ್‌ ಅನ್ನು ಬಗ್ಗು ಬಡಿಯಲು ಸೌದಿ ಅರೇಬಿಯಾದ ನೆರವು ಪಡೆಯಲು ವಾಷಿಂಗ್ಟನ್‌ ಮುಂದಾಗಿದೆ.
.......
ಇರಾನ್‌ ಉದ್ಧಟತನ ಮಿತಿ ಮೀರಿದರೆ ಆ ದೇಶ ಒಡ್ಡಿರುವ ಸವಾಲನ್ನು ಎದುರಿಸಲು ಸೌದಿ ಅರೇಬಿಯಾ ಮತ್ತು ಅರಬ್‌ ಸಂಯುಕ್ತ ಸಂಸ್ಥಾನ ಪ್ರಬಲ ಮೈತ್ರಿಕೂಟಗಳಾಗಿವೆ. ಮುಂದಿನ ದಿನಗಳಲ್ಲಿ ಈ ರಾಷ್ಟ್ರಗಳ ಜತೆಗಿನ ವ್ಯೂಹಾತ್ಮಕ ಮೈತ್ರಿಯನ್ನು ಬಲಪಡಿಸುವ ಕಾರ್ಯವಿಧಾನಗಳ ಕುರಿತು ಚರ್ಚಿಸಲಾಗಿದೆ.
- ಮೈಕ್‌ ಪೊಂಪೊಯೊ, ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ
ಅಮೆರಿಕದ ಡ್ರೋನ್‌ಗಳು ಗಡಿದಾಟಿ ಬಂದರೆ ಖಂಡಿತವಾಗಿಯೂ ಅವನ್ನು ಹೊಡೆದುರುಳಿಸುತ್ತೇವೆ. ಬೆದರಿಕೆಗಳಿಗೆ ನಾವು ಬಗ್ಗುವುದಿಲ್ಲ.
-ಹುಸೇನ್‌ ಖಂಜಾದಿ, ಇರಾನ್‌ ನೌಕಾ ಪಡೆ ಅಡ್ಮಿರಲ್‌
...........
ಶ್ವೇತಭವನದ ಪರೋಕ್ಷ ಸಮರದ ತಂತ್ರ
* ಸುನ್ನಿ ಪ್ರಾಬಲ್ಯದ ಅರಬ್‌ ರಾಷ್ಟ್ರಗಳನ್ನು ಒಗ್ಗೂಡಿಸಿ ಶಿಯಾ ಪ್ರಾಬಲ್ಯದ ಇರಾನ್‌ ವಿರುದ್ಧ ಎತ್ತಿಕಟ್ಟುವುದು. ಈ ನಿಟ್ಟಿನಲ್ಲಿ ಸೌದಿ ದೊರೆಗಳ ಜತೆ ಮಾತುಕತೆ
* ವಿಶ್ವದ ಅತಿ ದೊಡ್ಡ ತೈಲ ಸರಬರಾಜು ಸಾಗರ ಮಾರ್ಗ ಎನಿಸಿರುವ 'ಸ್ಟ್ರೈಟ್‌ ಆಫ್‌ ಹರ್ಮುಜ್‌'ನ ಭದ್ರತೆಯನ್ನು ಇನ್ನಷ್ಟು ಬಿಗಿಗೊಳಿಸಲು ನಿರ್ಧಾರ
* ಇರಾನ್‌ ನಾಯಕರನ್ನು ಮಾತುಕತೆಗೆ ಬಗ್ಗಿಸಲು ಇನ್ನಷ್ಟು ಆರ್ಥಿಕ ದಿಗ್ಬಂಧನಾ ಕ್ರಮಗಳ ಘೋಷಣೆ

.....