ಚರ್ಚ್‌ಗಳಲ್ಲಿ ಲೈಂಗಿಕ ಕಿರುಕುಳ ದೂರು ನೀಡಿಕೆ ಕಡ್ಡಾಯಗೊಳಿಸಿದ ಪೋಪ್ ಫ್ರಾನ್ಸಿಸ್

ವ್ಯಾಟಿಕನ್‌ ಸಿಟಿ: ಕ್ಯಾಥೊಲಿಕ್‌ ಚರ್ಚ್‌ಗಳಲ್ಲಿ ಕೇಳಿ ಬರುತ್ತಿರುವ ಲೈಂಗಿಕ ದೌರ್ಜನ್ಯ ಪ್ರಕರಣಗಳನ್ನು ಗಂಭೀರವಾಗಿ ಪರಿಗಣಿಸಿರುವ ಪೋಪ್‌ ಫ್ರಾನ್ಸ್ಸಿಸ್‌ ಅವರು, ಯಾವುದೇ ಪ್ರಕರಣ ಕಂಡರೂ ದೂರು ನೀಡುವುದು ಕಡ್ಡಾಯ ಎಂದು ಚರ್ಚ್‌ ಕಾನೂನು ತಿದ್ದುಪಡಿಗೆ ಸೂಚಿಸಿದ್ದಾರೆ. ಯಾರೇ ಅಗಿರಲಿ, ಲೈಂಗಿಕ ಕಿರುಕುಳಕ್ಕೆ ಒಳಗಾದರೆ, ಕಿರುಕುಳದ ಬಗ್ಗೆ ತಿಳಿದಿದ್ದರೆ, ಅದರ ಬಗ್ಗೆ ಸಂಶಯವಿದ್ದರೆ ಕೂಡಲೇ ಚರ್ಚ್‌ಗೆ ತಿಳಿಸುವುದು ಕಡ್ಡಾಯ ಎಂದು ಪೋಪ್‌ ಅವರು ಘೋಷಿಸಿದ್ದಾರೆ. ಈ ಬದಲಾದ ಕಾನೂನು ಎಲ್ಲ ಕ್ಯಾಥೊಲಿಕ್‌ ಚರ್ಚ್‌ಗಳಿಗೆ ಅನ್ವಯವಾಗಲಿದೆ ಎಂದು ಹೇಳಲಾಗಿದೆ.


ಪಾದ್ರಿಗಳು ಮತ್ತು ಬಿಷಪ್ ಗಳು ನನ್ಸ್ (ಕ್ರೈಸ್ತ ಸನ್ಯಾಸಿನಿ)ಗಳ ಮೇಲೆ ಲೈಂಗಿಕ ಕಿರುಕುಳ ನೀಡುತ್ತಾರೆ ಎಂಬ ಆರೋಪವನ್ನು ಕಳೆದ ಫೆಬ್ರವರಿಯಲ್ಲಿ ಪೋಪ್ ಫ್ರಾನ್ಸಿಸ್ ಮೊದಲ ಬಾರಿಗೆ ಸಾರ್ವಜನಿಕವಾಗಿ ಒಪ್ಪಿಕೊಂಡಿದ್ದರು.'ಅನೈತಿಕತೆಯಲ್ಲಿ ತೊಡಗಿರುವ ಪಾದ್ರಿಗಳ ವಿರುದ್ಧ ಸಮರ ಸಾರಲಾಗುವುದು. ಅವರು ಎಸಗುವ ಲೈಂಗಿಕ ದೌರ್ಜನ್ಯ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಲಾಗುವುದು, ಎಂದು ಭರವಸೆ ನೀಡಿದ್ದರು.

ಚರ್ಚ್‌ಗಳಲ್ಲಿ ಲೈಂಗಿಕ ದೌರ್ಜನ್ಯ ನಡೆಯುತ್ತಿರುವುದು ದುರದೃಷ್ಟಕರ. ಅದರಲ್ಲಿಯೂ ಮಕ್ಕಳ ಮೇಲೆ ನಡೆಯುವ ದೌರ್ಜನ್ಯ ದೊಡ್ಡ ಕ್ರೌರ್ಯ. ಈ ರೀತಿಯ ದೌರ್ಜನ್ಯಗಳಿಂದ ಮಕ್ಕಳನ್ನು ರಕ್ಷಿಸಬೇಕಿದೆ,'' ಎಂದು ಅವರು ಈ ಹಿಂದೆ ಹೇಳಿದ್ದರು.