ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಬ್ರಿಟನ್‌ನ ಪ್ರಿನ್ಸ್‌ ಹ್ಯಾರಿ ದಂಪತಿ

ಲಂಡನ್‌: ಬ್ರಿಟಿಷ್‌ ರಾಜಮನೆತನ ಮತ್ತೊಂದು 'ರಾಯಲ್‌ ಬೇಬಿ'ಯ ಆಹ್ವಾನಕ್ಕೆ ಸಜ್ಜಾಗುತ್ತಿದೆ. ಐದು ತಿಂಗಳ ಹಿಂದೆ ದಾಂಪತ್ಯಕ್ಕೆ ಕಾಲಿರಿಸಿದ ಯುವರಾಜ ಪ್ರಿನ್ಸ್‌ ಹ್ಯಾರಿ ಮತ್ತು ಮೇಘನ್‌ ಮರ್ಕೆಲ್‌ ದಂಪತಿ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. 2019ರ ಏಪ್ರಿಲ್‌-ಮೇ ತಿಂಗಳಲ್ಲಿ ಹೊಸ ವಂಶದ ಕುಡಿಯ ಆಗಮನವಾಗಲಿದೆ. ರಾಜಮನತೆನದ ಕಾರ್ಯಕ್ರಮವೊಂದರಲ್ಲಿ ರಾಣಿ ಎಲಿಜಬತ್‌ ಶುಭಸುದ್ದಿಯನ್ನು ಅಧಿಕೃತವಾಗಿ ಪ್ರಕಟಿಸಿದ್ದಾರೆ. ''ಮೇಘನ್‌(37) ಆರೋಗ್ಯದಿಂದಿದ್ದು, ಈ ಸುದ್ದಿಯಿಂದ ರಾಜ ಕುಟುಂಬದಲ್ಲಿ ಸಂಭ್ರಮ ಮನೆಮಾಡಿದೆ,'' ಎಂದು ಅರಮನೆಯ ಪ್ರಕಟಣೆ ತಿಳಿಸಿದೆ.

ಕಳೆದ ಮೇನಲ್ಲಿ ಮದುವೆಯಾಗಿದ್ದ ಹ್ಯಾರಿಸ್‌ ದಂಪತಿ, ಇದೇ ಮೊದಲ ಬಾರಿಗೆ ಆಸ್ಪ್ರೇಲಿಯಾ ಪ್ರವಾಸ ಕೈಗೊಂಡಿದ್ದು, ಸೋಮವಾರ ಸಿಡ್ನಿಗೆ ಬಂದಿಳಿದಿದ್ದಾರೆ. ಇದೇ ಸಂದರ್ಭದಲ್ಲಿ ಹೊಸ ವಂಶಕುಡಿಯ ಆಗಮನದ ಸುದ್ದಿ ಹೊರಬಿದ್ದಿದೆ. ಫಿಜಿ, ಟೋಂಗಾ, ನ್ಯೂಜಿಲೆಂಡ್‌ಗೂ ದಂಪತಿ ಪ್ರವಾಸ ಕೈಗೊಳ್ಳಲಿದ್ದಾರೆ. ಝಿಕಾ ವೈರಸ್‌ ಸೋಂಕು ಭೀತಿಯ ನಡುವೆಯೂ ಮರ್ಕೆಲ್‌ ಪೆಸಿಫಿಕ್‌ ದ್ವೀಪಗಳಿಗೆ ಪ್ರಯಾಣ ಬೆಳೆಸಲಿದ್ದಾರೆ.