ಯುದ್ಧ ಕೊನೆಗಾಣಿಸಲು ದ.ಕೊರಿಯಾ ಅಧ್ಯಕ್ಷರಿಂದ ಚೀನಾದೊಂದಿಗೆ 'ಕೂಡಿ ಬಾಳುವ' ಇಂಗಿತ!

ಸಿಯೋಲ್: ಕೊರಿಯನ್ ದ್ವೀಪದಲ್ಲಿ ಯುದ್ಧ ಕೊನೆಗಾಣಿಸಲು ನಾವು ಚೀನಾದೊಂದಿಗೆ ಕೂಡಿ ಕೆಲಸ ಮಾಡಲು ಸಿದ್ಧವಿರುದಾಗಿ, ದಕ್ಷಿಣ ಕೊರಿಯಾ ಅಧ್ಯಕ್ಷ ಮೂನ್ ಜೇ-ಇನ್ ಸ್ಪಷ್ಟಪಡಿಸಿದ್ದಾರೆ.

ದೀರ್ಘ ಕಾಲದ ಕೊರಿಯನ್ ಯುದ್ಧವನ್ನು ಕೊನೆಗಾಣಿಸುವ ಸಮಯ ಬಂದಿದ್ದು, ಇದಕ್ಕಾಗಿ ನೆರೆಯ ಚೀನಾದೊಂದಿಗೆ ಸಹಕರಿಸಲು ಸಿದ್ಧ ಎಂದು ಮೂನ್ ಜೇ-ಇನ್ ಅಭಿಪ್ರಾಯಪಟ್ಟಿದ್ದಾರೆ.

ಕೊರಿಯನ್ ದ್ವೀಪ ಸಮೂಹದಲ್ಲಿ ಶಾಶ್ವತ ಶಾಂತಿ ಸ್ಥಾಪನೆಗಾಗಿ ನಾವು ಕೆಲಸ ಮಾಡಬೇಕಿದೆ. ದೀರ್ಘ ಕಾಲದ ಯುದ್ಧದಿಂದ ದಕ್ಷಿಣ ಕೊರಿಯಾ ಹಾಗೂ ಉತ್ತರ ಕೊರಿಯಾ ಜರ್ಜರಿತವಾಗಿದ್ದು, ಶಾಂತಿ ಸ್ಥಾಪನೆಯೊಂದೇ ಸಮಸ್ಯೆಗೆ ಪರಿಹಾರ ಎಂದು ಮೂನ್ ಜೇ-ಇನ್ ನುಡಿದಿದ್ದಾರೆ.

ಸೇನಾ ಕಾರ್ಯಾಚರಣೆ ಕಾದಿದೆ: ದ.ಕೊರಿಯಾಗೆ ವಿನಾಶದ ಬೆದರಿಕೆ ಹಾಕಿದ ಕಿಮ್ ತಂಗಿ!

ಚೀನಾದ ವಿದೇಶಾಂಗ ಸಚಿವ ವಾಂಗ್ ವೈ ಅವರೊಂದಿಗೆ ನಡೆದ ಸಭೆಯ ಬಳಿಕ ಮಾತನಾಡಿದ ಮೂನ್ ಜೇ-ಇನ್, ಕೊರಿಯನ್ ದ್ವೀಪದಲ್ಲಿ ಶಾಂತಿ ಸ್ಥಾಪನೆಗೆ ಚೀನಾದ ನೆರವಿನ ಅವಶ್ಯಕತೆ ಇದೆ ಎಂದು ಹೇಳಿದರು.

ಇದೇ ವೇಳೆ ಕೊರೊನಾ ವೈರಸ್ ಹಾವಳಿ ನಿಯಂತ್ರಿಸುವ ಕುರಿತು ಇಬ್ಬರೂ ನಾಯಕರು ಚರ್ಚೆ ನಡೆಸಿದರು ಎಂದು ದಕ್ಷಿಣ ಕೊರಿಯಾ ಸರ್ಕಾರದ ಮೂಲಗಳು ಖಚಿತಪಡಿಸಿವೆ.

ಉ.ಕೊರಿಯಾ ಗರಂ?:
ಇನ್ನು ಚೀನಾ ವಿದೇಶಾಂಗ ಸಚಿವ ವಾಂಗ್ ವೈ ಅವರ ದಕ್ಷಿಣ ಕೊರಿಯಾ ಭೇಟಿಯಿಂದ, ಉತ್ತರ ಕೊರಿಯಾ ಮುನಿಸಿಕೊಂಡಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.

ದ.ಕೊರಿಯಾ ವಿರುದ್ಧ ಮಿಲಿಟರಿ ಕಾರ್ಯಾಚರಣೆಗೆ ಉ.ಕೊರಿಯಾ ಬ್ರೇಕ್: ಇಷ್ಟೊಳ್ಳೆ ಬುದ್ಧಿ ಹೇಗೆ ಬಂತು?

ತನ್ನ ದೀರ್ಘ ಕಾಲದ ಸೈದ್ಧಾಂತಿಕ ಸ್ನೇಹಿತನಾಗಿರುವ ಚೀನಾ, ತನ್ನ ಗಮನಕ್ಕೂ ತರದೇ ದಕ್ಷಿಣ ಕೊರಿಯಾಗೆ ತನ್ನ ವಿದೇಶಾಂಗ ಸಚಿವರನ್ನು ಕಳುಹಿಸಿರುವುದು ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್‌ನನ್ನು ಕೆರಳಿಸಿದೆ ಎನ್ನಲಾಗಿದೆ.