ವಾಷಿಂಗ್ಟನ್: ಅಮೆರಿಕನ್ ಕಂಪನಿಗಳು ಎಚ್-1ಬಿ ಹಾಗೂ ಎಲ್-1 ವೀಸಾ ವ್ಯವಸ್ಥೆಯನ್ನು ದುರುಪಯೋಗ ಪಡಿಸಿಕೊಂಡು ಕಡಿಮೆ ವೆಚ್ಚದಲ್ಲಿ ವಿದೇಶಿ ಉದ್ಯೋಗಿಗಳನ್ನು ಕರೆ ತರುವುದಕ್ಕೆ ಕಡಿವಾಣ ಹಾಕಬೇಕು ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಪ್ರಭಾವಿ ಕಾಂಗ್ರೆಸ್ ಸದಸ್ಯರ ತಂಡ ಒತ್ತಾಯಿಸಿದೆ.
ಜಾರಿಗೊಳಿಸಲು ಉದ್ದೇಶಿಸಿರುವ ಹೊಸ ವೀಸಾ ನೀತಿಯಿಂದ ಕೌಶಲ್ಯಯುತ, ಅರ್ಹರಿಗೆ ಅವಕಾಶ ಹೆಚ್ಚಾಗಲಿದ್ದು, ಇದರಿಂದ ಭಾರತೀಯರಿಗೆ ಅನುಕೂಲವಾಗಲಿದೆ ಎಂದು ಹೇಳಾಗುತ್ತಿದೆ.
ಮಂಗಳವಾರ ಬಹಿರಂಗಗೊಂಡಿರುವ ಪತ್ರದಲ್ಲಿ ಅಮೆರಿಕನ್ನರ ಹಿತಾಸಕ್ತಿಯನ್ನು ಕಾಪಾಡಿ, ಕೌಶಲ್ಯಯುತ ಅಮೆಕನ್ನರನ್ನು ಉದ್ಯೋಗವಂಚಿತರಾಗಿ ಮಾಡುತ್ತಿರುವ ಕಂಪನಿಗಳಿಗೆ ಬುದ್ಧಿ ಕಲಿಸುವ ನಿಟ್ಟಿನಲ್ಲಿ ತಾವು ಈ ವೀಸಾ ವ್ಯವಸ್ಥೆಯ ಲೋಪದೋಷಗಳನ್ನು ಸರಿಪಡಿಸಲು ಕಾನೂನನ್ನು ಪರಿಚಯಿಸಿದ್ದಾಗಿ ತಂಡ ಹೇಳಿಕೊಂಡಿದೆ.
'ಕೆಲವು ಸಂಸ್ಥೆಗಳು ಅಮೆರಿಕನ್ನರಿಗೆ ಉದ್ಯೋಗ ನೀಡುವ ಬದಲು ಕಡಿಮೆ ವೆಚ್ಚದಲ್ಲಿ ವಿದೇಶಿ ಉದ್ಯೋಗಿಗಳಿಗೆ ಮಣೆ ಹಾಕುತ್ತಿವೆ. ಅಧ್ಯಕ್ಷರಾದ ನೀವು ಎಚ್-1ಬಿ ದುರುಪಯೋಗವನ್ನು ತಪ್ಪಿಸಿ ಎಂದು ಮನವಿ ಮಾಡಿಕೊಳ್ಳುತ್ತಿದ್ದೇವೆ. ಕಾನೂನಿನಲ್ಲಿಯೇ ಲೋಪದೋಷಗಳಿರುವ ಕಾರಣ ಈ ಬದಲಾವಣೆ ಕಾನೂನಾತ್ಮಕವಾಗಿಯೇ ನಡೆಯಬೇಕು ಎಂಬುದು ನಮ್ಮ ನಂಬಿಕೆ,' ಎಂದು ಪತ್ರದಲ್ಲಿ ಬರೆಯಲಾಗಿದೆ.
'ಅಮೆರಿಕನ್ನರ ಹಿತಾಸಕ್ತಿಯನ್ನು ಕಾಪಾಡುವ ನಿಟ್ಟಿನಲ್ಲಿ ನಾವು ಪರಿಚಯಿಸಿರುವ ವಿಧೇಯಕದಿಂದ ಎಚ್-1ಬಿ ವೀಸಾ ವ್ಯವಸ್ಥೆಯನ್ನು ಕೇವಲ ಉನ್ನತ ಕೌಶಲ್ಯ ಹೊಂದಿರುವ ವಿದೇಶಿ ಉದ್ಯೋಗಿಗಳಿಗೆ ಮಾತ್ರ ಸೀಮಿತವಾಗಲಿದೆ,' ಎಂದು ತಂಡ ತಿಳಿಸಿದೆ. ಟ್ರಂಪ್ ಆಡಳಿತ ಸದ್ಯಕ್ಕೆ ಎಚ್-1ಬಿ ವೀಸಾ ವ್ಯವಸ್ಥೆಯನ್ನು ಪುನರ್ಪರಿಶೀಲಿಸುತ್ತಿದೆ. ಕಾಂಗ್ರೆಸ್ ಸದಸ್ಯ ಬಿಲ್ ಪಾಸ್ಕ್ರೆಲ್ ನೇತೃತ್ವದ ತಂಡ ಪತ್ರ ಬರೆದಿದ್ದು, ರಿಚರ್ಡ್ ಡರ್ಬಿನ್, ದೇವ್ ಬ್ರಾಟ್, ರೋ ಖನ್ನಾ ಹಾಗೂ ಪಾಲ್ ಎ ಗೊಸರ್ ಸಹಿ ಮಾಡಿದ್ದಾರೆ.
ನೂತನ ಕಾಯಿದೆ: ನೂತನ ವಿಧೇಯಕದಿಂದ ಪ್ರಸ್ತುತ ಕಾಯಿದೆಯಲ್ಲಿರುವ ಲೋಪದೋಷಗಳನ್ನು ಸರಿಪಡಿಸಲಾಗುವುದು. ಜತೆಗೆ ಅಮೆರಿಕನ್ ಉದ್ಯೋಗಿಗಳ ಜಾಗಕ್ಕೆ ವಿದೇಶಿ ಉದ್ಯೋಗಿಗಳನ್ನು ಕರೆತರುವುದನ್ನು ನಿಯಂತ್ರಿಸುವುದಲ್ಲದೆ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡುವಾಗಲೂ ಅಮೆರಿಕನ್ನರಿಗೆ ಮೊದಲ ಆದ್ಯತೆ ನೀಡುವಂತೆ ಸೂಚಿಸಲಾಗಿದೆ ಎಂದು ಸದಸ್ಯರು ಹೇಳಿದ್ದಾರೆ. ಅಲ್ಲದೆ ವಿದೇಶಿ ಉದ್ಯೋಗಿಗಳಿಗೂ ಉತ್ತಮ ವೇತನ ನೀಡುವಂತೆ ನೂತನ ಕಾಯಿದೆಯಲ್ಲಿ ಶಿಫಾರಸು ಮಾಡಲಾಗಿದೆ.
ಸದ್ಯಕ್ಕೆ ಎಚ್-1ಬಿ ವೀಸಾ ವ್ಯವಸ್ಥೆ ಅಡಿಯಲ್ಲಿ ಭೌಗೋಳಿಕ ಪ್ರದೇಶಕ್ಕನುಗುಣವಾಗಿ ವಿಭಿನ್ನ ವೇತನ ನೀಡಲಾಗುತ್ತಿದೆ. ಕೇವಲ ವಿದೇಶಿ ಉದ್ಯೋಗಿಗಳಿಗೂ ಹೆಚ್ಚಿನ ವೇತನ ನೀಡುವಂತೆ ಕಾನೂನು ಮಾಡಿದಲ್ಲಿ ಸಾಕಾಗುವುದಿಲ್ಲ ಎಂದು ಅಭಿಪ್ರಾಯ ಪಟ್ಟಿರುವ ತಂಡ ಎಲ್ಲಾ ವರ್ಗಗಳಿಗೂ, ಎಲ್ಲಾ ಪ್ರದೇಶಗಳಿಗೂ ಒಂದೇ ರೀತಿಯ ವೇತನ ನೀಡುವಂತೆ ಕಠಿಣ ಕಾನೂನು ರೂಪಿಸಬೇಕು ಎಂದಿದೆ.