ಇಂಗ್ಲೆಂಡ್‌ನಲ್ಲಿ ಕೊರೊನಾ ಹೊಸ ರೂಪಾಂತರ ಪತ್ತೆ: ವೇಗವಾಗಿ ಹರಡುತ್ತಿರುವ ಆತಂಕ!

ಲಂಡನ್: ಇನ್ನೇನು ಕೊರೊನಾ ವೈರಸ್ ಲಸಿಕೆಯ ಸಾರ್ವತ್ರಿಕ ಬಳಕೆಯಿಂದಾಗಿ, ಮಾರಕ ವೈರಾಣು ತೊಲಗಲಿದೆ ಎಂದು ನಿಟ್ಟುಸಿರು ಬಿಟ್ಟಿದ್ದ ಇಂಗ್ಲೆಂಡ್ ಜನತೆಗೆ ಇದೀಗ ಮತ್ತೊಂದು ಆಘಾತ ಎದುರಾಗಿದೆ.

ಹೌದು, ರಾಜಧಾನಿ ಲಂಡನ್‌ನಲ್ಲಿ ಮತ್ತೆ ಕೊರೊನಾ ವೈರಸ್ ಸೋಂಕು ಹೆಚ್ಚಾಗಿದ್ದು, ಈ ಹಿನ್ನೆಲೆಯಲ್ಲಿ ಮೂರನೇ ಹಂತದ ಕೊರೊನಾ ನಿರ್ಬಂಧ ಮಾರ್ಗಸೂಚಿಗಳನ್ನು ಬ್ರಿಟನ್ ಸರ್ಕಾರ ಬಿಡುಗಡೆ ಮಾಡಲಿದೆ ಎಂದು ಆರೋಗ್ಯ ಕಾರ್ಯದರ್ಶಿ ಮ್ಯಾಟ್ ಹ್ಯಾನ್‌ಕಾಕ್ ಮಾಹಿತಿ ನೀಡಿದ್ದಾರೆ.

ವೈದ್ಯ ವಿಜ್ಞಾನಿಗಳು ಇಂಗ್ಲೆಂಡ್‌ನ ದಕ್ಷಿಣ ಭಾಗದಲ್ಲಿ ವೈರಸ್‌ನ ಹೊಸ ರೂಪಾಂತರವನ್ನು ಗುರುತಿಸಿದ್ದಾರೆ. ಇದು ಸೋಂಕುಗಳು ವೇಗವಾಗಿ ಹರಡಲು ಕಾರಣವಾಗಬಹುದು ಎಂಬ ಆತಂಕವಿದೆ ಎಂದು ಹ್ಯಾನ್‌ಕಾಕ್ ಹೇಳಿದ್ದಾರೆ.

ಇವರೇ ನೋಡಿ ವಿಶ್ವದಲ್ಲೇ ಮೊದಲ ಕೊರೊನಾ ಲಸಿಕೆ ಪಡೆದ ಬ್ರಿಟನ್‌ನ 90 ವರ್ಷದ ಅಜ್ಜಿ!

ಈ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ಕ್ರಮವಾಗಿ ಲಂಡನ್ ನಗರದಲ್ಲಿ ಮೂರನೇ ಹಂತದ ಅತ್ಯಂತ ಕಟ್ಟುನಿಟ್ಟಿನ ಕೊರೊನಾ ಮಾರ್ಗಸೂಚಿಗಳನ್ನು ಜಾರಿಗೊಳಿಸಲು ನಿರ್ಧರಿಸಲಾಗಿದೆ. ಬುಧವಾರದಿಂದ ಈ ಮಾರ್ಗಸೂಚಿಗಳು ಜಾರಿಯಾಗಲಿವೆ ಎಂದು ಹ್ಯಾನ್‌ಕಾಕ್ ಸ್ಪಷ್ಟಪಡಿಸಿದ್ದಾರೆ.

ಮೂರನೇ ಹಂತದ ನಿರ್ಬಂಧ ಮಾರ್ಗಸೂಚಿಯಲ್ಲಿ ಪಬ್‌ಗಳು, ಬಾರ್‌ಗಳು ಹಾಅಗೂ ಕಾಫಿ ಶಾಪ್‌ಗಳನ್ನು ಸಂಪೂರ್ಣವಾಗಿ ಬಂದ್ ಮಾಡಲಾಗುವುದು. ಅಲ್ಲದೇ ಕೇವಲ ಟೇಕ್ ಅವೇ ವ್ಯವಸ್ಥೆಗೆ ಮಾತ್ರ ಅವಕಾಶ ಕಲ್ಪಿಸಲಾಗುವುದು ಎಂದು ಹ್ಯಾನ್‌ಕಾಕ್ ಮಾಹಿತತಿ ನೀಡಿದ್ದಾರೆ.

ಇನ್ನು ಸಾರ್ವಜನಿಕವಾಗಿ ಕೇವಲ ಆರು ಜನ ಮಾತ್ರ ಒಂದೆಡೆ ಸೇರಲು ಅನುಮತಿ ನೀಡಲಾಗಿದ್ದು, ಗುಂಪು ಸಮಾರಂಭಗಳನ್ನು ಸಂಪೂರ್ಣವಾಗಿ ನಿಷೇಧಿಸಲು ಸರ್ಕಾರ ನಿರ್ಧರಿಸಿದೆ.

ಮುಂದಿನ ವಾರದಿಂದಲೇ ಬ್ರಿಟನ್‌ನ ಎಲ್ಲಾ ನಾಗರಿಕರಿಗೆ ಕೊರೊನಾ ಲಸಿಕೆ: ಫೈಜರ್‌ಗೆ ಜೈ ಎಂದ ಮೊದಲ ರಾಷ್ಟ್ರ!

ಒಟ್ಟಿನಲ್ಲಿ ಇಂಗ್ಲೆಂಡ್‌ನಲ್ಲಿ ಕೊರೊನಾ ವೈರಸ್ ಹೊಸ ರೂಪಾಂತರ ಆತಂಕ ಸೃಷ್ಟಿಸಿದ್ದು, ಇದು ಮತ್ತಷ್ಟು ಅನಾಹುತಗಳನ್ನು ತಂದೊಡ್ಡದಿರಲಿ ಎಂಬುದೇ ಎಲ್ಲರ ಆಶಯವಾಗಿದೆ.