ನೇಚರ್ ನ್ಯೂರೋ ಸೈನ್ಸ್ ಎಂಬ ನಿಯತ ಕಾಲಿಕೆಯಲ್ಲಿ ಈ ಕುರಿತಂತೆ ಅಧ್ಯಯನ ವರದಿ ಪ್ರಕಟವಾಗಿದೆ. ಈ ಅಧ್ಯಯನ ನಡೆಸಲು 4,35,000 ಜನರ ದೇಹಸ್ಥಿತಿಯನ್ನು ಅಧ್ಯಯನ ಮಾಡಿ, ಅವರ ವಂಶವಾಹಿಗಳನ್ನು ಸಂಶೋಧಿಸಿ ಈ ವರದಿ ಸಿದ್ದಪಡಿಸಲಾಗಿದೆ. ವಾರದಲ್ಲಿ 14ಕ್ಕೂ ಹೆಚ್ಚು ಬಾರಿ ಮದ್ಯ ಸೇವಿಸುವ, ಮದ್ಯಕ್ಕೆ ದಾಸರಾಗಿರುವ ವ್ಯಸನಿಗಳ ವಂಶವಾಹಿಯನ್ನೇ ಈ ಸಂಶೋಧನೆಗೆ ಬಳಸಿಕೊಳ್ಳಲಾಗಿದೆ.
ಕುಡಿತದಿಂದ 29 ಬಗೆಯ ವಂಶವಾಹಿ ಸಮಸ್ಯೆ..!
ಈ ವಂಶವಾಹಿಗಳ ಅಧ್ಯಯನದ ಪ್ರಕಾರ, 19 ಬಗೆಯ ವಿನೂತನ ಅನುವಂಶಿಕ ಸಮಸ್ಯೆಗಳನ್ನು ಗುರ್ತಿಸಲಾಗಿದೆ. ಈ ಹಿಂದೆ 10 ಬಗೆಯ ಅನುವಂಶಿಕ ಸಮಸ್ಯೆಗಳನ್ನು ಗುರ್ತಿಸಲಾಗಿತ್ತು. ಇದೀಗ ಕುಡಿತದಿಂದ ಆಗುವ ಅನುವಂಶಕ ಸಮಸ್ಯೆಗಳ ಪಟ್ಟಿಗೆ ಇನ್ನೂ 19 ಸಮಸ್ಯಗಳು ಹೆಚ್ಚುವರಿಯಾಗಿ ಸೇರ್ಪಡೆಯಾಗಿವೆ. ಈ ಮೂಲಕ, ಕುಡುಕರು 29 ಬಗೆಯ ವಂಶವಾಹಿ ಸಮಸ್ಯೆಗಳಿಗೆ ತುತ್ತಾಗುತ್ತಾರೆ ಎಂದು ಅಧ್ಯಯನ ವರದಿ ಘಂಟಾಘೋಷವಾಗಿ ಹೇಳುತ್ತಿದೆ.
ಮದ್ಯವನ್ನು ಅನಿಯಮಿತವಾಗಿ ಬಳಸುವುದರಿಂದ ಮೊದಲು ಅದು ಪರಿಣಾಮ ಬೀರೋದು ಮಿದುಳಿನ ಮೇಲೆ. ಹೀಗಾಗಿ, ಕುಡುಕರು ಮೊದಲು ತಮ್ಮ ಮಿದುಳಿನ ಮೇಲೆ ನಿಯಂತ್ರಣ ಕಳೆದುಕೊಳ್ಳುತ್ತಾರೆ. ಈ ಮೂಲಕ ಅನಿಯಮಿತವಾಗಿ ಕುಡಿದು, ಮದ್ಯಕ್ಕೆ ದಾಸರಾಗಿಬಿಡುತ್ತಾರೆ. ಕುಟುಂಬದೊಂದಿಗೆ ಭಾವನಾತ್ಮಕವಾಗಿ ಸ್ಪಂದಿಸೋದನ್ನೂ ಕುಡುಕರು ಕಡಿಮೆ ಮಾಡುತ್ತಾರೆ ಎನ್ನುತ್ತಾರೆ, ರಾಷ್ಟ್ರೀಯ ಆರೋಗಯ ಸಂಸ್ಥೆಯ ತಜ್ಞರು.
ಅಮೆರಿಕದ ಒಂದೂವರೆ ಕೋಟಿ ಮಂದಿ ಬಾಧಿತರು..!
ಹಾಗೆ ನೋಡಿದರೆ ಅಮೆರಿಕ ದೇಶವೊಂದರಲ್ಲೇ ಒಂದೂವರೆ ಕೋಟಿ ಮಂದಿ ನಿಯಂತ್ರಣವಿಲ್ಲದೆ ಕುಡಿಯುವ ಚಟಕ್ಕೆ ದಾಸರಾಗಿದ್ದಾರೆ. ಅಮೆರಿಕದಲ್ಲಿ ಕುಡಿತ ಅನ್ನೋದು ಅತಿದೊಡ್ಡ ಸಮಸ್ಯೆಯಾಗಿದೆ. ಹಾಗೆ ನೋಡಿದ್ರೆ, ವಿಶ್ವದೆಲ್ಲೆಡೆಯೂ ಕುಡಿತವೇ ಅತಿ ದೊಡ್ಡ ಸಮಸ್ಯೆ. ಹೀಗಾಗಿ, ಕುಡಿತವನ್ನು ಜಾಗತಿಕ ಸಮಸ್ಯೆ ಎನ್ನದೆ ವಿಧಿಯಿಲ್ಲ. ಹೀಗಾಗಿ, ಕುಡಿತ ಹಾಗೂ ಕುಡುಕರ ದೇಹ ಸ್ಥಿತಿ ಕುರಿತಂತೆ ಸಾಕಷ್ಟು ಅಧ್ಯಯನಗಳು ನಡೆದಿವೆ. ಕುಡಿತದ ಚಟದಿಂದ ಹೊರಬರುವಂತಾಗಲು ತುಂಬಾ ಕಡಿಮೆ ಚಿಕಿತ್ಸೆಗಳು ಸದ್ಯ ಲಭ್ಯ ಇವೆ. ಈ ನಿಟ್ಟಿನಲ್ಲಿ ವೈದ್ಯಕೀಯ ರಂಗ ಹೆಚ್ಚಿನ ಮುನ್ನಡೆ ಸಾಧಿಸಬೇಕಾದ್ರೆ, ವಂಶವಾಹಿಗಳ ಅಧ್ಯಯನ ನಡೆಸಬೇಕಾದ ಅಗತ್ಯತೆ ಇದೆ.
ಐರೋಪ್ಯ ಮೂಲದ ಜನರ ವಂಶ ವಾಹಿಗಳ ಸಂಶೋಧನೆ ಈಗಾಗಲೇ ನಡೆಯುತ್ತಿದೆ. ಆದ್ರೆ, ಇದು ಸಾಕಾಗೋದಿಲ್ಲ ಎನ್ನುತ್ತಾರೆ ಯಾಲೆ ವಿವಿ ಸಂಶೋಧಕ ಹ್ಯಾಗ್ ಝೂ. ಇವರ ಪ್ರಕಾರ, ವಂಶವಾಹಿ ಮೂಲ ಒಂದು ಜನಸಮೂಹದಿಂದ ಮತ್ತೊಂದಕ್ಕೆ ವಿಭಿನ್ನವಾಗಿರುತ್ತೆ. ಹೀಗಾಗಿ, ಯಾವುದೇ ಒಂದು ಸಂಶೋಧನೆ ಇಡೀ ಮಾನವ ಸಮುದಾಯಕ್ಕೆ ಅನ್ವಯಿಸಲು ಸಾಧ್ಯವಿಲ್ಲ. ಕೆಲವು ಜನರಿಗೆ ಅನ್ವಯಿಸುವ ಪರಿಣಾಮಗಳು ಹೆಚ್ಚಿನವರು ಅನ್ವಯ ಆಗದೆ ಇರಬಹುದು.
ತಲೆಮಾರುಗಳಿಂದ ಕುಡಿತದ ಚಟವಿದ್ದರೆ ಜಾಗೃತರಾಗಿರಿ..!
ಸಂಶೋಧನೆಗಳ ಪ್ರಕಾರ, ಆಲ್ಕೋಹಾಲ್ನ ಬಳಕೆಯಿಂದ ಮಾನವನ ವಂಶವಾಹಿಗಳ ಮೇಲೆ ಭಾರೀ ಪರಿಣಾಮ ಬೀರೋದಂತೂ ಸತ್ಯ. ಕೆಲವು ವಂಶವಾಹಿಗಳು ಮಾನವನ ದೇಹದಲ್ಲಿ ವ್ಯತಿರಿಕ್ತ ಪರಿಣಾಮ ಬೀರಬಹುದು. ಹೀಗಾಗಿ, ಮಾನವನ ದೇಹದಲ್ಲಿರುವ ಎಲ್ಲಾ ರೀತಿಯ ವಂಶವಾಹಿಗಳನ್ನೂ ಪರೀಕ್ಷಿಸಬೇಕು, ಇವುಗಳ ಮೇಲೆ ಕುಡಿತದಿಂದಾಗುವ ಪರಿಣಾಮಗಳನ್ನು ಪರೀಕ್ಷಿಸಬೇಕಿದೆ.
ಕುಟುಂಬವೊಂದರಲ್ಲಿ ತಲೆಮಾರುಗಳಿಂದ ಆಲ್ಕೋಹಾಲ್ ಸೇವನೆಯ ಚಟವಿದ್ದರೆ, ಆ ಕುಟುಂಬದ ಮುಂದಿನ ಸಂತತಿ, ಆಲ್ಕೋಹಾಲ್ ವಿಚಾರದಲ್ಲಿ ಸಾಕಷ್ಟು ಜಾಗೃತರಾಗಿ ಇರಬೇಕಾಗುತ್ತೆ. ಆಲ್ಕೋಹಾಲ್ನ ಅಡ್ಡ ಪರಿಣಾಮಗಳು ಅವರ ವಂಶವಾಹಿಯಲ್ಲೇ ಅಡಕವಾಗಿರುವ ಕಾರಣ, ಕಡಿಮೆ ಪ್ರಮಾಣದ ಕುಡಿತ ಕೂಡಾ ಹೆಚ್ಚಿನ ಪರಿಣಾಮ ಬೀರಬಲ್ಲದು.
ಆಲ್ಕೋಹಾಲ್ ಪರಿಣಾಮ ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನ..!
ಈ ಎಲ್ಲಾ ಸಂಶೋಧನೆಗಳಿಂದ ತಿಳಿದು ಬರುವ ಪ್ರಮುಖ ವಿಚಾರವೆಂದರೆ, ಆಲ್ಕೋಹಾಲ್ನಿಂದ ಆಗುವ ಅನುವಂಶಿಕ ಸಮಸ್ಯೆಗಳ ವಿಚಾರದಲ್ಲಿ ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾದ ಫಲಿತಾಂಶ ಬರಬಹುದು. ಹೀಗಾಗಿ, ವೈಯಕ್ತಿಕವಾಗಿ ಪರೀಕ್ಷೆ, ಚಿಕಿತ್ಸೆ ನೀಡುವ ವಿಧಾನಕ್ಕೆ ಬಹುತೇಕ ತಜ್ಞರು ಸಮ್ಮತಿ ಸೂಚಿಸುತ್ತಾರೆ.
ಔಷಧಗಳು, ಮಾನಸಿಕ ಚಿಕಿತ್ಸೆ, ಥೆರಪಿಗಳು ಹಾಗೂ ಕೆಲವೊಂದು ಸನ್ನಿವೇಶದಲ್ಲಿ ಕೆಲವರಿಗೆ ಎಲ್ಲ ರೀತಿಯ ಚಿಕಿತ್ಸೆಗಳೂ ಬೇಕಾಗಬಹುದು. ಕುಡಿತದಿಂದ ಬಾಧಿತರಾಗಿರುವ ವ್ಯಕ್ತಿಗಳಿಗೆ ನೀಡುವ ಚಿಕಿತ್ಸೆ ಸದಾ ಕಾಲ ವೈಯಕ್ತಿಕ ಮಟ್ಟದಲ್ಲಿ ನಿರ್ಧಾರವಾಗಬೇಕು ಎನ್ನುತ್ತಾರೆ ತಜ್ಞರು. ಅವರವರ ಅನುವಂಶೀಯತೆ, ವಂಶವಾಹಿ ಮೇಲೆ ಆಲ್ಕೋಹಾಲ್ ಬೀರಿರುವ ಪ್ರಭಾವದ ಮೇಲೆ ಚಿಕಿತ್ಸೆಯ ತೀವ್ರತೆ ನಿರ್ಧಾರವಾಗುತ್ತೆ. ಕೆಲವರಿಗೆ ಮನೆಯಲ್ಲೇ ದೀರ್ಘಕಾಲ ಚಿಕಿತ್ಸೆ ನೀಡಬೇಕಾದ ಸಂದರ್ಭವೂ ಬರಬಹುದು ಎನ್ನುತ್ತಾರೆ ತಜ್ಞರು.