ಭಾರತೀಯ ರಾಜಮನೆತನದ ಒಡವೆಗಳ ಲಿಲಾವು

ಲಂಡನ್‌: ಅನಾಮಿಕ ಭಾರತೀಯ ರಾಜಮನೆತನಕ್ಕೆ ಸೇರಿದ ವಿವಿಧ ಆಭರಣಗಳು ಈ ತಿಂಗಳ 19ರಂದು ಇಲ್ಲಿ ನಡೆಯುವ ಅಂತಾರಾಷ್ಟ್ರೀಯ ಮಟ್ಟದ ಹರಾಜಿನಲ್ಲಿ ಶ್ರೀಮಂತರ ಕೈ ಸೇರಲು ಕಾದು ಕುಳಿತಿವೆ.

ಬ್ರಿಟನ್‌ನಲ್ಲಿ ನೆಲೆಸಿರುವ ಕುಟುಂಬವು ತನ್ನ ವಿವರವನ್ನು ಅಜ್ಞಾತವಾಗಿಡಲು ಬಯಸಿದ್ದು, ತಲೆತಲಾಂತರದಿಂದ ಉಳಿದು ಬಂದ ಕೆಲವು ಅತ್ಯಮೂಲ್ಯ ಆಭರಣಗಳನ್ನು ಹರಾಜಿಗಿಟ್ಟಿದೆ. ಬೊನ್ಹಾಮ್ಸ್‌ ಭಾರತೀಯ ಮತ್ತು ಇಸ್ಲಾಮಿಕ್‌ ಕಲಾ ಮಾರಾಟ ಮಳಿಗೆಯಲ್ಲಿ ಏ.19ರಂದು ನಿಗದಿಯಾಗಿರುವ ಹರಾಜಿನಲ್ಲಿ ಮಾವಿನ ವಿನ್ಯಾಸದ ಸರ, ವಜ್ರ ಹರಳು ಖಚಿತ ಬಾಕು, ಪಚ್ಚೆ, ವಜ್ರಗಳುಳ್ಳ ಬೆಲ್ಟಿನ ಕೊಂಡಿ, ವಂಕಿ ಮುಂತಾದ ಒಡವೆಗಳು ಮಾರಾಟವಾಗಲಿವೆ.

‘‘18, 19ನೇ ಶತಮಾನದ ವೈಭವೋಪೇತ ಕರಕುಶಲತೆಗೆ ಇವು ಉದಾಹರಣೆ. ಭಾರತೀಯ ರಾಜಮನೆತನಕ್ಕೆ ಸೇರಿದ ಒಡವೆಗಳನ್ನು ಚರಾಸ್ತಿಯಾಗಿ ಖರೀದಿಸಿಟ್ಟುಕೊಳ್ಳಲು ಇದು ಉತ್ತಮ ಅವಕಾಶವಾಗಿದೆ’’ ಎನ್ನುತ್ತಾರೆ ಬೊನ್ಹಾಮ್ಸ್‌ನ ಭಾರತೀಯ ಮತ್ತು ಇಸ್ಲಾಮಿಕ್‌ ಕಲಾ ತಜ್ಞೆ ರುಕ್ಮಣಿ ಕುಮಾರಿ ರಾಥೋರ್‌.

ದಕ್ಷಿಣ ಭಾರತೀಯ ವಿನ್ಯಾಸದ ಮಾಂಗಾ ಮಾಲೈ-ಮಾವಿನ ವಿನ್ಯಾಸದ ಸರವು ಹರಾಜಿನ ಪ್ರಮುಖ ಆಕರ್ಷಣೆಯಾಗಿದೆ. ಮಾಣಿಕ್ಯ ಹಾಗೂ ವಜ್ರದ ಹರಳುಗಳಿಂದ ತುಂಬಿದ ಚಿನ್ನದ ಸರವು 48 ಲಕ್ಷದಿಂದ 67 ಲಕ್ಷ ರೂ.ಗೆ ಹರಾಜಾಗುವ ಅಂದಾಜಿದೆ. ಪ್ರೀತಿ ಹಾಗೂ ಫಲವತ್ತತೆಯ ಪ್ರತೀಕವೆಂದೇ ನಂಬಿದ್ದ ‘ಮಾಂಗಾ ಮಾಲೈ’ಯನ್ನು ಶ್ರೀಮಂತ ಮಹಿಳೆಯರು ಮದುವೆ ಸಮಾರಂಭಗಳಿಗೆ ಹಾಗೂ ದೇವದಾಸಿಯರು ನೃತ್ಯ ಕಾರ್ಯಕ್ರಮಗಳಿಗೆ ಧರಿಸುತ್ತಿದ್ದರು ಎಂದು ಬೊನ್ಹಾಮ್ಸ್‌ ಹೇಳಿದೆ.

ರಾಜಸ್ಥಾನದ ಕುಶಲಕರ್ಮಿಗಳು ತಯಾರಿಸಿರಬಹುದು ಎನ್ನಲಾದ ಭಾರತೀಯ ಮೊಘಲ್‌ ದೊರೆಗಳ ಬಳಿ ಇರುತ್ತಿದ್ದ ಅಪರೂಪದ ವಜ್ರಕಚಿತ ಕಠಾರಿ ಸುಮಾರು 28ರಿಂದ 48 ಲಕ್ಷ ರೂ. ಬೆಲೆ ಬಾಳಬಹುದು. ಹಸಿರು ಹರಳುಗಳಿಂದ ಕೂಡಿದ ಸೊಂಟದ ಪಟ್ಟಿಯ ಕೊಂಡಿಯೂ ಅಂದಾಜು 22 ಲಕ್ಷ ರೂ.ಗೆ ಹರಾಜಾಗಬಹುದು ಎನ್ನಲಾಗಿದೆ.