2036ರವರೆಗೆ ರಷ್ಯಾಕ್ಕೆ ಪುಟಿನ್‌ ಅಧ್ಯಕ್ಷ‌, ಸಂವಿಧಾನ ತಿದ್ದುಪಡಿಗೆ ಭಾರಿ ಜನಬೆಂಬಲ

ಮಾಸ್ಕೊ: ನಿರೀಕ್ಷೆಯಂತೆ ಸಂವಿಧಾನ ತಿದ್ದುಪಡಿಗೆ ನಡೆದ ಜನಾಭಿಪ್ರಾಯ ಸಂಗ್ರಹದಲ್ಲಿ ಶೇ. 77ರಷ್ಟು ರಷ್ಯಾ ಪ್ರಜೆಗಳು ವ್ಲಾದಿಮಿರ್‌ ಪುಟಿನ್‌ ಆಡಳಿತಕ್ಕೆ ಮೆಚ್ಚುಗೆ ಸೂಚಿಸಿ, 2036ರವರೆಗೆ ನಮ್ಮ ಅಧ್ಯಕ್ಷರಾಗಿರಿ ಎಂಬ ಜನಾದೇಶ ನೀಡಿದ್ದಾರೆ.

ಒಂದು ವಾರದವರೆಗೆ ರಷ್ಯಾದಲ್ಲಿ ಚುನಾವಣೆಗೆ ಅವಕಾಶ ಮಾಡಿಕೊಡಲಾಗಿತ್ತು. ಸಂವಿಧಾನಕ್ಕೆ ತಿದ್ದುಪಡಿ ಮಾಡುವುದು ಬೇಕೆ ಅಥವಾ ಬೇಡವೇ ಎಂದು ಮತ ಚಲಾಯಿಸಲು ಕೇಳಲಾಗಿತ್ತು. ಆರು ವರ್ಷಗಳ ಇನ್ನೆರಡು ಅವಧಿಗೆ ಪುಟಿನ್‌ ಅಧ್ಯಕ್ಷಗಿರಿಯಲ್ಲಿ ಸಾಗುವಂತೆ ಸಂವಿಧಾನ ತಿದ್ದುಪಡಿಗೆ ರಷ್ಯನ್ನರು ಒಪ್ಪಿಗೆ ಸೂಚಿಸಿದ್ದಾರೆ.

ಇದರೊಂದಿಗೆ ಸಮಾನ ಲಿಂಗಿಗಳ ವಿವಾಹಕ್ಕೆ ನಿರ್ಬಂಧ, ಅಂತಾರಾಷ್ಟ್ರೀಯ ಕಾನೂನಿಗಿಂತ ರಷ್ಯಾದ ಸ್ಥಳೀಯ ಕಾನೂನಿಗೆ ಹೆಚ್ಚು ಪ್ರಾಮುಖ್ಯತೆ ನೀಡುವ ತಿದ್ದುಪಡಿ ಜಾರಿಗೂ ಜನಾಭಿಪ್ರಾಯ ಕೇಳಲಾಗಿತ್ತು. ಆದರೆ ಎಲ್ಲ ತಿದ್ದುಪಡಿಗಳಿಗೆ ಪ್ರತ್ಯೇಕವಾಗಿ ಮತ ಚಲಾಯಿಸುವ ಅವಕಾಶ ನೀಡಲಾಗಿರಲಿಲ್ಲ.

67 ವರ್ಷದ ಅಧ್ಯಕ್ಷ ಪುಟಿನ್‌ ಕೂಡ ತಮ್ಮ ಮತವನ್ನು ರಾಜಧಾನಿ ಮಾಸ್ಕೊದಲ್ಲಿ ಚಲಾಯಿಸಿದರು. ಅವರು ತಮ್ಮ ಪಾಸ್‌ಪೋರ್ಟ್‌ ಅನ್ನು ದಾಖಲೆಯಾಗಿ ಪ್ರದರ್ಶಿಸಿದ್ದರು. ಮತ ಚಲಾವಣೆ ವೇಳೆ ಪುಟಿನ್‌ ಅವರು ಕೊರೊನಾ ಮುನ್ನೆಚ್ಚರಿಕೆ ಕ್ರಮವಾಗಿರುವ ಮಾಸ್ಕ್‌ ಧಾರಣೆ ಮಾಡಿರಲಿಲ್ಲ. ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಟೀಕೆ ವ್ಯಕ್ತವಾಗಿದೆ.