ಇಸ್ತಾಂಬುಲ್‌ ದೂತಾವಾಸದಲ್ಲೇ ಖಶೋಗಿ ಕೊಲೆ

ರಿಯಾಧ್‌: ಸರಕಾರದ ಪ್ರಬಲ ಟೀಕಾಕಾರರಾಗಿದ್ದ ಪತ್ರಕರ್ತ ಜಮಾಲ್‌ ಖಶೋಗಿ ಅವರನ್ನು ಇಸ್ತಾಂಬುಲ್‌ನ ದೂತಾವಾಸದಲ್ಲೇ ಕೊಲೆ ಮಾಡಲಾಗಿದೆ ಎಂದು ಸೌದಿ ಅರೇಬಿಯಾ ಕೊನೆಗೂ ಒಪ್ಪಿಕೊಂಡಿದೆ. ಖಶೋಗಿ ಅವರು ನಿಗೂಢವಾಗಿ ನಾಪತ್ತೆಯಾಗಿ ಭಾರಿ ಅಂತಾರಾಷ್ಟ್ರೀಯ ಬಿಕ್ಕಟ್ಟು ನಿರ್ಮಾಣವಾದ ಹಿನ್ನೆಲೆಯಲ್ಲಿ ಎರಡು ವಾರಗಳ ಬಳಿಕ ಕೊಲೆಯನ್ನು ಒಪ್ಪಿಕೊಳ್ಳಲಾಗಿದೆ.

ಇಸ್ತಾಂಬುಲ್‌ನಲ್ಲಿರುವ ಸೌದಿ ದೂತಾವಾಸದಲ್ಲಿ ಖಶೋಗಿ ಮತ್ತು ಅವರನ್ನು ಭೇಟಿಯಾದ ವ್ಯಕ್ತಿಗಳ ನಡುವೆ ಮಾತಿನ ಚಕಮಕಿ ನಡೆದು ಕೊಲೆ ನಡೆದಿದೆ ಎಂದು ಸೌದಿ ಅಟಾರ್ನಿ ಜನರಲ್‌ ಶೇಖ್‌ ಸೌದ್‌ ಅಲ್‌-ಮೊಜೆಬ್‌ ಹೇಳಿದ್ದಾರೆ. ಆದರೆ, ಮೃತದೇಹ ಎಲ್ಲಿದೆ ಎಂದು ಹೇಳಿಲ್ಲ.

ಈ ನಡುವೆ, ಸೌದಿ ಆಡಳಿತವು ರಾಜಕುಮಾರ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಅವರ ಆಪ್ತರಾದ ಗುಪ್ತಚರ ವಿಭಾಗದ ಉಪಮುಖ್ಯಸ್ಥ ಅಲ್‌-ಅಸ್ಸಿರಿ ಮತ್ತು ರಾಯಲ್‌ ಕೋರ್ಟ್‌ನ ಮಾಧ್ಯಮ ಸಲಹೆಗಾರ ಸೌದ್‌ ಅಲ್‌ ಖಹ್ತಾನಿಯನ್ನು ಹುದ್ದೆಯಿಂದ ವಜಾಗೊಳಿಸಿದೆ.

ಸೌದಿ ಅರೇಬಿಯಾದ ಸ್ನೇಹಿತ ರಾಷ್ಟ್ರ ಎಂದೇ ಗುರುತಿಸಲಾಗಿದ್ದ ಅಮೆರಿಕ ಕೂಡ ಖಶೋಗಿ ನಾಪತ್ತೆ ವಿಷಯದಲ್ಲಿ ಗಂಭೀರ ನಡೆ ಪ್ರದರ್ಶಿಸಿತ್ತು. ಸೌದಿ ಅಧಿಕಾರಿಗಳು ಖಶೋಗಿ ಬಗ್ಗೆ ಏನೂ ತಿಳಿದಿಲ್ಲ ಎಂದೇ ಹೇಳುತ್ತಿದ್ದರು. ಒಂದೊಮ್ಮೆ ಪತ್ರಕರ್ತನ ಕೊಲೆಯಾಗಿದ್ದರೆ ಕಠಿಣ ನಿರ್ಬಂಧಗಳನ್ನು ಹೇರಬೇಕಾಗುತ್ತದೆ ಎಂದು ಅಮೆರಿಕ ಎಚ್ಚರಿಸಿತ್ತು. ಆದರೆ, ಖಶೋಗಿ ಸಾವಿನ ಸುದ್ದಿ ಕೇಳಿದ ಬಳಿಕ ಸಂತಾಪ ಮಾತ್ರ ವ್ಯಕ್ತಪಡಿಸಿರುವ ಅಮೆರಿಕ ಸೌದಿ ವಿರುದ್ಧ ಕ್ರಮ ಕೈಗೊಳ್ಳುವ ಬಗ್ಗೆ ಯಾವುದೇ ಸೂಚನೆ ನೀಡಿಲ್ಲ.

ಯಾರು ಈ ಖಶೋಗಿ?
ವಾಷಿಂಗ್ಟನ್‌ ಪತ್ರಿಕೆಗೆ ಸೌದಿ ಅರೇಬಿಯಾದ ವರದಿಗಾರರಾಗಿದ್ದ ಖಶೋಗಿ ರಾಜಕುಮಾರ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಅವರ ಕಟು ಟೀಕಾಕಾರರಾಗಿದ್ದರು. ಅಕ್ಟೋಬರ್‌ 2ರಂದು ಇಸ್ತಾಂಬುಲ್‌ ದೂತಾವಾಸ ಪ್ರವೇಶಿಸಿದ್ದ ಬಳಿಕ ನಾಪತ್ತೆಯಾಗಿದ್ದರು.