ಸೌದಿ ತೈಲ ಕೇಂದ್ರದ ಮೇಲೆ ಡ್ರೋನ್‌ ದಾಳಿ

ರಿಯಾದ್‌: ವಿಶ್ವದ ಅತಿದೊಡ್ಡ ತೈಲ ರಫ್ತು ಕಂಪನಿ ಎಂಬ ಹೆಗ್ಗಳಿಕೆಯ ಅರಾಮ್ಕೊ ನಿರ್ವಹಿತ ಸೌದಿ ಅರೇಬಿಯಾದಲ್ಲಿನ ಬೃಹತ್‌ ತೈಲ ಸಂಸ್ಕರಣಾ ಘಟಕದ ಮೇಲೆ ಬಂಡುಕೋರರ ಡ್ರೋನ್‌ ದಾಳಿ ನಡೆದಿದೆ.

ಯೆಮನ್‌ನ ಹೌತಿ ಬಂಡುಕೋರರು ಈ ಕೃತ್ಯ ಎಸಗಿದ್ದಾರೆ ಎಂದು ಸೌದಿಯ ಆಂತರಿಕ ಸಚಿವಾಲಯ ಪ್ರಕಟಣೆ ಹೊರಡಿಸಿದೆ. ಬುಕ್ಯಾಕ್‌ ಪ್ರದೇಶದಲ್ಲಿನ ತೈಲ ಸಂಸ್ಕರಣ ಘಟಕದಲ್ಲಿಗುಂಡಿನ ದಾಳಿಯ ಬೆನ್ನ ಹಿಂದೆಯೇ ಭಾರಿ ಬೆಂಕಿ ಆವರಿಸಿ ಆಕಾಶದೆತ್ತರಕ್ಕೆ ಹೊಗೆ ಚಿಮ್ಮಿದ ವಿಡಿಯೊ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿವೈರಲ್‌ ಆಗಿದೆ. ದಾಳಿ ಬಳಿಕ ಉಪಗ್ರಹ ಮೂಲಕ ಪ್ರಸಾರಗೊಳ್ಳುವ ತನ್ನ ಅಲ್‌-ಮಸೀರ್ಹಾ ಸುದ್ದಿವಾಹಿನಿಯಲ್ಲಿಮಾತನಾಡಿರುವ ಹೌತಿ ಬಂಡುಕೋರ ಸಂಘಟನೆ ವಕ್ತಾರ ಯಾಹಿಯಾ ಸಾರೀ, '' ಒಟ್ಟು 10 ಡ್ರೋನ್‌ಗಳು ಏಕಕಾಲಕ್ಕೆ ತೈಲ ಘಟಕದ ಮೇಲೆ ದಾಳಿ ನಡೆಸಿವೆ. ದಾಳಿಗಾಗಿ ನಾವು ರೂಪಿಸಿದ್ದ ಯೋಜನೆ ಸಫಲವಾಗಿದೆ. ಸೌದಿ ಸರಕಾರ ಹಾಗೂ ಅದರ ಮಿತ್ರರಾಷ್ಟ್ರಗಳು ನಮ್ಮ ಮೇಲೆ ಆಕ್ರಮಣ ನಿಲ್ಲಿಸದಿದ್ದಲ್ಲಿಮತ್ತೆ ಭೀಕರ ದಾಳಿ ನಡೆಯಲಿದೆ,'' ಎಂದು ಎಚ್ಚರಿಸಿದ್ದಾನೆ.

ದಿನವೊಂದಕ್ಕೆ 70 ಲಕ್ಷ ಬ್ಯಾರೆಲ್‌ಗಳಷ್ಟು ಕಚ್ಚಾ ತೈಲವನ್ನು ಸಂಸ್ಕರಿಸಿ ರಫ್ತು ಮಾಡುವ ಸಾಮರ್ಥ್ಯ ಅರಾಮ್ಕೊದ ಈ ಘಟಕಕ್ಕೆ ಇದೆ.
2006ರ ಫೆಬ್ರವರಿಯಲ್ಲಿಅಲ್‌ ಕೈದಾ ಉಗ್ರರು ಆತ್ಮಹತ್ಯಾ ದಾಳಿಕೋರರ ಮೂಲಕ ಈ ತೈಲ ಘಟಕದ ಮೇಲೆ ದಾಳಿಗೆ ಯತ್ನಿಸಿ ವಿಫಲವಾಗಿದ್ದರು.