ಭಾರತಕ್ಕೆ ಸೌದಿಯಿಂದ 40 ಲಕ್ಷ ಬ್ಯಾರೆಲ್ ಹೆಚ್ಚುವರಿ ತೈಲ

ಹೊಸದಿಲ್ಲಿ: ಇರಾನ್‌ ಮೇಲೆ ಅಮೆರಿಕ ನಿರ್ಬಂಧ ಹೇರಿರುವ ಹಿನ್ನಲೆಯಲ್ಲಿ ಭಾರತಕ್ಕೆ ಸೌದಿ ಅರೇಬಿಯಾವು ಹೆಚ್ಚುವರಿ ತೈಲವನ್ನು ರಫ್ತು ಮಾಡಲಿದೆ.

ಬಲ್ಲ ಮೂಲಗಳ ಪ್ರಕಾರ ಸೌದಿ ಅರೇಬಿಯಾವು ಭಾರತಕ್ಕೆ ಹೆಚ್ಚುವರಿಯಾಗಿ 40 ಲಕ್ಷ ಬ್ಯಾರೆಲ್ ಕಚ್ಚಾ ತೈಲವನ್ನು ಪೂರೈಸಲಿದೆ.

ಇರಾನ್ ಮೇಲೆ ಅಮೆರಿಕ ವಿಧಿಸಿರುವ ನಿರ್ಬಂಧವು ನವೆಂಬರ್ 4ರಂದು ಜಾರಿಗೆ ಬರಲಿದೆ. ಹೀಗಾಗಿ ಭಾರತವು ಸೌದಿ ಅರೇಬಿಯಾ ನೆರವು ಪಡೆಯಲಿದೆ.

ಚೀನಾ ಬಳಿಕ ಭಾರತವು ಇರಾನ್‌ನಿಂದ ಅತಿ ಹೆಚ್ಚು ತೈಲವನ್ನು ಆಮದು ಮಾಡಿಕೊಳ್ಳುತ್ತಿದೆ. ಆದರೆ ಅಮೆರಿಕ ನಿರ್ಬಂಧ ಹಿನ್ನಲೆಯಲ್ಲಿ ತೈಲ ಅಭಾವದ ಬಿಕ್ಕಟ್ಟು ನಿರ್ಮಾಣವಾಗಲಿದೆ. ಇದರಿಂದಾಗಿ ಹಲವು ಸಂಸ್ಕರಣಾ ಘಟಕಗಳು ಇರಾನ್‌ನಿಂದ ತೈಲ ಖರೀದಿಸುವ ಪ್ರಕ್ರಿಯೆಯು ಸ್ಥಗಿತಗೊಳ್ಳಲಿದೆ.

ಸೌದಿ ಅರೇಬಿಯಾದಿಂದ ನವೆಂಬರ್‌ನಿಂದ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್, ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪ್, ಭಾರತ್ ಪೆಟ್ರೋಲಿಯಂ ಕಾರ್ಪ್ ಹಾಗೂ ಮಂಗಳೂರು ರಿಫೈನರಿ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ ಹೆಚ್ಚುವರಿಯಾಗಿ ತಲಾ 10 ಲಕ್ಷ ಬ್ಯಾರೆಲ್‌ಗಳನ್ನು ಆಮದು ಮಾಡಲಿದೆ.

ವಿಶ್ವದಲ್ಲೇ ಭಾರತ ಮೂರನೇ ಅತಿ ದೊಡ್ಡ ತೈಲ ಆಮದು ರಾಷ್ಟ್ರವಾಗಿದೆ. ಸೌದಿ ಅರೇಬಿಯಾವು ಭಾರತಕ್ಕೆ ಪ್ರತಿ ತಿಂಗಳಲ್ಲಿ ಸರಾಸರಿ 25 ದಶಲಕ್ಷ ಬ್ಯಾರೆಲ್‌ ತೈಲವನ್ನು ಪೂರೈಸುತ್ತಿದೆ.