ಇಸ್ರೇಲ್‌ಗೆ ಮಾತೃಭೂಮಿ ಹೊಂದುವ ಹಕ್ಕಿದೆ: ಸೌದಿ ಯುವರಾಜ

ವಾಷಿಂಗ್ಟನ್‌: ಇಸ್ರೇಲ್‌ ಕುರಿತ ಸೌದಿ ಅರೇಬಿಯಾ ನಿಲುವಿನಲ್ಲಿ ಮಹತ್ತರ ಬದಲಾವಣೆ ವ್ಯಕ್ತವಾಗಿದ್ದು, ''ಇಸ್ರೇಲ್‌ಗೆ ತನ್ನ ಮಾತೃಭೂಮಿಯನ್ನು ಹೊಂದುವ ಹಕ್ಕಿದೆ,'' ಎಂದು ಸೌದಿ ಅರೇಬಿಯಾ ಯುವರಾಜ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಹೇಳಿದ್ದಾರೆ.

ಸೌದಿ ಅರೇಬಿಯಾ ಮತ್ತು ಇಸ್ರೇಲ್‌ ಈಗಲೂ ಔಪಚಾರಿಕ ರಾಜತಾಂತ್ರಿಕ ಸಂಬಂಧಗಳನ್ನು ಹೊಂದಿಲ್ಲ. ಆದರೂ ಇತ್ತೀಚಿನ ವರ್ಷಗಳಲ್ಲಿ ಎರಡು ದೇಶಗಳ ನಡುವಿನ ಬಾಂಧವ್ಯದಲ್ಲಿ ಮಹತ್ತರ ಸುಧಾರಣೆಗಳು ಆಗುತ್ತಿವೆ.

ಇಸ್ರೇಲ್‌ ಮತ್ತು ಸೌದಿ ಅರೇಬಿಯಾ ಎರಡೂ ದೇಶಗಳು ಇರಾನ್‌ ಅನ್ನು ತಮ್ಮ ಅತಿ ದೊಡ್ಡ ಬಾಹ್ಯ ಬೆದರಿಕೆ ಎಂದು ಪರಿಗಣಿಸಿವೆ. ಅಮೆರಿಕವು ಉಭಯ ದೇಶಗಳಿಗೆ ಮಿತ್ರನಾಗಿದ್ದು, ಇಸ್ಲಾಮಿಕ್‌ ಉಗ್ರರಿಂದ ಅಪಾಯವಿರುವುದನ್ನು ಎರಡೂ ದೇಶಗಳು ಮನಗಂಡಿವೆ.

ಅಮೆರಿಕದ ಪತ್ರಿಕೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಸೌದಿ ಯುವರಾಜ ಮೊಹಮ್ಮದ್‌ ಬಿನ್‌ ಸಲ್ಮಾನ್‌, ''ಯಹೂದ್ಯರು ತಮ್ಮ ತಾಯ್ನಾಡನ್ನು ಹೊಂದುವ ಹಕ್ಕು ಹೊಂದಿದ್ದಾರೆ. ಜಗತ್ತಿನಲ್ಲಿರುವ ಯಾವುದೇ ಭಾಗದ ಜನರು ತಮ್ಮ ಶಾಂತಿಯುತ ದೇಶದಲ್ಲಿ ಜೀವಿಸುವ ಹಕ್ಕಿದೆ. ಪಾಲೆಸ್ತೇನಿಯರು ಮತ್ತು ಇಸ್ರೇಲಿಯರು ತಮ್ಮ ಸ್ವಂತ ನೆಲವನ್ನು ಹೊಂದುವ ಹಕ್ಕು ಹೊಂದಿದ್ದಾರೆ,'' ಎಂದು ಪ್ರತಿಪಾದಿಸಿದ್ದಾರೆ.