ಫ್ರೆಂಚ್‌ ಕಾನ್ಸುಲೇಟ್‌ ಕಚೇರಿ ಗಾರ್ಡ್‌ಗೆ ಇರಿದ ಸೌದಿ ವ್ಯಕ್ತಿ ಸೆರೆ

ದುಬೈ: ಜೆಡ್ಡಾದಲ್ಲಿರುವ ಫ್ರೆಂಚ್‌ ಕಾನ್ಸುಲೇಟ್‌ ಕಚೇರಿಯ ಗಾರ್ಡ್‌ವೊಬ್ಬನನ್ನು ಇರಿದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಸೌದಿ ಮಾಧ್ಯಮ ಸಂಸ್ಥೆ ನೀಡಿದ ವರದಿಯ ಪ್ರಕಾರ, ಈ ಘಟನೆಯ ಹಿಂದೆ ಯಾವ ಸಂಚೂ ಇಲ್ಲ ಎಂದು ಹೇಳಲಾಗಿದೆ.

ಫ್ರಾನ್ಸ್‌ನಲ್ಲಿ ನಡೆದ ಘಟನೆಯ ಬೆನ್ನಲ್ಲೇ ಈ ಇರಿತ ಪ್ರಕರಣ ವರದಿಯಾಗಿದ್ದು ಭಾರಿ ಚರ್ಚೆಗೆ ಕಾರಣವಾಗಿದೆ.

ಫ್ರಾನ್ಸ್‌ನ ನೈಸ್‌ ಸಿಟಿ ಎಂಬಲ್ಲಿ ದುಷ್ಕರ್ಮಿಯೊಬ್ಬ ಚರ್ಚ್‌ಗೆ ನುಗ್ಗಿ ಮೂವರನ್ನು ಚಾಕುವಿನಿಂದ ಇರಿದು ಹತ್ಯೆ ಮಾಡಿದ್ದಾನೆ. ಈ ಘಟನೆಯ ಬೆನ್ನಲ್ಲೇ ಜೆಡ್ಡಾದಲ್ಲಿ ನಡೆದ ಪ್ರಕರಣಕ್ಕೂ ಯಾವುದಾದರೂ ಸಂಬಂಧ ಇದೆಯೇ ಎಂದು ತನಿಖೆ ನಡೆಸಲಾಗುತ್ತಿದೆ. ಆದರೆ ಪ್ರಾಥಮಿಕ ಮಾಹಿತಿಯ ಪ್ರಕಾರ ಇದಕ್ಕೂ ಫ್ರಾನ್ಸ್‌ನಲ್ಲಿ ನಡೆದ ಘಟನೆಗೂ ಯಾವುದೇ ಸಂಬಂಧ ಇಲ್ಲ ಎಂದು ಹಿರಿಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.