ಇರಾನ್ ಸಂಸತ್ತಿನಲ್ಲಿ ಗುಂಡಿನ ದಾಳಿ

ಲಂಡನ್: ಇರಾನ್‌ನಲ್ಲಿ ಸರಣಿ ಉಗ್ರ ದಾಳಿ ನಡೆದಿದ್ದು, ಇಬ್ಬರು ಮೃತಪಟ್ಟಿದ್ದಾರೆ. ಓರ್ವ ಬಂದೂಕುಧಾರಿ ಸಂಸತ್ತಿನ ಮೇಲೆ ದಾಳಿ ನಡೆಸಿ, ಸಂಸದರನ್ನು ಒತ್ತೆಯಾಳುಗಳನ್ನಾಗಿಸುವ ಪ್ರಯತ್ನ ನಡೆಸಿದ್ದಾನೆ. ಗುಂಡಿನ ದಾಳಿಗೆ ಓರ್ವ ಗಾರ್ಡ್ ಸಾವನ್ನಪ್ಪಿದ್ದಾನೆ.

ಇದೇ ವೇಳೆ ಇಸ್ಲಾಮಿಕ್ ಕ್ರಾಂತಿಕಾರ ಅಯೊತುಲ್ಹಾ ಖೊಮೆನಿ ಅವರ ಸಮಾಧಿ ಭವನದ ಮೇಲೆ ಮತ್ತೊಬ್ಬ ಬಂದೂಕುಧಾರಿ ಗುಂಡಿನ ದಾಳಿ ನಡೆಸಿದ್ದಾನೆ. ದಾಳಿಯಲ್ಲಿ ಉದ್ಯಾನವನ ನಿರ್ವಾಹಕ ಸಾವನ್ನಪ್ಪಿದ್ದಾನೆ. ಇಮಾಮ್ ಖೊಮೆನಿ ಮೆಟ್ರೋ ನಿಲ್ದಾಣದ ಮೇಲೆ ಮೂರನೇ ದಾಳಿ ನಡೆದಿದೆ. ಸರಣಿ ದಾಳಿಯಲ್ಲಿ ಹಲವು ಮಂದಿ ಗಾಯಗೊಂಡಿದ್ದಾರೆ.

ಬುಧವಾರ ತೆಹರಾನ್‌ನಲ್ಲಿರು ಇರಾನ್ ಸಂಸತ್ತಿನ ಒಳಗೆ ನುಗ್ಗಿದ ಬಂದೂಕುಧಾರಿಗಳು ಗಾರ್ಡ್‌ಗಳ ಮೇಲೆ ಏಕಾಏಕಿ ಗುಂಡಿನ ದಾಳಿ ನಡೆಸಿ ಪರಾರಿಯಾಗಿದ್ದಾರೆ. ಸಂಸತ್ತಿನ ಮೇಲೆ ದಾಳಿ ನಡೆಸಿದವರಲ್ಲಿ ಮೂವರು ಇದ್ದರು ಎಂದು ಕೆಲವು ತಿಳಿಸಿದ್ದಾರೆ. ಓರ್ವ ಮಾತ್ರ ದಾಳಿ ನಡೆಸಿದ್ದಾಗಿ ವರದಿಯಾಗಿದೆ.

ಓರ್ವ ಗಾರ್ಡ್‌ನ ಕಾಲಿಗೆ ಗುಂಡು ತಗುಲಿದೆ. ಇಬ್ಬರು ನಾಗರಿಕರು ಗಾಯಗೊಂಡಿದ್ದಾರೆ ಎನ್ನಲಾಗಿದೆ. ಇರಾನ್ ಸುದ್ದಿ ಏಜೆನ್ಸಿಗಳು ಸಂಸತ್ತಿನ ಮೇಲಿನ ದಾಳಿಯನ್ನು ಖಚಿತಪಡಿಸಿವೆ.

ಇದೇ ವೇಳೆ ದಕ್ಷಿಣ ತೆಹರಾನ್‌ನ ಅಯೋತುಲ್ಹಾ ಖೊಮೆನಿ ಅವರ ಸಮಾಧಿ ಮೇಲೆ ನಡೆದ ದಾಳಿಯಲ್ಲಿ ಅನೇಕ ಮಂದಿ ಗಾಯಗೊಂಡಿದ್ದಾರೆ. ಖೊಮೆನಿ 1979ರಲ್ಲಿ ಇಸ್ಲಾಮಿಕ್ ಕ್ರಾಂತಿ ಆರಂಭಿಸಿದ್ದರು.

ವಿವರಣೆಗಾಗಿ ನಿರೀಕ್ಷಿಸಲಾಗುತ್ತಿದೆ...