ಲಖನೌ ಶಾಲೆಗಳಲ್ಲಿ ಸ್ಮಾರ್ಟ್‌ಫೋನ್‌ ಬಳಕೆ ಮಾಡುವಂತಿಲ್ಲ

ಲಖನೌ: ಹಲವರ ಜೀವ ಬಲಿ ಪಡೆದಿರುವ ಬ್ಲೂವೇಲ್‌ ಆಟದಿಂದ ಮಕ್ಕಳಿಗೆ ರಕ್ಷಣೆ ನೀಡಲು ಮುಂದಾಗಿರುವ ಲಖನೌ ಶಿಕ್ಷಣ ಇಲಾಖೆ, ಮಕ್ಕಳು ಇನ್ನು ಮುಂದೆ ಶಾಲಾ ಆವರಣದಲ್ಲಿ ಸ್ಮಾರ್ಟ್‌ಫೋನ್‌ ಬಳಕೆ ಮಾಡದಂತೆ ಆದೇಶಿಸಿದೆ.

ಕಳೆದ ವಾರದಂದು 14 ವರ್ಷ ಬಾಲಕ ಬ್ಲೂವೇಲ್‌ ಆಟಕ್ಕೆ ಬಲಿಯದ ಬಳಿಕ, ತಮ್ಮ ಮಕ್ಕಳು ಈ ಡೆಡ್ಲಿ ಆಟಕ್ಕೆ ಬಲಿಯಾಗದಂತೆ ಪೋಷಕರು ಶಿಕ್ಷಣ ಇಲಾಖೆಗೆ ಮನವಿ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಶಿಕ್ಷಣ ಇಲಾಖೆ, ಎಲ್ಲಾ ಶಾಲೆಗಳಲ್ಲಿ ಮಕ್ಕಳು ಮೊಬೈಲ್‌ ಬಳಕೆ ಮಾಡದಂತೆ ನೋಡಿಕೊಳ್ಳಬೇಕು ಎಂದು ಆದೇಶಿಸಿದೆ.

'ಶಾಲೆಗಳಲ್ಲಿ ಸ್ಮಾರ್ಟ್‌ಫೋನ್‌ ಬಳಕೆ ನಿಷೇಧಿಸಲಾಗಿದೆ, ಅಲ್ಲದೇ ಇನ್ನು ಮುಂದೆ ಮಕ್ಕಳು ಮೊಬೈಲ್ ತರದಂತೆ ಎಚ್ಚರ ವಹಿಸಿಕೊಳ್ಳಲು ಎಲ್ಲಾ ಶಾಲೆಗಳಿಗೆ ಆದೇಶಿಸಲಾಗಿದೆ. ಅಧ್ಯಾಪಕರು ಶಾಲೆಗಳಲ್ಲಿ ಮಕ್ಕಳು ಮೊಬೈಲ್‌ ಬಳಕೆ ಮಾಡುತ್ತಾರೆಯೇ ಎಂದು ಪರೀಕ್ಷಿಸಬೇಕು ಎಂದು ಜಿಲ್ಲಾ ಶಿಕ್ಷಾಣಿಧಿಕಾರಿ ಮುಖೇಶ್‌ ಕುಮಾರ್‌ ಸಿಂಗ್‌ ಪಿಟಿಐಗೆ ಹೇಳಿದ್ದಾರೆ.

'ಶಾಲೆಗಳಲ್ಲಿ ಮಕ್ಕಳ ದಿನಚರಿ ಸೇರದಂತೆ ವರ್ತನೆಯಲ್ಲಿ ಏನಾದರೂ ಬದಲಾವಣೆ ಕಂಡು ಬಂದರೆ ಕೂಡಲೇ ಅವರನ್ನು ಕೌನ್ಸಿಲಿಂಗ್‌ ಮಾಡಲೇಬೇಕು' ಎಂದು ಮುಖೇಶ್‌ ಹೇಳಿದ್ದಾರೆ.